ފަލަސްތީނުގެ ގާޒާއިން ފަލަސްތީނު މީހުންގެ ނަސްލު ނައްތައިލަން އިޒްރޭލުން ހިންގާ ޖަރީމާތައް އިތުރުކޮށް، ފާއިތުވި 24 ގަޑިއިރުގެ ތެރޭގައި 70 އަށް ވުރެ ގިނަ މީހުން ގަތުލުކޮށްފި އެވެ.

ގާޒާގައި އޮންނަ ހަމާސް ސަރުކާރުގެ އޮފިޝަލުންނާ ހަވާލާދީ އަލްޖަޒީރާ އިން ބުނި ގޮތުގައި މިދިޔަ 24 ގަޑިއިރުގެ ތެރޭގައި އިޒްރޭލުން ގާޒާއަށް 34 ފަހަރު ބޮން އެޅުމުގެ ސަބަބުން މަރުވި 71 މީހުންނަކީ ވެސް އާންމުންނެވެ. އޭގެ ތެރެއިން ފަސް މީހުންނަކީ ނުސައިރަތު ރެފިއުޖީ ކޭމްޕަށް ބޮން އެޅުމުން މަރުވި މީހުންނެވެ.

އިންސާނީ ހައްގުތަަކަށް މަސައްކަތްކުރާ އަލް ހައްގު ޖަމާއަތުން އަލްޖަޒީރާއަށް ބުނެފައިވާ ގޮތުގައި ގާޒާގެ އާންމުން ތިބޭ ތަންތަނުން އެހެން ތަންތަނަށް ދާން އިޒްރޭލު ސިފައިން އަންގާ އެންގުންތަކުގެ ބޭނުމަކީ ގާޒާގެ ރައްޔިތުންނަށް ހަމަލާ އަމާޒުކުރަން މަގުފަހިކުރުމުގެ ގޮތުން ކުރާ ކަމެކެވެ. އެގޮތުން ވަކި ތަނަކީ ރައްކާތެރި ތަނެއް ކަމަށް ބުނެ އެތަނަކަށް ދާން އެންގުމަށް ފަހު އިޒްރޭލުން ހަމަލާ ދެނީ އެތަނަކަށެވެ.

އިޒްރޭލުން ގާޒާގައި ހިންގާ އަނެއް ޖަރީމާއަކީ ހޮސްޕިޓަލްތައް ހަލާކުކޮށް، ޑޮކްޓަރުންނާއި ސިއްހީ އެހެނިހެން މަސައްކަތްތެރިން ރަހީނުކުރުމެވެ. ޔުނައިޓެޑް ނޭޝަންސް ޔޫއެން އިން އެ ޖަރީމާތައް ކުށްވެރިކޮށް ދާދި ފަހުން ވެސް ބަޔާނެއް ނެރުނެވެ.

ގާޒާއިން ފަލަސްތީނު މީހުންގެ ނަސްލު ނައްތައިލަން ހިންގާ ނަސްލުހޭދުގައި އަހަރެއްހާ ދުވަހުގެ ތެރޭގައި މަރުވި ކަމަށް ރެކޯޑްކުރެވިފައިވާ މީހުންގެ އަދަދަކީ 45،581 އެވެ. ޒަހަމްވި ކަމަށް ރެކޯޑްކުރެވިފައިވާ މީހުންގެ އަދަަދަކީ 108،438 އެވެ.

އިޒްރޭލުން ބޮން އަޅައި ބިމާ ހަމަކޮށްލި އިމާރާތްތަކުގެ ދަށުވެ، ވީނުވީއެއް ނޭނގުނު މީހުންނާއި ރަހީނުކޮށްގެން ކޭމްޕުތަކަށް ގެންދިޔަ މީހުންގެ އަދަދެއް ނޭނގެ އެވެ. އޭގެ ތެރެއިން މަރުވި މީހުންނާ އެކު މަރުވި މީހުންގެ އަދަދު ރަސްމީ ހިސާބުތަކަށް ވުރެ އެތައް ގުނައެއް އިތުރުވާނެ ކަމަށް ބެލެވެ އެވެ.