އަންނަ މާޗް މަހު ފަށާ އޭޝިއަން ކަޕް ކޮލިފައިންގެ ކުރިން ގައުމީ ފުޓްބޯޅަ ޓީމުން އިންޑިއާއާ ދެކޮޅަށް މެޗެއް ކުޅޭ ގޮތަށް ހަމަޖެހިއްޖެ އެވެ.

އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް)އާ ހަވާލާދީ އިންޑިއާގެ މީޑިއާތަކުން ރިޕޯޓްކުރާގޮތުގައި، އިންޑިއާ އިން އޭޝިއަން ކަޕްގެ ކޮލިފައިން އަށް ތައްޔާރުވުމުގެ ގޮތުން މެޗެއް ކުޅެން ހަމަޖެހިފައިވަނީ ރާއްޖެއާ ދެކޮޅަށެވެ.

އެކަމާ ގުޅޭގޮތުން، "އަދަދު ސްޕޯޓްސް" އިން ސުވާލުކުރުމުން، އެފްއޭއެމްގެ ޖެނެރަލް ސެކްރެޓަރީ، ނާހިލް ސިއްދީގު ވިދާޅުވީ، އިންޑިއާއާ ދެކޮޅަށް މެޗެއް ކުޅެން މަޝްވަރާކުރެވެމުން އަންނަ ކަމަށާއި މިހާރު އޮތް ގޮތުން، މި މެޗު ތާވަލުކުރެވޭނީ، މާޗް 19 ނޫނީ 20 ވަނަ ދުވަހަަށް ކަމަށެވެ.

ދާދި ފަހުން، އިންޑިއާ އިން ދިން ފުރުސަތެއްގައި، ގައުމީ އަންހެން ފުޓްބޯޅަ ޓީމު ވަނީ އިންޑިއާއާ ދެކޮޅަށް އެކުވެރިކަމުގެ ދެ މެޗެއް ކުޅެފަ އެވެ.

އިންޑިއާގެ ފިރިހެން ފުޓްބޯޅަ ޓީމަށް މިދިޔަ އަހަރަކީ އެންމެ ރަނގަޅު އަހަރެއް ނޫނެވެ. އެ ޓީމުން ކުޅުނު، 11 މެޗުގެ ތެރެއިން މޮޅެއް ލިބިފައިނުވެ އެވެ. ފަސް މެޗުން އެއްވަރުވިއިރު، ހަ މެޗުން ވަނީ ބަލިވެފަ އެވެ. މިއީ 2014 ވަަަނަ އަހަރަށް ފަހު، ކަލަންޑަރު އަހަރެއްގައި، އިންޑިއާ އަށް މޮޅެއް ނުލިބި ނިންމާލަން ޖެހުނު ފުރަތަމަ އަހަރެވެ.

ރާއްޖޭން ބައިނަލްއަގުވާމީ ފުޓްބޯޅައިގައި މިދިޔަ އަހަރު ކުޅުނީ ދެ މެެޗެެވެ. އެ ގޮތުން، އަހަރެއް ފަހުން، ކުޅުނު ބައިނަލްއަގުވާމީ ފުރަތަމަ މެޗުގައި، ބަންގްލަދޭޝާ ދެކޮޅަށް ކުޅެ މޮޅުވި އެވެ. އެކަމަކު، ދެ ވަނަ މެޗުން ވީ ބައްޔެވެ.

ރާއްޖެއާ ދެކޮޅަށް ކުޅުނު މެޗުތަކުން އިންޑިއާ ވަނީ 15 މެޗުން މޮޅުވެފަ އެވެ. ހަތަރު މެޗުން ރާއްޖެ މޮޅުވިއިރު، ދެ މެޗު ނިމުނީ އެއްވަރުވެގެންނެވެ. އެންމެ ފަހުން، މި ދެ ޓީމު ބައްދަލުކުރީ 2021 ވަނަ އަހަރު މާލޭގައި ކުޅުނު ސާފް ޗެމްޕިއަންޝިޕްގަ އެވެ. އެ މެޗުން އިންޑިއާ ވަނީ 3-1 އިން ރާއްޖެ ބަލިކޮށްފަ އެވެ.

އޭޝިއަން ކަޕް ކޮލިފައިންގައި ރާއްޖެ ކުޅޭ ފުރަތަމަ މެޗުގައި މާޗް 25 ވަނަ ދުވަހު މާލޭގައި ކުޅޭނީ ފިިލިޕީންސާ އެވެ. ހަމަ އެ ދުވަހު، އިންޑިއާ އިން ކޮލިފައިންގައި ކުޅޭ ފުރަތަމަ މެޗުގައި، އަމިއްލަ ދަނޑުގައި ބައްދަލުކުރާނީ ބަންގްލަދޭޝާ އެވެ.