ބޯކޮށް ވާރޭވެހި މާލެ އާއި ރަށްރަށުގައި ފެންބޮޑުވާ މައްސަލައަށް ދާއިމީ ހައްލެއް ހޯދުމަށްޓަކައި ރަށުގެ މެދުން ފެށިގެން ގޮސް މޫދަށް ފެންފަހި ވާގޮތަށް މަގުތައް ކަޗޯރު ކުރަންޖެހޭ ކަމަށް ފަންނީ ތަޖުރިބާކާރު، ޑރ. ހަސަން ހަމީދު ވިދާޅުވެއްޖެ އެވެ.

އެކި ކަންކަމާމެދު ހަސަން ދެކިވަޑައިގަންނަވާ ގޮތް ހިއްސާ ކުރައްވައި ލިޔުންތައް ޝާއިއު ކުރައްވާ އޭނާގެ އަމިއްލަ ވެބްސައިޓުގައި ޝާއިއު ކުރައްވާފައިވާ ލިޔުމެއްގައި ވިދާޅުވެފައި ވަނީ އޭނާ ދެކިވަޑައިގަންނަވާ ގޮތުގައި ވެރިރަށް، މާލޭގައި ފެންބޮޑުވާ މައްސަލައަށް އޮތް އެންމެ ހަރަދު ކުޑަ ހައްލަކީ ކަރަންޓުގެ އެއްވެސް އާލާތެއް ބޭނުން ނުކޮށް ބިމަށް ދަމާ ބާރު ނުވަތަ ގްރެވިޓީ ބާރުގައި މާލެ ތެރެއަށް ވެހޭ ފެން އޭގެ އަމިއްލަ ޒާތުގައި ތިރިދިމާލަށް ދަތުރުކޮށް މޫދަށް ދާގޮތަށް މަގުތައް ތަރައްގީ ކުރުމެވެ.

އެކަން ކުރުމަށް އޭނާ ހުށަހަޅުއްވާފައި ވަނީ މީގެ އެތައް އަހަރެއް ކުރީން ވެސް މަގުތައް ތަރައްގީ ކުރުމުގައި ގެންގުޅުނު ވަރަށް އަސާސީ ހައްލެކެވެ.

ހަސަން ދެކެވަޑައިގަންނަވާ ގޮތުގައި ފެން ބޮޑުވުމަށް އޮތް ދާއިމީ ހައްލަކީ ކޮންމެ ރަށެއްގެ ވެސް މެދުން ފެށިގެން ހުރަހަށް، ގޮނޑުދޮށާ ދިމާލަށް ދެވެން އޮންނަ މަގުތައް ފެންފަހިވާ ގޮތަށް ހަދައި ރަށުގެ މެދަށް އުސްކޮށް، ރަށަށް ވެހޭ ފެން އޭގެ ޒާތުގައި ގޮނޑުދޮށަށް ޖަމާވާ ގޮތަށް މަގުތައް ކަޗޯރު ކުރުމެވެ.

އެގޮތަށް ހަދާއިރު ބަލަންޖެހޭ މިންގަނޑުތަކެއް ވެސް އޭނާގެ ލިޔުމުގައި ފާހަގަކޮށްފައިވެ އެވެ. އެގޮތުން މަގުތައް ކަޗޯރު ކުރާއިރު މަދުވެގެން 4000 ފޫޓުން އެއް ފޫޓަށް ފެން ފަހިވާ ގޮތަށް، ނުވަތަ އެއަށްވުރެ ކަތި ބޮޑު ކުރެވޭނަމަ އެ މިންވަރަށް ފެން ފަހި ކުރަން އޭނާ ހުށަހަޅުއްވާފައިވެ އެވެ.

އެ މިންގަނޑަކީ މީގެ 2000 އަހަރު ކުރީން ރޫމީން، އެމީހުންގެ ސަހަރުތަކަށް ފެން ގެންދަން ބޭނުން ކުރި އުސް ކާނުތަކުގައި ހުރި ކަޗޯރުމިނެވެ.

އެ މިންގަނޑަށް ރާއްޖޭގެ މަގުތައް ކަޗޯރު ކުރަން އޭނާ ހުށަހަޅުއްވާފައި ވަނީ ރާއްޖޭގެ ރަށްރަށުގެ ފަސްގަނޑު ހަމަކަމުން، ބޮޑުކޮށް ކަޗޯރު ކުރަން އުނދަގޫވުމާއި އެކަމަށް ހިނގާ ހަރަދު ބޮޑު ވާނެތީ އެެވެ.