ލިވަޕޫލް (ޑިސެމްބަރު 31) - ޖެނުއަރީ ޓްރާންސްފާ މާކެޓްގެ ތެރޭ ލިވަޕޫލަށް ކުޅޭ އިނގިރޭސި ފުލްބެކް، ޓްރެންޓް އަލެކްސަންޑަ-އާނޯލްޑް، ސްޕެއިނުގެ ގަދަބާރު ރެއާލް މެޑްރިޑަށް ވިއްކާލެވެން ނެތް ކަމަށް ލިވަޕޫލުން އަންގައިފި އެވެ.

މި ސީޒަނުގެ ނިޔަލަށް ލިވަޕޫލްގެ ކޮންޓްރެކްޓްގައި ހުރި އާނޯލްޑަށް އެ ކްލަބުން އެއްބަސްވުން އާ ކުރަން ހުށަހެޅި ހުރިހާ ޕްރޮޕޯސަލަކަށް މިހާތަަނަށް އޭނާ ވަނީ ފުރަގަސްދީފަ އެވެ. ޖެނުއަރީ 1 ވަނަ ދުވަހުން ފެށިގެން އާނޯލްޑް އަށް އިނގިރޭސި ނޫން ކްލަބްތަކާ އެކު، ޓްރާންސްފާގެ މަޝްވަރާތައް ކުރެވޭނެ އެވެ. އެއީ، ޖުލައި، 1 ވަނަ ދުވަހު ހިލޭ ޓްރާންސްފާއެއްގައި އެ ކްލަބަކަށް ބަދަލުވާ ގޮތަށް ޕްރީ އެގްރީމެންޓެއް ހެދުމަށެވެ.

އެކަމަކު، ރެއާލަށް ދިމާވެފައިވާ އަނިޔާގެ މައްސަލަތަކުގެ ސަބަބުން އެ ކްލަބުން ވަނީ އާނޯލްޑް ގަންނަން ޖެނުއަރީ މަހު ބިޑެއް ކުރަން ލިވަޕޫލަށް މަޝްވަރާ އަށް ހުށަހަޅައިފަ އެވެ. ރިޕޯޓްތައް ބުނާގޮތުން، ލިވަޕޫލުން އަދިވެސް މަސައްކަތްކުރަނީ އާނޯލްްޑްގެ އެއްބަސްވުން އާ ކުރެވޭތޯ އެވެ. އެ ގޮތުން، ސީޒަން ނިމުމުން ހިލޭ ޓްރާންސްފާއެއްގައި އޭނާ ގެއްލުމުގެ ބިރު އޮތަސް، އެ ރިސްކު ނަގައިގެން އާނޯލްޑް ލައްވައި އާ ކޮންޓްރެކްޓެއް ހެދޭތޯ ލިވަޕޫލުން އަންނަނީ މަސައްކަތް ކުރަމުންނެވެ.

ސްޕެއިނުގެ ބައެއް މީޑިއާ ރިޕޯޓްތައް ބުނާގޮތުން، އާނޯލްޑް ވަނީ ރެއާލާ ގުޅެން ބޭނުންވާ ކަމަށް ލިވަޕޫލަށް އަންގައިފަ އެވެ. އެކަމަކު، އެ ވާހަކަތައް ލިވަޕޫލުން ދޮގުކުރާއިރު، އެންމެ ފަހުން، ލީގުގައި ވެސްޓް ހޭމް ޔުނައިޓެޑް ކޮޅަށް ލަނޑު ޖެހުމަށް ފަހު، އުފާފާޅުކުރިއިރު، އާނޯލްޑް ވަނީ ސްޕެއިނުގެ މީޑިއާ ރިޕޯޓްތަކަށް ރައްދެއް ދީފަ އެވެ.

ލިވަޕޫލްގެ ކޯޗުކަމުގައި ޔާގަން ކްލޮޕް ހޭދަކުރި ނުވަ އަހަރު ތެރޭ، އޭނާ ވަނީ އެކެޑަމީގެ ގިނަ ކުޅުންތެރިންތަކެއް ފުރަތަމަ ޓީމާ ހަމައަށް ގެނެސްފަ އެވެ. އޭގެ ތެރެއިން، އެންމެ ބޮޑު ތަފާތެއް ދެއްކި ކުޅުންތެރިއަކީ، އާނޯލްޑް އެވެ. މިހާތަނަށް ލިވަޕޫލަށް ކުޅެދިން 333 މެޗުން އާނޯލްޑް ވަނީ އެ ޓީމަށް 20 ގޯލު ޖަހައިދީ 85 ލަނޑު ޖަހަން ފުރުސަތު ތަނަވަސްކޮށްދީފަ އެވެ.