ޗައިނާގެ ފޮރިން މިނިސްޓަރު ވާންގް ޔީ ދިވެހިރާއްޖެއަށް ވަޑައިގެންފި ކަމަށް އިއްޔެ ރިޕޯޓުކުރި އެވެ.

މި ނޫހަށް އެނގިފައިވާ ގޮތުގައި މިނިސްޓަރު ޔީ ރާއްޖެ ވަޑައިގަތީ އެފްރިކާގެ ބައެއް ގައުމުތަކަށް އޭނާ ކުރެއްވި ދަތުރަށްފަހު އެނބުރި ޗައިނާއަށް ވަޑައިގަތުމުގެ ކުރިންނެވެ.

ވާންގް ޔީ ވަޑައިގެންނެވީ ނެމީބިއާ، ކޮންގޯ، ޗާޑް އަދި ނައިޖީރިއާއަށެވެ. އެއީ ޗައިނާގެ ފޮރިން މިނިސްޓަރު ކޮންމެ އަހަރަކު ވެސް އެފްރިކާގެ ގައުމުތަކަށް ކުރައްވާ ދަތުރެކެވެ.

އޭނާ އިއްޔެ ވަނީ ރައީސް ޑރ. މުހައްމަދު މުއިއްޒުއާ ބައްދަލު ކުރައްވައިފަ އެވެ. އެ ބައްދަލުވުން ބޭއްވީ ރައީސުލްޖުމްހޫރިއްޔާގެ އޮފީހުގަ އެވެ. އެ ބައްދަލުވުމުގައި ރައީސް މުއިއްޒު ވަނީ ޗައިނާއިން ރާއްޖޭގައި ހިންގާ ޕްރޮޖެކްޓުތައް އަވަސް ކުރުމާ ގުޅޭ ގޮތުން މަޝްވަރާ ކުރައްވައިފަ އެވެ. އެގޮތުން ސޯޝަލް ހައުސިން ޕްރޮޖެކްޓުތަކާއި މަގުހެދުމުގެ މަސައްކަތްތައް އަވަސް ކުރުމުގެ މުހިންމުކަން އެމަނިކުފާނު ވަނީ ފާހަގަ ކުރައްވައިފަ އެވެ.

އޭގެ އިތުރުން، ރާއްޖޭގެ އިގްތިސާދު ސިންދަފާތު ކުރުމުގެ މުހިންމުކަމާއި އެކަން ކުރުމަށް ޗައިނާއަށް ވެދެވޭނެ އެހީއާ ގުޅޭ ގޮތުން ވެސް ރައީސް މުއިއްޒު ވަނީ އެ ބައްދަލުވުމުގައި ވާހަކަ ދައްކަވައިފަ އެވެ.

ޗައިނާއިން ރާއްޖޭގައި ކުރިއަށްގެންދާ މަޝްރޫއުތައް އަވަސް ކުރުމަށް މަސައްކަތް ކުރައްވާނެކަމުގެ ޔަގީންކަން އިއްޔެގެ ބައްދަލުވުމުގައި ފޮރިން މިނިސްޓަރު ވާންގް ޔީ ވަނީ ރައީސް މުއިއްޒަށް ދެއްވައިފަ އެވެ.

އިއްޔެ ވަގުތެއްގައި ވާންގް ޔީ ވަނީ އެނބުރި ގައުމަށް ފުރާވަޑައިގެންފަ އެވެ.

ޗައިނާގެ ފޮރިން މިނިސްޓަރު ރާއްޖެ ވަޑައިގެންނެވިއިރު، ރާއްޖޭގެ ފޮރިން މިނިސްޓަރު އަބްދުﷲ ހަލީލު އަދި ޑިފެންސް މިނިސްޓަރު ގައްސާން މައުމޫން ވަނީ ދާދިފަހުން ޗައިނާއާ ވާދަވެރި އިންޑިއާއަށް ޒިޔާރަތް ކުރައްވައިފަ އެވެ.

ގައްސާނުގެ ދަތުރުގެ ތެރެއިން އިންޑިއާއިން ވަނީ މޯލްޑިވްސް ނެޝަނަލް ޑިފެންސް ފޯސްއަށް ހަތަރު މިލިއަން ޑޮލަރު ނުވަތަ 62 މިލިއަން ރުފިޔާގެ އަސްކަރީ އާލާތް ހަދިޔާކޮށްފަ އެވެ. އިންޑިއާއިން ރާއްޖޭގައި ދުއްވާ ދެ ހެލިކޮޕްޓަރާއި ޑޯނިއާ މަތިންދާބޯޓު އޮޕަރޭޓު ކުރުމާއި އެ އޮޕަރޭޓު ކުރަން އިންޑިއާގެ މީހުން ބޭތިއްބުމަށް ހަދާފައިވާ އެގްރިމެންޓު އާ ކުރަން ވެސް އެ ދަތުރުގައި މަޝްވަރާ ކުރި އެވެ.

ރައީސް މުއިއްޒު ވެރިކަމަށް ވަޑައިގެންނެވިތާ ކުރީކޮޅު، ލ. ގާދޫގައި ޓްރާންސްޝިޕްމަންޓް ބަނދަރަކާއެކު މެރިޓައިމް ހަބެއް ތަރައްގީ ކުރަން ޗައިނާގެ ކުންފުންޏަކާ އެކު އޭޕްރީލް 11، 2024، ގައި ސޮއި ކުރި އެވެ. ނަމަވެސް ފަހުން، ހަމަ އެ ޕްރޮޖެކްޓުތައް ހިންގަން އިންޑިއާ ސަރުކާރާއެކު ވެސް ރާއްޖެއިން އެއްބަސްވުމެއްގައި ސޮއި ކުރި އެވެ.

ގާދޫގައި ޓްރާންސްޝިޕްމަންޓު ބަނދަރެއް ތަރައްގީ ކުރުމުގެ އެއްބަސްވުމުގައި އިންޑިއާއާއެކު ސޮއި ކުރީ ރައީސް މުއިއްޒު އެ ގައުމަށް ވަޑައިގެން އޮކްޓޯބަރު 7، 2024، ގަ އެވެ.

އޭގެ އިތުރުން، އިންޑިއާއިން އަސްކަރީ ބަނދަރެއް ތަރައްގީ ކުރުމުގެ މަސައްކަތްތަކެއް ކުރާ އުތުރުތިލަފަޅުގައި ދަނޑުވެރިކަމުގެ ބޮޑު ޕްރޮޖެކްޓަށް ހިންގަން ޗައިނާގެ ކުންފުންޏަކާ މާޗް 28، 2024، ގައި ސަރުކާރުން ހަވާލު ކުރި އެވެ. ނަމަވެސް އެ ޕްރޮޖެކްޓު ފަހުން ވަނީ ރަސްމާލެއަށް ބަދަލުކޮށްފަ އެވެ. އަދި އަސްކަރީ ބަނދަރުގެ މަސައްކަތް އަވަސް ކުރަން ސަރުކާރުން އެއްބަސްވި އެވެ.

މުހިއްމު ބައެއް ހަބަރު