ވަގު ފޯމުތަކެއް ފުރައިގެން ވެރިކަން ކުރާ ޕީއެންސީއަށް މީހުން ވައްދާފައިވާ ކަމަށް ބުނާ މައްސަލައާ ގުޅިގެން ހުރި ކަންބޮޑުވުންތައް އިލެކްޝަންސް ކޮމިޝަނާ ހިއްސާކޮށް ޕީއެންސީން ހުށަހަޅާފައިވާ ފޯމުތައް ޕްރޮސެސް ކުރުން ހުއްޓައިލުމަށްފަހު ހުރިހާ ފޯމެއް އަލުން ބަލައިދިނުމަށް އިދިކޮޅު އެމްޑީޕީން އެދިއްޖެ އެވެ.

ޕީއެންސީގެ ފޯމުތަކާ ގުޅިގެން ހުރި ކަންބޮޑުވުންތައް ހިއްސާ ކުރުމަށް އެމްޑީޕީގެ ގައުމީ މަޖިލިސް މެންބަރުންނާއި ބައެއް މަޖިލިސް މެންބަރުން ހިމެނޭހެން އެ ޕާޓީގެ ޓީމެއް އިލެކްޝަންސް ކޮމިޝަނަށް ދިޔައީ މިއަދު މެންދުރުފަހު 1:00 ގަ އެވެ.

އިލެކްޝަންސް ކޮމިޝަނުގެ މެންބަރުންނާ ބައްދަލު ކުރެއްވުމަށްފަހު މީޑިއާތަކާ ވާހަކަދައްކަވަމުން އެމްޑީޕީގެ ތަރުޖަމާނު، އަނަސް އަބްދުއްސައްތާރު ވިދާޅުވީ ޕީއެންސީން ހުށަހަޅާފައިވާ ފޯމުތައް ޕްރޮސެސް ކުރުން ހުއްޓައިލުމަށް އިލެކްޝަނުގައި އެދިފައިވާނެ ކަމަށެވެ.

"އަޅުގަނޑުމެންނާ އެކީގައި ބައިވެރިވި މި ޕާޓީގެ [އެމްޑީޕީގެ] ގައުމީ މަޖިލިސް މެންބަރުން މި އެދުނީ ޕީއެންސީން އެ ހުށަހަޅާފައި ހުރި ފޯމުތައް ޕްރޮސެސް ކުރުން ހުއްޓާލާފައި ހަމަ އަލުން އެ ހުރިހާ ފޯމެއް ވަކިވަކިން ބެއްލެވުމަށް، އިނގޭތޯ؟،" އަނަސް ވިދާޅުވި އެވެ.

އޭނާ ވިދާޅުވީ ޕާޓީތަކަށް މީހުން ވެއްދުމުގައި އަމަލު ކުރާ ގޮތެއްގެ ސަބަބުން އިލެކްޝަންސް ކޮމިޝަނަށް ގާނޫނާ ގަވާއިދުގެ ތެރެއިން ފިޔަވަޅު ވެސް އެޅެން އޮންނަ ކަމަށެވެ. އެހެންކަމުން ޕާޓީތަކަށް މީހުން ވެއްދުމުގައި ވަރަށް ބޮޑަށް ސަމާލުވާންޖެހޭ ކަމަށް އަނަސް ވިދާޅުވި އެވެ.

އެމްޑީޕީގެ ގައުމީ މަޖިލީހުގެ ހަތަރު މެންބަރެއްގެ ނަމުގައި ވެސް ވަގު ފޯމުތަކެއް ޕީއެންސީން ފުރާފައިވާ ކަމަށާއި އެމްޑީޕީގެ އިތުރުން އެއްވެސް ޕާޓީއަކަށް ނިސްބަތް ނުވާ ރައްޔިތުންތަކެއްގެ ނަމުގައި ވެސް ޕީއެންސީއަށް ވަގު ފޯމު ފުރާފައިވާކަން ފާހަގަކުރެވިފައިވާ ކަމަށް އަނަސް ވިދާޅުވި އެވެ.

ޕާޓީތަކަށް މެންބަރުން އިތުރު ކުރަން ޖެހޭނީ ދައުލަތުގެ ވަސީލަތްތައް ބޭނުން ކޮށްގެން ނޫން ކަމަށާއި އެކަން ކުރަން ޖެހޭނީ ޕާޓީގެ ސިޔާސަތުތައް ވިއްކައިގެން ތާއީދު ހޯދައިގެން ކަމަށް ވެސް އަނަސް ވިދާޅުވި އެވެ.

