އދ. ގައި އޮންނަ ރެޑިސަން ބްލޫ މޯލްޑިވްސް ރިސޯޓު ބޭރަށް މޫދަށް އެރި އުޅުނު ފަތުރުވެރިއެއްގެ ގައިގައި ލޯންޗަކުން ޖެހި ލިބުނު އަނިޔާގައި އޭނާ މަރުވެއްޖެ އެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނީ މަރުވެފައި ވަނީ އާޖެންޓީނާއަށް ނިސްބަތްވާ 55 އަހަރުގެ ފިރިހެނެއް ކަމަށެވެ. އެ ހާދިސާގެ ރިޕޯޓު ލިބުނީ މިއަދު ހެނދުނު ކަމަށް ފުލުހުން ބުންޏެވެ.

ފަތުރުވެރިއާ ގައިގައި ޖެހުނީ އައިކޮމް ގްރީން ނަމަކަށް ކިޔާ ލޯންޗަކުން ކަމަށް ފުލުހުން ބުންޏެވެ. އެ ހާދިސާ އާ ގުޅޭ އިތުރު ތަފުސީލެއް ފުލުހުން އަދި ހާމައެއް ނުކުރެ އެވެ.

އެ މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.

ލޯންޗެއްގެ ބުރަފަތިން ޖެހި ސިންގަޕޫރު ސްކޫލެއްގެ ދަރިވަރަކު ވެސް މިދިޔަ އަހަރު ވަނީ މަރުވެފަ އެވެ. އޭނާ މަރުވީ ސްނޯކްލިން ދަތުރެއް ގޮސް އުޅެނިކޮށެވެ. އެ މައްސަލަ ވެސް ފުލުހުން ތަހުގީގު ކުރަމުންދާ ކަމަށް ބުނެފައިވެ އެވެ.