މި ފެށޭ އާ އަހަރުގެ ފުރަތަމަ ފަސް ދުވަހު ރާއްޖެއަށް ކުރަމުންދާ ވިއްސާރައިގެ ބާރު ގަދަވާނެ ކަމަށް މެޓު އޮފީހުން ބުނެފި އެވެ.

އެ އިދާރާއިން ނެރުނު ބަޔާނެއްގައި ބުނީ މޫސުން ގޯސްވާނީ ސްރީ ލަންކާގެ އިރު ދެކުނުގައި އުފެދިފައިވާ ކޮޅިގަނޑާއި، އެ ކޮޅިގަނޑާއި ގުޅިފައިވާ ގުޅިފައިވާ ލޯ ޕްރެޝާ ޓްރަފުގެ ސަބަބުން ކަމަށެވެ.

ޖެނުއަރީ 5، އާ ހަމައަށް ރާއްޖޭގެ ބޮޑު ބަޔަކަށް ގުގުރުމާއެކު ބޯކޮށް ވާރޭ ވެހި ވައިގަދަވުމުގެ ސަބަބުން ކަނޑުތައް ގަދަވާނެ ކަމަށް މެޓުން ވަނީ ލަފާކޮށްފަ އެވެ. ބައެއް ރަށްތަކަށް އުދަ އަރާނެ ކަމަށް ވެސް މޫސުމާ ބެހޭ އިދާރާއިން ވަނީ ލަފާކޮށްފަ އެވެ.

މެޓުން ލަފާކުރާ ގޮތުގައި ގަޑިއަކު 15 މޭލާއި 25 މޭލާ ދެމެދުގެ ބާރުމިނެއްގައި ވައި ޖެހޭނެ އެވެ. އަދި ވިލާގަނޑުގައި 50 މޭލަަށް ވައި ބާރުވާނެ ކަމަށް ވަނީ އަންދާޒާކޮށްފަ އެވެ.

ހުރިހާ އެންމެން ވެސް، އަދި ވަކިން ހާއްސަކޮށް ކަނޑު ދަތުރުކުރާ މީހުން މޫސުމާ ގުޅޭގޮތުން ނެރޭ މައުލުމާތުތަކަށް ސަމާލުވުމަށް މެޓުން ވަނީ އެދިފަ އެވެ.

މިވަގުތު ވެސް ހއ. އަތޮޅުން ފެށިގެން ކ. އަތޮޅާ ހަމައަށް އޮތީ ހުދު ސަމާލު ނެރެފަ އެވެ.