މެންޗެސްޓާ (ޖެނުއަރީ 10) - މެންޗެސްޓާ ޔުނައިޓެޑަށް ކުޅެމުން އަންނަ އައިވަރީ ކޯސްޓުގެ ވިންގް، އަމަދު ޑިއާލޯގެ ކޮންޓްރެކްޓް 2030 ވަނަ އަހަރުގެ ޖޫންގެ ނިޔަލަށް އާ ކޮށްފި އެވެ.

އަމަދު، 22، ޔުނައިޓެޑާ އެކު، ހަދާފައި އޮތް އެއްބަސްވުން އޮތީ މި ސީޒަނުގެ ނިޔަލަށެވެ. އެ ކޮންޓްރެކްޓްގައި އޮތް މާއްދާއެއްގެ ތެރެއިން އިތުރު އެއް އަހަރަށް އަމަަދުގެ އެއްބަސްވުން އާ ކުރެވެން ވެސް އޮތެވެ. އެކަމަކު، ޔުނައިޓެޑުން ނިންމީ މި ވަގުތު އެ ޓީމުގައި އެންމެ މޮޅަށް ކުޅެމުން އަންނަ އެއް ކުޅުންތެރިޔާ، އަމަދު އަށް ދިގު މުއްދަތެއްގެ ކޮންޓްރެކްޓެއް ދިނުމަށެވެ.

އެ ގޮތުން، ޔުނައިޓެޑުން އަމަދުއާ އެކު، ސޮއިކުރި ފަސް އަހަރާއި ބައިގެ މި ކޮންޓްރެކްޓް އޮތީ، 2030 ވަނަ އަހަރުގެ ޖޫން މަހުގެ ނިޔަަލަށެވެ. މި ސީޒަނުގައި ޔުނައިޓެޑަށް 27 މެޗު ކުޅެދީ ހަ ގޯލު ޖަހާފައިވާ އަމަދު ބުނީ، ޔުނައިޓެޑާ އެކު، އިތުރު އަހަރުތަކެއް ހޭދަކޮށް، މަތީ ފެންވަރުގައި ކުޅެލަން ލިބުމަކީ ބޮޑު ހިތްހަަމަޖެހުމެއް ކަމަށެވެ.

އިޓަލީގެ އެޓަލަންޓާ ދޫކޮށް، 2021 ވަނަ އަހަރު އަމަދު ޔުނައިޓެޑާ ގުޅުނީ، ފުރަތަމަ 22 މިލިއަން ޑޮލަރު ދީފަ އެވެ. އެކަމަކު، އެ ޑީލްގެ ޖުމްލަ އަކު، 35 މިލިއަން ޑޮލަރަށް އަރާ ކަމަށް އިޓަލީގެ ނޫސްތަކުން ވަނީ ރިޕޯޓްކޮށްފަ އެވެ.

ޔުނައިޓެޑާ ގުޅުނު ފަހުން، އަމަދު ވަނީ ލޯން އެއްބަސްވުމެއްގެ ދަށުން ސަންޑަލެންޑަށް ކުޅެފަ އެވެ. މި ސީޒަނުގައި، ލޯނަކަށް އެހެން ޓީމަކަށް ބަދަލުނުވެ، ޔުނައިޓެޑަށް ކުޅެމުން ރަނގަޅު ފޯމެއްގައި ހުރި، އަމަދު ވަނީ، ލީގުގައި ޔުނައިޓެޑުން މެންޗެސްޓާ ސިޓީ ދަނޑުގައި މޮޅުވި މެޗުގައި ފަހު ގޯލާއި ލިވަޕޫލް ދަނޑުގައި އެއްވަރުކުރި ގޯލު ޖަހައިފަ އެވެ.