ދައުލަތުގެ ވިޔަފާރި ކުންފުނިތަކުގެ ތެރެއިން އެންމެ މުއްސަނދި އަދި އެންމެ ބޮޑު ފައިދާއެއް ލިބޭ ކުންފުނިތަކުގެ ލިސްޓުގެ އެއް ވަނައިގައި އޮތީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އެވެ. އެ ކުންފުނީގެ އެންމެ އަގު ބޮޑު ހަރުމުދަލަކީ އެތައް މިލިއަން ޑޮލަރެއް ހަރަދުކޮށްގެން ހިއްކާފައި ހުރި ބިންތަކެވެ. ހުޅުމާލޭގައި ހުރި ހުރިހާ ބިންތަކެއްގެ މިލްކުވެރިޔަކީ އެޗްޑީސީ އެވެ.

އެޗްޑީސީއަކީ, ބިން މަދު، ބޯހިޔާވަހިކަން ތަދު މި ގައުމުގައި އެންމެ ބޮޑު ޒިންމާއެއް މަތިކުރެވިފައި އޮތް ކުންފުންޏެވެ. އެ ކުންފުނިން ކުރާ ހުރިހާ މަސައްކަތެއްމެ ގޮސް ގުޅިލާމެހެނީ ރައްޔިތުންނާ އެވެ. މިހެންކަމުން އެ ކުންފުނިން ކުރާ ހުރިހާ ކަމެއް ނަޒާހާތްތެރިކަމާއެކީ، ދެ ފުށް ފެންނަ ގޮތަށް، ހާމަކަން ބޮޑުކޮށް ކުރަން ޖެހެ އެވެ. އެތައް ހާސް ރައްޔިތުންގެ މަސްލަހަތު އެ ހުރިހާ ކަމެއްގައި ހިމެނޭތީ އެވެ.

ކަން މިހެން ހުރިއިރު، އެ ކުންފުންޏާ ގުޅުވާ މިއަދު މި އިވޭ އަޑުތަކަކީ އިވެން ވާނެ އަޑުތަކެއް ނޫނެވެ. ގޯތިން ވައްކަމެވެ. ފްލެޓުން ވައްކަމެވެ. ބިންތަކުން ވައްކަމެވެ. ވަޒީފާއިން ވައްކަމެވެ. މުދަލާއި ހިދުމަތް ހޯދުމުން ވައްކަމެވެ. ހަދާ އެއްބަސްވުންތަކުން ވައްކަމެވެ. މި ހުރިހާ ކަމަކުން ވެރިންގެ ޖީބަށް ކަޓެވެ. މުޅި ކުންފުނި ކޮރަޕްޝަނުގެ ތެރޭގައި ހިންގަމުންދާ ކަމުގެ ތުހުމަތުތަކެވެ.

ފަޒުލްގެ އާރުކާޓީގެ ދަށުން އެތައް ޖަރީމާއެއް، ހުރިހާ ދިމާލަކުން ޖީބަށް ފައިސާ

އެޗްޑީސީގައި މި ހުރިހާ ކަމެއް ގޯހުންގޯހަށް ދިޔައިރު، އެ ކުންފުނީގައި އެންމެ އިސްކޮށް ހުންނެވީ މީގެ ދެ ދުވަހެއް ކުރިން މަގާމުން އިސްތިއުފާ ދެއްވި މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ. އޭނާގެ މައްޗަށް ބައިވަރު ތުހުމަތު ކުރެވޭއިރު، ވަގު ގޯތިތަކުގެ މައްސަލަ ފެންމަތިވެ، އާންމުންގެ ރުޅިގަނޑު ފަޅައިގެން ދިޔުމާ ހަމައަށް އޭނާ ހުންނެވީ މަގާމުގެ ފުރިހަމަ އާރާއިބާރުގަ އެވެ.

ފަޒުލް ހިންގި ކަމަށް ތުހުމަތުކުރެވޭ ކަންކަން ކުރި ކަމަށް އެންމެ ބޮޑަށް ބާރު ލިބެނީ އެޗްޑީސީގެ ޗެއާޕާސަންގެ މަގާމުން ވަކިކުރި އަހުމަދު ޒުހޫރު ފޮނުއްވި ސިޓީއެކެވެ. ރައީސް ޑރ. މުހައްމަދު މުއިއްޒުއަށް އެޑްރެސްކޮށް ފޮނުއްވި މި ސިޓީގައި އެޗްޑީސީގެ ތެރޭގައި ފަޒުލްގެ ސީދާ ބައިވެރިވުމާއެކީ އެތައް ޖަރީމާއެއް ހިންގަމުން ދިޔަ ކަމަށް ޒުހޫރު ތުހުމަތުކުރައްވާފައިވެ އެވެ.

ޒުހޫރުގެ ސިޓީގައި ފާހަގަކުރި ކަންކަމުގެ ތެރޭގައި އަމިއްލަ މަސްލަހަތު ހިމެނޭ ކަންކަމުގައި "ކޮންފްލިކްޓް އޮފް އިންޓްރެސްޓް" ބޯޑަށް ޑިކްލެއާނުކުރުމާއި އަނބިކަނބަލުންނަށް ހާއްސަ އުސޫލަކުން ބިމެއް ވިއްކުމާއި ވިނަރެސްގެ ނުވިކި ހުރި ފްލެޓުތައް ވިއްކުމުގައި ފައިސާ ނެގުމުގެ އިތުރުން ވިޔަފާރިވެރިންގެ ކުލި ފަސްކޮށްދޭން ފައިސާ ނެގުމާއި ބޯޑާ މަޝްވަރާކޮށް ގޮތް ނިންމުން ހިޔާގެ ލިފްޓުތައް ހަރުކުރުމާއި އެހެން މަޝްރޫއުތަކެއް ވެސް ބޮޑު އަގުގައި ދިނުން ހިމެނެ އެވެ.

