ލަންޑަން (ޖެނުއަރީ 8) - އިނގިރޭސި ލީގު ކަޕް ސެމީ ފައިނަލުގެ ފުރަތަމަ ލެގުގައި އާސެނަލް ދަނޑުގައި އެ ޓީމު އަތުން 2-0 އިން މޮޅުވެ، ނިއުކާސަލް ޔުނައިޓެޑުން ކޮންޓްރޯލް ނަގައިފި އެވެ.

ސެމީ ފައިނަލުގެ ދެ ވަނަ ލެގު ކުޅޭނީ އަންނަ މަހުގެ ފަސް ވަނަ ދުވަހު ނިއުކާސަލް ދަނޑުގަ އެވެ. އެ މެޗު އެއްވަރުކޮށްލައިގެން ވެސް ނިއުކާސަލަށް ފައިނަަލަށް ދަތުރުކުރެވޭނެ އެވެ. ނިއުކާސަލުން މީގެ ދެ އަހަރު ކުރިން ފައިނަލުގައި މެންޗެސްޓާ ޔުނައިޓެޑް އަތުން ބަލިވިއިރު، މި ފަހަރުގެ ފައިނަލުގައި ކުޅޭނީ ޓޮޓެންހަމް ހޮޓްސްޕާސް ނޫނީ ލިވަޕޫލާ އެވެ.

އެމިރޭޓްސް ސްޓޭޑިއަމްގައި ރޭ ކުޅުނު މެޗުގައި އާސެނަލްގެ ވިލިއަމް ސަލީބާ ޖެހި ޝޮޓެއް ނިއުކާސަލްގެ ޑިފެންޑަރު ޑޭން ބާން ވަނީ ބްލޮކްކޮށްފަ އެވެ. އޭގެ ފަހުން، ގަބްރިއެލް މާޓިނެލީ ހުސްކޮށް އަރައި އާސެނަލަށް ލީޑުނަގައިދޭން ޖެހި ބޯޅަ އަމާޒުވީ ގޯލުގެ ދަނޑިއަށެވެ.

އާސެނަލުން ފުރުސަތު ނަގާލުމުގެ ނަތީޖާ އަކީ މެޗުގެ 37 ވަނަ މިނިޓްގައި އެ ޓީމުގެ އޭރިއާތެރެއިން ލިބުނު ބޯޅައެއް ނިއުކާސަލްގެ އަލެކްސަންޑަ އިސާކް ގޯލު ޖަހައި އެ ޓީމަށް ލީޑުނަގައިދިނުމެވެ. މިއީ އެންމެ ފަހުން ކުޅުނު 15 މެޗުގައި އިސާކް ޖެހި 14 ވަނަ ގޯލެވެ.

ދެ ވަނަ ހާފު ފަށައިގެން ހަ ވަނަ މިނިޓްގައި، އިސާކް ފޮނުވާލި ޝޮޓެއް އާސެނަލް ކީޕަރު ޑޭވިޑް ރާޔާ އަތުގައި ޖެހިފައި ރީބައުންސް ނުކުތް ވަގުތު އެ ބޯޅަ ގޯލަށް ފޮނުވާލައިގެން އެންތަނީ ގޯޑަން ނިއުކާސަލްގެ ލީޑުފުޅާކޮށްދިނެވެ.

އާސެނަލަށް ލަނޑެއް ޖަހައިދޭން އޭރިއާތެރެއިން ހުސްކޮށް ކައި ހަވާޓްޒް އަށް ލިބުނު ފުރުސަތުގައި ފޮނުވާލި ބޯޅަ ދިޔައީ ގޯލާ ސީދާނުވެ އެވެ.