ބާސެލޯނާ (ޑިސެމްބަރު 28) - ބާސެލޯނާ އަށް ކުޅެމުން އަންނަ ޑެނީ އޮލްމޯ އެ ކްލަބްގައި ހިމެނުމަށް ބާސެލޯނާއިން ޕްރިކޯޝަނަރީ ރެޖިސްޓްރޭޝަނަށް ކުރި އެޕީލް ކޯޓުން ބޭރުކޮށްލައިފި އެވެ.

ބާސެލޯނާ އިން ވަނީ އޮލްމޯ ގަންނަން ލައިޕްޒިގަށް 65 މިިލިއަން ޑޮލަރު ޖުމްލަ އެކު ދައްކަން ނިންމައިފަ އެވެ. އޮލްމޯގެ ޑީލްގެ ފައިސާތައް ދެ އަހަރަށް ބަހާލައިގެން ދައްކަން، ބާސެލޯނާ އިން އެއްބަސްވީ އެ ކްލަބްގެ މާލީ ހާލަތަށް ބަލައިފަ އެވެ.

ބާސެލޯނާއިން އެޕީލްކުރި މައްސަލަ ކޯޓުން ބޭރުކޮށްލުމާ އެކު 1 ޖެނުއަރީ އިން ފެށިގެން ބާސެލޯނާ އަށް އޮލްމޯ އަށް ނުކުޅެވުމުގެ ބިރު އެބައޮތެވެ.

ސްޕެނިޝް ލީގުގެ މުސާރައިގެ ގަވައިދަށް ބާސެލޯނާގެ މާލީ ހާލަތު ދަށްވެފައި އޮތުމުން އޮލްމޯ މިހާތަނަށް އެ ކްލަބްގެ ކުޅުންތެރިއެއްގެ ގޮތުގައި، ފުރިހަމަ އަށް ރަޖިސްޓަރީ ކުރެވޭ ގޮތް ވަނީ ނުވެފަ އެވެ.

ކޯޓުން ނިންމި ނިންމުމަށް ސްޕެނިޝް ލީގުން ވަނީ މަރުހަބާ ކިޔައިފަ އެވެ.

"ސްޕެނިޝް ލީގުގެ ނިންމުން ރަނގަޅުކަން ހާމަވެއްޖެ. އޮލްމޯ އަށް ޖޫން 30, 2025 ގެ ކުރިން ބާސާގެ ސްކޮޑުގައި ނުހިމެނޭނެ. އެއީ ސްޕެނިޝް ލީގުގެ ވޭޖް ރިސްޓްރިކްޝަން އޮތް ގޮތުން އެކަން ވާން ނެތީމަ" ސްޕެނިޝް ލީގުން ވަނީ ބުނެފަ އެވެ.

ސްޕެއިންގެ މީޑިއާ ރިޕޯޓްތައް ބުނާ ގޮތުން ބާސެލޯނާ އިން ވަނީ މި މައްސަލަ މެޖިސްޓްރޭޓް ކޯޓެއްގައި އިސްތިއުނާފު ކޮށްފަ އެވެ. އަދި އިސްތިއުނާފްގެ އަޑުއެހުން ކުރިއަށް ދާނީ އަންނަ ހޯމަ ދުވަހު އެވެ.

ކޯޓުން ބާސެލޯނާއާ ދެކޮޅަށް ނިންމައިފިނަމަ، ޕްލޭން ބީއެއްގެ ގޮތުގައި އޮތީ، ބާސެލޯނާގެ ސްޓޭޑިއަމްގެ ވީއައިޕީ ބޮކްސް ޕްރައިވަޓައިޒް އުސޫލުން ކުރިއަށް ގެންދަން ބަޔަކަށް ވިއްކާލުމެވެ. އެ ގޮތަށް ނިންމަން ބާސެލޯނާގެ ރައީސް ޖޮއާން ލަޕޯޓާ، އެ ކްލަބް ބޯޑަށް ހުށަހަޅާނެ ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ. އެ ގޮތުން، ހަތަރު އަހަރަށް ވީއައިޕީ ބޮކްސް ވިއްކާލައިގެން، 100 މިލިއަން ޑޮލަރަށް ވުރެ އިތުރު އާމްދަނީއެއް ހޯދަން ވަނީ އަމާޒުހިފައިފަ އެވެ.