ރާއްޖޭގެ އެއް އާއިލާއަކަށް ނިސްބަތްވާ 40 މީހަކު އެކުގައި އުމްރާގެ އަޅުކަން އަދާކުރަން ގޮސްފި އެވެ.

އުމްރާގެ އަޅުކަން އަދާކުރާ ދިވެހިންގެ އަދަދު ފާހަގަކޮށްލެވޭ ވަރަކަށް އިތުރުވެފައިވާ މި ދުވަސްވަރު، އެ އާއިލާއިން ސައުދީއަށް ދިޔަކަމަށް ބުނީ އެ ގައުމުގައި ހުންނަ ދިވެހި އެމްބަސީންނެވެ.

މި އާއިލާއިން ދިވެހި އެމްބަސީއަށް ވަނީ ޒިޔާރަތްކޮށްފަ އެވެ. މި ޒިޔާރަތުގައި ސައުދީއަށް ދިވެހި ސަރުކާރުން ކަނޑައަޅާފައި ހުންނަވާ ސަފީރު އަހުމަދު ސަރީރު އާއި އެމްބަސީގެ އިސްވެރިން އެ އާއިލާއާ ބައްދަލުކުރެއްވި އެވެ.

މި މަހު ރާއްޖެއިން 6،373 އަށް ވުރެ ގިނަ މީހުން އުމްރާގެ އަޅުކަން އަދާ ކުރުމަށް މައްކާއަށް ދިޔަ ކަމަށް އިސްލާމިކް މިނިސްޓްރީން މިދިޔަ ހަފުތާ ބުނެފި އެވެ.

ޑިސެމްބަރު މަހު އުމްރާގެ އަޅުކަމަށް އެންމެ ގިނައިން މީހުން ގެންދިޔައީ ހައްޖު ކޯޕަރޭޝަނުންނެވެ. އެގޮތުން އެ ގްރޫޕުން ވަނީ 830 އަށްވުރެ ގިނަ މީހުން ގެންގޮސްފަ އެވެ.

ސްކޫލުތައް ބަންދުވާ ދުވަސްވަރާ ދިމާވާތީ، އުމްރާގެ އަޅުކަން އަދާ ކުރުމަށް އާންމު ގޮތެއްގައި ޑިސެމްބަރު މަހު ރާއްޖެއިން ގިނަ ބަޔަކު ދެ އެވެ. ނަމަވެސް މި ފަހަރު އުމްރާއަށް ދިޔަ މީހުންގެ އަދަދު ވަނީ ވަރަށް ބޮޑަށް އިތުރުވެފަ އެވެ.