ބާސެލޯނާ (ޑިސެމްބަރު 31) - ބާސެލޯނާ އިން މި ސީޒަނުގައި ގަތް ސްޕެއިނުގެ މިޑްފީލްޑަރު ޑެނީ އޮލްމޯގެ ރަޖިސްޓްރޭޝަނާ ގުޅޭ ގޮތުން ދެ ވަނަ ފަހަރަށް ހުށަހެޅި ޕްރޮޕޯސަލް ވެސް ކޯޓުން ބޭރުކޮށްލައިފި އެވެ.

ބާސެލޯނާ އިން ވަނީ އޮލްމޯ ގަންނަން ލައިޕްޒިގަށް 65 މިިލިއަން ޑޮލަރު ޖުމްލަ އެކު ދައްކަން ނިންމައިފަ އެވެ. އޮލްމޯގެ ޑީލްގެ ފައިސާތައް ދެ އަހަރަށް ބަހާލައިގެން ދައްކަން، ބާސެލޯނާ އިން އެއްބަސްވީ އެ ކްލަބްގެ މާލީ ހާލަތަށް ބަލައިފަ އެވެ. އެކަމަކު، ސްޕެނިޝް ލަލީގާގެ ގަވާއިދުގެ ތެރެއިން އޮލްމޯ ރަޖިސްޓްރީ ކުރަން ބާސެލޯނާ އަށް އެންމެ ފުރަތަމަ ދުވަހުން ވެސް މައްސަލަ ދިމާވި އެވެ. އެއީ، އޭނާގެ ކޮންޓްރެކްޓް ހިނގާ ހަ އަހަރުގެ މުއްދަދަށް އެކަށޭނެ މިންވަރަށް ބާސެލޯނާގެ މާލީ ހާލަތު މި ވަގުތު ތަން ނުދޭތީ އެވެ. އެކަމަކު، ލަލީގާ އިން ވަނީ ކުޅުންތެރިއާގެ ހައްގަށް ވިސްނުމަށް ފަހު، ރަޖިސްޓްރޭޝަން ނިންމަން، އޮގަސްޓުން ފެށިގެން މި މަހުގެ ނިޔަލަށް ފުރުސަތު ދީފަ އެެވެ.

އެކަމަކު، ހަތަރު ދުވަސް ތެރޭ ދެ ވަަނަ ފަހަރަށް ސްޕެއިނުގެ ދެ ކޯޓަަކަށް އޮލްމޯގެ މި ރަޖިސްޓްރީ ކަންކަން ހައްލުކުރަން ހުށަހެޅުމުން ވެސް ކޯޓުން ވަނީ ބޭރުކޮށްލައިފަ އެވެ. ކޯޓުގެ މި ނިންމުމަށް ސްޕެނިޝް ލީގު ހިންގާ ލަލީގާ އިން ވަނީ ތާއީދުކޮށްފަ އެވެ.

މިހާރު އޮތްގޮތުން، އޮލްމޯގެ ރަޖިސްޓްރޭޝަން މައްސަލައިގައި ބާސެލޯނާ އަށް ހައްލެއް ނުލިބި ދިގުލައިފިނަމަ، މާދަމާ އިން ފެށިގެން ހިލޭ ޓްރާންސްފާއެއްގައި އޭނާ އަށް ކްލަބް ބަދަލުކުރުމުގެ އިހުތިޔާރު އޮންނާނެ އެވެ. މެންޗެސްޓާ ސިޓީން އަންނަނީ އޮލްމޯ އަށް ޝައުގުވެރިކަން ފާޅުކުރަމުންނެވެ.

ކޯޓުން ބާސެލޯނާއާ ދެކޮޅަށް ނިންމައިފިނަމަ، ޕްލޭން ބީއެއްގެ ގޮތުގައި އޮތީ، ބާސެލޯނާގެ ސްޓޭޑިއަމްގެ ވީއައިޕީ ބޮކްސް ޕްރައިވަޓައިޒް އުސޫލުން ކުރިއަށް ގެންދަން ބަޔަކަށް ވިއްކާލުމެވެ. އެ ގޮތަށް ނިންމަން ބާސެލޯނާގެ ރައީސް ޖޮއާން ލަޕޯޓާ، އެ ކްލަބް ބޯޑަށް ހުށަހަޅާނެ ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ. އެ ގޮތުން، ހަތަރު އަހަރަށް ވީއައިޕީ ބޮކްސް ވިއްކާލައިގެން، 100 މިލިއަން ޑޮލަރަށް ވުރެ އިތުރު އާމްދަނީއެއް ހޯދަން ވަނީ އަމާޒުހިފައިފަ އެވެ.