ޓިއުރިން (ޖެނުއަރީ 1) - މެންޗެސްޓާ ޔުނައިޓެޑަށް ކުޅެމުން އަންނަ ނެދަލެންޑްސްގެ ފޯވާޑް، ޖޯޝުއާ ޒާކްޒީ، ލޯން ޑީލެއްގެ ދަށުން ހޯދަން އިޓަލީގެ ޔުވެންޓަސް އިން މަސައްކަތް ކުރަމުން އަންނަ ކަަމަށް އިޓަލީގެ މީޑިއާ ރިޕޯޓްތައް ބުނެފި އެވެ.

ޔުވެންޓަސްގެ ކޯޗަކަށް ހުރީ މިދިޔަ ސީޒަނުގައި، ޒާކްޒީއާ އެކު، އިޓަލީގެ ބޮލޯނިއާގައި މަސައްކަތްކުރި ކޯޗު ތިއާގޯ މޮޓާ އެވެ. ޔުވެންޓަސްގެ އެޓޭކް ވަރުގަދަކުރަން ކުރާ މަސައްކަތުގައި، މި މަހުގެ ޓްރާންސްފާ މާކެޓްގައި އިތުރު ފޯވާޑެއް ގަންނަން މޮޓާ ވަނީ އެ ކްލަބްގެ ބޯޑުގައި އެދިފަ އެވެ. އަދި ރިޕޯޓްތައް ބުނާގޮތުގައި، މޮޓާ ބޭނުންވަނީ، ޒާކްޒީ އެވެ. އަދި އޭނާ ނުލިބިއްޖެނަމަ، ޔުނައިޓެޑްގެ މާކަސް ރެޝްފޯޑް ލިބޭތޯ ވާހަކަ ދައްކަން ވެސް ޔުވެންޓަސް އިން ތައްޔާރެެވެ.

ބޮލޯނިއާ އަށް 45 މިލިއަން ޑޮލަރު ދައްކާ ގޮތަށް، ޔުނައިޓެޑުން މި ސީޒަނުގައި ގެނައި ޒާކްޒީ އަށް އަދި އެ ޓީމުގައި އެންމެ އެދެވޭ ކުޅުމެއް ދެއްކޭގޮތެއްނުވެ އެވެ. ޔުނައިޓެޑަށް ކުޅެދިން 19 މެޗުން އަދި ޒާކްޒީ އަށް ޖެހުނީ އެންމެ ތިން ގޯލެވެ. އަދި އެންމެ ފަހުން، ޔުނައިޓެޑުން އަމިއްލަ ދަނޑުގައި ނިއުކާސަލް ޔުނައިޓެޑް އަތުން ބަލިވި މެޗުގެ ފުރަތަމަ ހާފުގައި ޒާކްޒީ ބަދަލުކުރުމާ އެކު، ޔުނައިޓެޑުގައި އޭނާގެ މުސްތަގުބަލާ މެދު ވަނީ ސުވާލު އުފެދިފަ އެވެ.

ކުރިން ބަޔާން މިއުނިކަށް ވެސް ކުޅުނު ޒާކްޒީ އަކީ ޔުނައިޓެޑުން ވިއްކާލާ ލިސްޓުގައި ހިމެނޭ ކުޅުންތެރިއެއް ކަމަށް އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ. ޔުނައިޓެޑުން ޒާކްޒީ ގެނައީ ކުރިން ހުރި ކޯޗު އެރިކް ޓެން ހާގުގެ އެދުމަކަށެވެ. އެކަމަކު، ޓެން ހާގުގެ ވަޒީފާ ގެއްލުމުން، ޔުނައިޓެޑުގެ ކޯޗަކަށް ގެނައި، ރުބެން އަމޮރިމްގެ ޕްލޭނުގައި ޒާކްޒީގެ މާ ބޮޑު ރޯލެއް އަދި ނުފެނެ އެވެ.