ސައުތު ކޭޓަރިންގައި މަސައްކަތް ކުރާ މުވައްޒަފުންނަށް ގަވާއިދުން މުސާރަ ނުދޭ ކަމަށް ބުނާ މައްސަލަ ފުލުހުން ބަލަން ފަށައިފި އެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނީ ސައުތު ކޭޓަރިންގެ މުވައްޒަފުންނަށް ގަވާޢިދުން މުސާރަ ނުދޭ މައްސަލަ އެ އިދާރާގެ ސަމާލު ކަމަށް އައިސްފައިވާ ކަމަށެވެ. އެ މައްސަލަ ބަލަމުން ދަނީ ފުލުހުންގެ، އެންޓި ހިއުމަން ޓްރެފިކިން ޑިޕާޓުމެންޓުން ކަމަށް ފުލުހުން ބުންޏެވެ.

"މި މައްސަލަ އާ ގުޅިގެން ބަލަންޖެހޭ ކަންކަން ދިވެހި ފުލުހުންގެ ހިދުމަތުގެ އެންޓި ހިއުމަން ޓްރެފިކިން ޑިޕާޓުމެންޓުން ދަނީ ބަލަމުން،" ފުލުހުންގެ މެސެޖުގައި ބުންޏެވެ.

ސައުތު ކޭޓަރިން އަކީ ސައުތު އެންޓަޕްރައިޒެސްގެ ދަށުން ހިންގާ ވިޔަފާރި އެކެވެ. ސައުތު ކޭޓަރިންއަކީ ރާއްޖޭގައި އެންމެ ފުޅާ ދާއިރާއެއްގައި ކޭޓަރިންގެ ހިދުމަތް ދޭ އެއް ވިޔަފާރި އެވެ.

އެ ކުންފުނީގެ ދަށުން މާލެ ސަރަހައްދުގައި ކެފޭ ރެސްޓޯރެންޓު ވެސް ހިންގަ އެވެ. އަލިކިލޭގެފާނު މަގުގައި ސައުތު ކޭޓަރިން އިން ހިންގާ ޑުލްސޭ ބައި ސައުތުގެ ކުރިމަތީގައި ސައުތު ކޭޓަރިންގެ ބައެއް މުވައްޒަފުން މިއަދު ވަނީ މުސާރަ ނުދޭ މައްސަލައިގައި މުޒާރާ ވެސް ކޮށްފަ އެވެ.