އޮންލައިން ޓްރޭޑް ކޮށްގެން ހޯދާ ކްރިޕްޓޯ ކަރެންސީ ބީއެމްއެލްގެ އޭޓީއެމްތަކުން އެކްސްޗޭންޖު ރޭޓުގައި ނެގޭ ކަމަށް ބުނެ އަލްހާން ފަހުމީ ފެތުރި ވާހަކަ އެ ބޭންކުން ދޮގުކޮށްފި އެވެ.

ބީއެމްއެލުން މިރޭ ނެރުނު ނޫސްބަޔާނެއްގައި ބުނީ ކްރިޕްޓޯ އެކްސްޗޭންޖު ކުރުމުގެ ހިދުމަތް އެ ބޭންކުގެ އެއްވެސް ވަސީލަތެއް މެދުވެރިކޮށް ނުދޭ ކަމަށެވެ.

"ބޭންކް އޮފް މޯލްޑިވްސް އިން ކަސްޓަމަރުންނަށް ދެމުން އަންނަ އެއްވެސް ވަސީލަތެއް މެދުވެރިކޮށް ކްރިޕްޓޯ އެކްސްޗޭންޖު ކުރުމުގެ ހިދުމަތެއް ނުދެން،" ބީއެމްއެލްގެ ބަޔާނުގައި ބުންޏެވެ.

ބީއެމްއެލުން މިފަދަ ބަޔާނެއް ނެރެފައި މިވަނީ މީގެ ކުރިން ވެސް ޓްރޭޑް ކުރުމުގެ ނަމުގައި އެތައް ބައެއްގެ އަތުން ފައިސާ ނަގައިގެން މަކަރު ހެދިކަމުގެ ތުހުމަތު އަމާޒުވެފައިވާ އަލްހާން ފަހުމީ ސޯޝަލް މީޑިއާގައި ދައުރު ކުރި ވީޑިއޯއަކާ ގުޅިގެންނެވެ.

އެ ވީޑިއޯގައި އަލްހާން ބުނެފައި ވަނީ އޮންލައިން ޓްރޭޑް ކޮށްގެން ލިބޭ ކްރިޕްޓޯ ކަރެންސީ އެކަމަށް ހާއްސަކޮށް ހައްދާފައިވާ ބޭރުގެ ކާޑެއް މެދުވެރިކޮށް ބީއެމްއެލްގެ އޭޓީއެމުން އެކްސްޗޭންޖު ކުރެވޭ ކަމަށެވެ. އަދި އެ ކާޑު މެދުވެރިކޮށް 100،000 ޑޮލަރަށްވާ ދިވެހި ފައިސާ އެއްފަހަރާ ނެގޭނެ ކަމަށް އަލްހާން އެ ވީޑިއޯގައި ބުނެފައިވެ އެވެ.

ނަމަވެސް ބީއެމްއެލުން އެ ބޭންކުގެ އޭޓީއެމްތައް މެދުވެރިކޮށް މުއާމަލާތް ކުރެވޭނީ އެމެރިކަން އެކްސްޕްރެސް އާއި ވިސާ އަދި މާސްޓާކާޑު ފަދަ އިންޓަނޭޝަނަލް ބްރޭންޑުތަކުގެ ކާޑުތަކުން ކަމަށެވެ. ނަމަވެސް އޭގެ ކާޑަކުން ވެސް އަލްހާން ބުނެފައިވާ ގޮތަށް 100،000 ޑޮލަރަށްވާ ދިވެހި ފައިސާ ނުނެގޭނެ ކަމަށް ބީއެމްއެލުން ބުންޏެވެ.

ބީއެމްއެލް އޭޓީއެމްގެ ލޯގޯ ބޭނުންކޮށްގެން އާންމުންނަށް އޮޅޭ ގޮތަށް، ކްރިޕްޓޯ ކަރެންސީ އެ ބޭންކުގެ އޭޓީއެމްތަކުން އެކްސްޗޭންޖު ކުރެވޭ ކަމަށް ބުނެ ވާހަކައެއް ފަތުރާފައިވާތީ ހިތާމަކޮށް އެކަން ކުށްވެރި ކުރާ ކަމަށް ބީއެމްއެލުގެ ބަޔާނުގައި ބުންޏެވެ.