ކަނޑުގެ ދިރާސާތައް ކުރާ ޗައިނާގެ އުޅަނދެއް ރާއްޖެ އައިސްފައިނުވާ ކަމަށް އިންޑިއާގެ ވިއޮން ނޫހަށް ދެއްވި އިންޓަވިއުއެއްގައި ފޮރިން މިނިސްޓަރު އަބްދުﷲ ހަލީލު ވިދާޅުވި ނަމަވެސް އެއީ ހަގީގަތެއް ނޫނެވެ.

މިދިޔަ ހޮނިހިރު ދުވަހު ވިއޮން އަށް ދެއްވި އިންޓަވިއުގައި، ވިއޮން ނޫހުގެ ސިދާންތު ސިބާލް އެދުނީ، ރާއްޖެއަށް ދަތުރު ކުރި ޗައިނާގެ ރިސާޗް އުޅަނދާ ބެހޭ ގޮތުން ކޮމެންޓެއް ކުރެއްވުމަށެވެ. ނަމަވެސް ހަލީލު ވިދާޅުވީ ޗައިނާގެ ރިސާޗް އުޅަނދެއް ރާއްޖެ އައިސްފައިނުވާ ކަމަށެވެ.

"[ޗައިނާގެ ރިސާޗް އުޅަނދެއް] ރާއްޖެއަކަށް ނާދޭ. އެފަދަ އުޅަނދެއް އައިސްފައެއް ނުވޭ،" އެ ސުވާލަށް ކުރު ޖަވާބެއް ދެއްވަމުން ހަލީލު ވިދާޅުވި އެވެ.

ޗައިނާގެ ރިސާޗް އުޅަނދު ޝިއެން ޔެން ހޮން-3، ޖެނުއަރީ 21، 2024، އިން ފެށިގެން ގާތްގަނޑަކަށް އެއް މަސް ދުވަހު ރާއްޖެ ސަރަހައްދުގައި ހަރަކާތްތެރިވި އެވެ. އެންމެ ފުރަތަމަ އެ ބޯޓު އުޅުނީ ރާއްޖޭގެ ބޯޑަރު ސަރަހައްދުގަ އެވެ. ބައެއް ފަހަރު ރާއްޖެ ބޯޑަރު އެތެރެއަށް ވެސް ވަނެވެ.

އޭގެ ފަހުން ފެބްރުއަރީ 22، 2024، ގައި ރާއްޖެއަށް އައިސް ތިލަފުށި ކައިރި ބަނދަރު ކުރި އެވެ. އެ ބޯޓު އަންނަ ވާހަކަ ސަރުކާރުން ވެސް އޮތީ ރަސްމީކޮށް ބުނެފަ އެވެ. ސަރުކާރުން ބުނީ އެ ބޯޓު އަންނަނީ ފަޅުވެރިން ބަދަލު ކުރުމަށް ކަމަށެވެ.

"ޗައިނާ ސަރުކާރުން ވަނީ އެ އުޅަނދުގައި ތިބި ކުރޫއިން ބަދަލު ކުރުމާއި ސްޓޮކު އައު ކުރުމަށް ރާއްޖޭގައި ބަނދަރުކޮށްދިނުމުގެ ހުއްދައަކަށް ދިވެހި ސަރުކާރުގައި ރަސްމީކޮށް އެދިފައި. އެ އުޅަނދުން ރާއްޖޭގައި އެއްވެސް ދިރާސާއެއް ނުކުރާނެ،" ޖެނުއަރީ 23، 2024، ގައި ފޮރިން މިނިސްޓްރީން ބުންޏެވެ.

ތިލަފުށީ ކައިރި ހައެއްކަ ދުވަހު އޮތުމަށްފަހު ބޯޓު ފުރައިގެންދިޔައީކީ ނޫނެވެ. ބޯޓު އަނެއްކާ ވެސް ގޮސް އޮތީ ރާއްޖޭގެ އީއީޒެޑުގެ ރޮނގުގަ އެވެ. ރާއްޖެ ސަރަހައްދު ދޫކޮށް އެ ބޯޓު ދިޔައީ މާ ފަހުންނެވެ.