"އެއްގޮތަކަށް ވެސް ސަރުކާރުގެ، ދައުލަތުގެ ވަސީލަތްތައް ބޭނުން ކުރެވިގެން ނުވާނެ، މެންބަރުޝިޕް ޑްރައިވް ޖައްސައި ޕާޓީއަށް މެންބަރުން އިތުރު ކުރަންވާނީ ޕާޓީގެ ސިޔާސަތުތައް ވިއްކައިގެން، ޕާޓީއަށް ތާއީދު ހޯދަން މަސައްކަތް ކޮށްގެން، އެއްވެސް ކަމެއް ނުކޮށް ތިބެ ސަރުކާރުގެ އޮފީސްތަކުގައި ތިބެގެން، ހޭލާ ތިބެގެން މިހެން ވަގު ފޯމު އެކި މީހުންގެ ނަމުގައި ފުރައިގެން އެކަން ކުރެވިގެން ނުވާނެ،" އަނަސް ވިދާޅުވި އެވެ.

ވަގު ފޯމު ފުރައިގެން ޕީއެންސީއަށް މެންބަރުންތަކެއް ވައްދާފައިވާ ކަމަށް ބުނާ މައްސަލައިގައި އެމްޑީޕީން ކަންބޮޑުވުން ފާޅު ކޮށްފައި މިވަނީ އެފަދަ މައްސަލަތަކެއް އިލެކްޝަނުން ބަލަމުންދާ ދަނޑިވަޅެއްގަ އެވެ.

މިދިޔަ ބުރާސްފަތި ދުވަހު އެކަމާ ގުޅޭގޮތުން "އަދަދު" ނޫހުން ކުރި ސުވާލެއްގެ ޖަވާބުގައި އިލެކްޝަންސް ކޮމިޝަނުގެ އޮފިޝަލެއް ބުނީ މީސްމީހުންގެ ނަމުގައި ޕީއެންސީން ވަގު ފޯމު ފުރާފައިވާ ކަމަށް ބުނެ ބައެއް އަމިއްލަ މީހުން އިލެކްޝަނަށް މައްސަލަ ހުށަހަޅާފައިވާ ކަމަށެވެ. ނަމަވެސް އެ މައްސަލަތަކާ ގުޅިގެން އަދި އިލެކްޝަނުން ވަކި ގޮތެއް ނުނިންމަ އެވެ.

މީހުންގެ އައިޑީކާޑުގެ މައުލޫމާތު ހޯދައި ވަގު ފޯމު ފުރައިގެން ޕީއެންސީއަށް މީހުން ވައްދާފައިވާ ކަމަށް ބުނެ ގިނަ ބަޔަކު އަންނަނީ ސޯޝަލްމީޑިއާގައި ވެސް ކަންބޮޑުވުން ފާޅު ކުރަމުންނެވެ.

ކަންބޮޑުވުން ފާޅުކުރާ ބައެއް މީހުން ގެންދަނީ އެމީހުންގެ ނަން މަތީގައި ފުރާފައި ހުރި ފޯމުތަކުގެ ސޮފްޓު ކޮޕީ ވެސް ސޯޝަލް މީޑިއާއަށް އަޕްލޯޑު ކުރަމުންނެވެ. އޭގެތެރޭގައި ކުރިން ސަރުކާރުގެ އިސް މަގާމުތައް ފުރުއްވާފައި ތިއްބެވި ބޭފުޅުން ވެސް ހިމެނިވަޑައިގަންނަވަ އެވެ.

ވަގު ފޯމު ފުރައިގެން ޕީއެންސީއަށް މީހުން ވެއްދި ކަމަށް ކުރާ ތުހުމަތުތަކާ ގުޅިގެން ޕީއެންސީން މިހައިތަނަށް ރަސްމީކޮށް އެއްވެސް އެއްޗެއް ނުބުނެ އެވެ.

ޕީއެންސީން މަސައްކަތް ކުރީ މިދިޔަ އަހަރު ނިމުމުގެ ކުރިން އެ ޕާޓީގެ ދަފުތަރަށް 100،000 މެންބަރުން ހަމަ ކުރުމަށެވެ. އެ އަމާޒަށް ވާސިލުވުމަށްޓަކައި ސަރުކާރުގެ އެކި ވުޒާރާތަކުގެ މުވައްޒަފުން ޓީމު ހަދައިގެން ވެސް އުޅުނެވެ. ނަމަވެސް އަހަރު ނިމުނުއިރު، އެ ޕާޓީއަށް އެ އަދަދަށް މެންބަރުން ހަމަ ކުރެވުނުކަން ރަސްމީ އެއްވެސް ލިޔެކިޔުމަކުން ނުފެނެ އެވެ.