މާލޭގައި ހުރި ބޮންޑެޑް ވެއާހައުސްއެއްގައި ރައްކާ ކޮށްފައި ހުއްޓައި 34،500 އެއްހައި ސިނގިރޭޓު ކާޓަން ގެއްލުނު މައްސަލައިގައި އެ ތަކެތީގެ ޑިއުޓީ އާއި ޖޫރިމަނާގެ ގޮތުގައި 40 މިލިއަން ރުފިޔާ ދައްކަން އެ ސިނގިރޭޓުގެ ވެރިފަރާތަށް ކަސްޓަމްސްއިން އަންގައިފި އެވެ.

ޑިއުޓީ އާއި ޖޫރިމަނާގެ ގޮތުގައި 40 މިލިއަން ރުފިޔާ ދައްކަން ސިނގިރޭޓުގެ ވެރިފަރާތަށް އަންގާފައިވާކަން ހޯމް މިނިސްޓަރު އަލީ އިހުސާން "އަދަދު" ނޫހަށް ކަށަވަރު ކޮށްދެއްވި އެވެ.

ސިނގިރޭޓު ގެއްލުނު މައްސަލަައިގައި އެ ތަކެތީގެ ވެރިފަރާތް ޖޫރިމަނާ ކުރި ސަބަބެއް އަދި ސާފެއް ނުވެ އެވެ. ނަމަވެސް ބޮންޑެޑް ވެއާހައުސްތަކުގައި ހުންނަ މުދާ ބޭރު ކުރެވޭނީ ކަސްޓަމްސްގެ ހުއްދައާއެކު އެވެ. ސަބަބަކީ ބޮންޑެޑް ވެއާހައުސްތަކުގައި މުދަލުގެ ވެރިފަރާތުން އަޅުވާފައި ހުންނަ ތަޅުގެ އިތުރުން ކަސްޓަމްސްގެ ތަޅެއް ވެސް އަޅުވާފައި ހުންނާނެ އެވެ.

ގާނޫނު ބުނާ ގޮތުން ބޮންޑު ކޮށްފައި ހުންނަ މުދަލަކަށް ޑިއުޓީ ދައްކަން ޖެހޭނީ އެ މުދަލެއް ނެރުމުން ނުވަތަ ހަލާކުވެ، ގެއްލޭ ފަދަ ހާލަތެއް މެދުވެރިވުމުންނެވެ.

މި ނޫހަށް އެނގިފައިވާ ގޮތުގައި ސިނގިރޭޓުތައް ގެއްލިފައިވަނީ ގާނޫނަށް ބަދަލު ގެނެސް ސިނގިރޭޓާއި ދުންފަތުގެ އުފެއްދުންތަކުން ނަގާ އިމްޕޯޓު ޑިއުޓީ ބޮޑުކުރަން ނިންމި ފަހުންނެވެ. އެހެންކަމުން އެ ތަކެއްޗަށް ޑިއުޓީ ދައްކަން ޖެހޭނީ ބޮޑުކުރި ރޭޓުގަ އެވެ.

ސިނގިރޭޓުތައް ގެއްލުމާ ގުޅިގެން އެ ތަކެއްޗަށް ޑިއުޓީ އާއި ބަދަލުގެ ގޮތުގައި 40 މިލިއަން ރުފިޔާ ދައްކަން ސިނގިރޭޓުގެ ވެރިފަރާތަށް އެންގުމުގެ އިތުރުން އަމިއްލަ ގޭގޭގައި ބޮންޑެޑް ވެއާހައުސްތައް ހިންގޭ ގޮތަށް އޮތް އޮތުން ވެސް ހޯމް މިނިސްޓަރީން ވަނީ ބަދަލުކޮށްފަ އެވެ.

ސިނގިރޭޓު ގެއްލުނު މައްސަލަ ފުލުހުން ގެންދަނީ ތަހުގީގު ވެސް ކުރަމުންނެވެ.