މެޑްރިޑް (ޑިސެމްބަރު 30) - ރެއާލް މެޑްރިޑަށް ކުޅެމުން އަންނަ ބްރެޒިލްގެ ފޯވާޑް ވިނީޝިއުސް ޖޫނިއާ އަށް އަންނަ އަހަރު އާ އެއްބަސްވުމެއް ދޭން ރެއާލުން ތައްޔާރުވަމުން އަންނަ ކަމަށާއި ކޮންޓްރެކްޓް އާ ނުކުރެވޭނަމަ ބޮޑު އަގުގައި ވިނީޝިއުސް ވިއްކާލާނެ ކަމަށް ރިޕޯޓްތައް ބުނެފި އެވެ.

މިދިޔަ ސީޒަނުތަކުގައި ވިނީޝިއުސް ވަނީ ރެއާލްއާ އެކު މޮޅު ކުޅުމެއް ދައްކައިފަ އެވެ. އަދި މި ސީޒަނުގައި ވެސް ވިނީޝިއުސް ވަނީ ރެއާލަށް ކުޅެދިން 21 މެޗުގައި 14 ގޯލު ޖަހައި، 10 ގޯލް ޖެހުމަށް އެހީތެރިވެދީފަ އެވެ.

ވިނީޝިއުސް ވަނީ ރެއާލަށް ކުޅެދިން 285 މެޗުގައި 97 ގޯލު ޖަހާ 83 ގޯލު ޖަހަން އެހީތެރިވެދީފަ އެވެ.

ރެއާލުން ވިނީޝިއުސްއާ އެކު ހަދާފައިވާ އެއްބަސްވުން 2027 ވަނަ އަހަރު ޖޫންގެ ނިޔަލަށް އެވެ. ވިނީޝިއުސް އަށް މިހާރު ވެސް ޔޫރަޕްގެ ގިނަ ކްލަބްތަކަކުން އަންނަނީ ފާރަލަމުންނެވެ. ޔޫރަޕްގެ އިތުރުން ސައުދީގެ ކްލަބުތަކުން ވެސް ވިނީޝިއުސް އަށް ބޮޑު އަގު އަންނަނީ ހުށަހަޅަމުންނެވެ.

ސްޕެއިންގެ މީޑިއާ ރިޕޯޓްތައް ބުނާ ގޮތުން ރެއާލުން އަންނަނީ ވިނީޝިއުސްއާ އެކު ހަދާފައިވާ އެއްބަސްވުން އާކުރުމަށް މަސައްކަތް ކުރަމުންނެވެ. އަދި ވިނީޝިއުސް ވެސް ހުރީ ރެއާލްއާ އެކު ހަދާފައިވާ އެއްބަސްވުން އާކުރުމަށް ތައްޔާރަށް ކަމަށް ރިޕޯޓްތައް ބުނެ އެވެ.

ރިޕޯޓްތައް ބުނާ ގޮތުން ރެއާލުން ވިނީޝިއުސް އަށް ދޭން ތައްޔާރުވަމުން އަންނަނީ ކީލިއަން އެމްބާޕޭ އަށް ދެމުން އަންނަ މުސާރައާ ދާދި އެއްވަރެއްގެ މުސާރަ އެވެ. އަދި ރެއާލުން ވިނީޝިއުސް ވިއްކާނަމަ ވިއްކާނެ އެންމެ ކުޑަ އަގެއްގެ ގޮތުގައި ކަނޑައަޅާފައި ވަނީ 300 މިލިއަން ޑޮލަރު އެވެ.

ވިނީޝިއުސް ވަނީ ރެއާލްއާ އެކު ސްޕެނިޝް ލީގުގެ އިތުރުން ޗެމްޕިއަންސް ލީގު ދެ ފަހަރު ކާމިޔާބު ކޮށްފަ އެވެ.

މި ވަގުތަށް ބަލާއިރު، ވިނީޝިއުސް ހޯދަން އެންމެ ބޮޑަށް މަސައްކަތް ކުރަނީ ސައުދީ އަރަބިއްޔާގެ އަލް ހިލާލް އިންނެވެ.