ދުންފަތުގެ މާސްޓާޕްލޭނެއް ހަދަން ރައީސް ޑރ. މުހައްމަދު މުއިއްޒު ދެއްވި ސުންގަޑި ހަމަވި ފަހުން ދެ މަސްދުވަސް ފާއިތުވިއިރު ވެސް އެ މާސްޓާޕްލޭނެއް ނުހެދުނެވެ.

ދުންފަތުގެ މާސްޓާޕްލޭނެއް ހަދަން ރައީސް އެންގެވީ އޮކްޓޯބަރު 16، 2024، ގަ އެވެ. އެ މާސްޓާޕްލޭން ހެދުމަށްފަހު ވަޒީރުންގެ މަޖިލީހަށް ހުށަހަޅަން ދިން ސުންގަޑިއަކީ އޮކްޓޯބަރު 27، 2024، އެވެ.

ނަމަވެސް މި ނޫހަށް އެނގިފައިވާ ގޮތުގައި މާސްޓާޕްލޭން ހެދުމުގެ މަސައްކަތް ފެށީ ވެސް ސުންގަޑި ހަމަވިފަހުން ޑިސެމްބަރު، 2024، ގެ ތެރޭގަ އެވެ. އެ މަސައްކަތް ކުރަނީ ސަރުކާރުގެ ބައެއް އިދާރާތަކުގެ އިތުރުން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާ ގުޅިގެންނެވެ.

ދުންފަތުގެ މާސްޓާޕްލޭނެއް ހަދަން ރައީސް މުއިއްޒު އެންގެވީ ދުންފަތާ ގުޅޭ ބޮޑެތި ނިންމުންތަކެއް ނިންމެވުމަށްފަހެވެ. އެގޮތުން ސިނގިރޭޓަށް ނަގާ ޓެކްސް ބޮޑު ކުރުމާއި ވޭޕް މަނާ ކުރުން ހިމެނެ އެވެ. އަދި، ރޯލިން ޓޮބޭކޯ އާއި ރޯލިން ޓޮބޭކޯ ހަދަން ބޭނުން ކުރާ ކަރުދާސް ވެސް ކުއްލި ގޮތަކަށް ޑިސެމްބަރު މަހު ތެރޭ މަނާ ކަމަށް ވަނީ ކަނޑައަޅައިފަ އެވެ.

ދުންފަތުގެ މާސްޓާޕްލޭނުގައި، ދުންފަތާ ދެކޮޅަށް މަސައްކަތް ކުރާ މީހުން ފާހަގަ ކުރުމަށާއި ދުންފަތް ބޭނުން ނުކުރާ ރަށްރަށް ފާހަގަ ކުރުމަށާއި އެފަދަ ރަށްރަށަށް މާލީ އެހީތެރިކަން ފޯރުކޮށްދެވޭނެ ގޮތްތައް ހިމަނަން ވަނީ ނިންމައިފަ އެވެ.