ޝިއެން ޔެން ހޮން-3: ޗައިނާގެ އެންމެ ޒަމާނީ ރިސާޗް އުޅަނދު

ބާވަތް: ޖެނެރަލް ސާވޭ ވެސެލް

ބޮޑުމިން: 4،800 ޓަނު

ދިގުމިން: 99.6 މީޓަރު

އިފުތިތާހު ކުރީ: މާޗް 26، 2016

ބޯޓު ޑިޒައިން ކުރީ: 708 ވަނަ ރިސާޗް އިންސްޓިޓިއުޓް، ޗައިނާ ސްޓޭޓް ޝިޕް ބިލްޑިން ކޯޕަރޭޝަން

ބޯޓު ހެދި ކުންފުނި: ވޫޗޭންޖް ޝިޕް ބިލްޑިން، ޗައިނާ

ޝިއެން ޔެން ހޮން މެނޭޖް ކުރާ ޗައިނާގެ އޯޝަނަގްރަފީ އިންސްޓިޓިއުޓުން ބުނާ ގޮތުގައި އެއީ ކަނޑުގެ ދިރާސާ ކުރުމަށް އެ ގައުމުން ހެދި އެންމެ ޒަމާނީ އެއް އުޅަނދެވެ. ޗައިނާއިން ބުނަނީ އެއީ ކޮމްޕްރެހެންސިވް ރިސާޗް އުޅަނދެއް ކަމަށެވެ. މާނައަކީ އެއް މަސައްކަތަށް ވުރެ ގިނަ މަސައްކަތް އެ އުޅަނދުން ކުރެވޭނެ ކަމަށެވެ.

ޗައިނާއިން ބުނާ ގޮތުގައި ބޯޓުގެ އެންޑިއުރަންސަކީ 15،000 ނޯޓިކަލް މޭލެވެ. މާނައަކީ އިތުރު އެހީއަކާއި ނުލައި، ބޯޓުގެ މަގުސަދާއި މަސައްކަތް ކުރަމުން ހުއްޓުމެއް ނެތި 15،000 ނޯޓިކަލް މޭލަށް ދަތުރު ކުރެވޭނެ ކަމަށެވެ.

އެ ބޯޓަކީ ޑީޕީ-1 ޑައިނެމިކް ޕޮޒިޝަނިންއާއެކު ތައާރަފު ކުރި ބޯޓެކެވެ. މާނައަކީ އޮޔާއި ވައި ގަދަވި ނަމަވެސް ބޯޓު މަޑުކޮށްގެން އޮންނަ ތަނެއްގައި ނުގުޑި އޮތުމުގެ ގާބިލްކަން ލިބިފައިވުމެވެ. އޭގެ އިތުރުން ބޯޓުގައި ހުންނަ ތްރަސްޓާސް ބޭނުންކޮށްގެން އޮތް ތަނުގައި އޮވެ، 360 ޑިގްރީއަށް ބޯޓު އަނބުރާލުމުގެ ގާބިލްކަން ވެސް ލިބިފައިވެ އެވެ.

ބޯޓުގެ ދިރާސާއަށް ބޭނުން ކުރާ ސާމާނު މޫދަށް ބާލައި ހަދަނީ އިލެކްޓްރިކް ވިންޗުތަކަކުންނެވެ. އޭގެ ސަބަބުން މަސައްކަތް ކުރަން އިންތިހާ ފަސޭހަ ކަމަށްވެ އެވެ. ބޯޓުގައި ގެންގުޅެނީ ޗައިނާއިން އުފައްދާފައިވާ ރިސާޗު އިކުއިޕްމަންޓުތަކާއި ބޭރުން އިމްޕޯޓުކޮށްފައިވާ ބައެއް އިކުއިޕްމަންޓުތަކެވެ.

މާޗް، 2016، ގައި އެ އުޅަނދު އިފުތިތާހު ކުރި ފަހުން ބޮޑު 20 ސައިންޓިފިކް ދިރާސާ ކޮށްފައިވާ ޗައިނާއިން ބުނެ އެވެ. ދަތުރުގައި 1000 އަށް ވުރެ ގިނަ ދުވަސް ބޯޓު ހޭދަކޮށްފައިވާއިރު 370،000 ކިލޯމީޓަރަށް މިހާތަނަށް ބޯޓު ދުއްވިއްޖެ އެވެ.