އެޗްޑީސީން ހިންގަމުން ދިޔަ ހުރިހާ ކަމެއްގައި ވެސް ފަޒުލްގެ ބައިވެރިވުން އޮތް ކަމަށް ތުހުމަތުކުރެވެ އެވެ. މިހާތަނަށް މައުލޫމާތު ލިބިފައިވާ ގޮތުގައި ފަޒުލް މިކަންކަން ކުރަމުން ގެންދިޔައީ ކުންފުނީގެ މުވައްޒަފުންތަކެއް ބައިވެރިކޮށްގެން، އޭނާގެ "އިނާ ސާކަލް" އެއްގެ ބޭނުންކޮށްގެންނެވެ. މިކަންކަމުގައި ކުންފުނީގެ ބޯޑަށް ބަސް ނުބުނެވޭ ވަރަށް ބާރުތައް މުށުތެރެއަށް ލައްވައިގެން ހުރި ކަމަށް ވެސް ތުހުމަތުކުރެވެ އެވެ.

ރައީސްއަށް އެނގޭ ކަމަށްވީ ޔާމީނަށް އެމްއެމްޕީއާރުސީ ވައްކަން އެނގުނު ގޮތަށް

ކުރީގެ ޗެއާޕާސަން މި ތުހުމަތުތައް ކުރެއްވުމުގެ ކުރިން ވެސް މިއީ ތިލަވެފައި ހުރި މައުލޫމާތެވެ. ތުންތުންމަތިން ދެކެވެމުން އައިސް މުޅި ރަށުތެރޭގައި އަޑުއަރާފައި ހުރި ކަންކަމެވެ. އެކި ގޮތްގޮތުން އެކި މަސްދަރުތަކުން ލިބުނު މައުލޫމާތުގެ އަލީގައި "އަދަދު" އިން ވާނީ އެ ހަބަރުތައް ޖަހާފަ އެވެ. އެކަމަކު ސަރުކާރަކަށް ދައުލަތުގެ އިދާރާއަކަށް މިއިން އެއްވެސް ވާހަކައެއް އިވުނު ކަމަކަށް ނުވި އެވެ.

ކަހާތަން ހިރުވާލީ ވެސް ސޯޝަލް މީޑިއާ އާއި ނޫސްތަކުގައި މި ހުރިހާ ހަބަރެއް ޖަހައި، ހުރިހާ ލިޔެކިޔުމެއް ހާމަވެ، ބޭޒާރު ވާނެ ވަރަކަށް ބޭޒާރުވީ ފަހުންނެވެ. ހަނދާނަށް އަންނަނީ މިފަހުން މި ރާއްޖޭގައި ހިނގައިދިޔަ އެންމެ ބޮޑު ކޮރަޕްޝަން ކަމުގައިވާ އެމްއެމްޕީއާރުސީ ހިޔާނާތުގެ ކަންކަން އޭރުގެ ރައީސް އަބްދުﷲ ޔާމީނަށް އެނގިވަޑައިގެންނެވި ގޮތެވެ. އެއީ ވެސް ރަށު އެންމެނަށް އެނގޭ ބޮޑު ސިއްރެކެވެ. ނަމަވެސް ސަރުކާރާއި އިދާރާތަކަށް އެއްވެސް ކަމެއް ރޭކާލީ ހުރިހާ ކަމެއްވެ ނިމުނުފަހުންނެވެ.

ރައީސް މުއިއްޒުއަށް ވެސް ފަޒުލް ގޯސްތަކެއް ހެއްދެވިކަން އެނގިވަޑައިގެންނެވި ކަމަށްވީ މި ބިދާއިންނެވެ. ޒުހޫރުގެ ސިޓީ ރައީސް އޮފީހުން ބަލައިގަނެ، ސީދާ ރައީސްގެ ނަންބަރަށް ވަޓްސްއެޕްއިން އޭނާ ފޮނުއްވި ނަމަވެސް ރައީސްއަށް އެ ސިޓީ ވެސް ލިބިވަޑައިގެންނެވި ކަމަކަށް ނުވި އެވެ. ފަޒުލް މި ޖަރީމާތައް ހިންގާކަމުގެ ޝަކުވާ ބޮޑުވެ، އެންޓި ކޮރަޕްޝަން ކޮމިޝަން (އޭސީސީ) އިން މިއިން މައްސަލައެއް ބަލާތޯ ތަކުރާރުކޮށް ސުވާލުކުރިއިރު ވެސް އެއިން މައްސަލައެއް ބަލާ ކަމަކަށް ވެސް ނުވި އެވެ.

ކަންވެ ނިމޭ ފަހުން މައްސަލަތައް ބަލަން ވެއްޖިއްޔާ، މި ރާއްޖޭގައި ރަނގަޅު ވާނެ ކަމެއް ނެތެވެ. ކޮރަޕްޝަނުގެ މޫތައް މުޅި ދައުލަތުގެ ތެރެއަށް ފެތުރިފައިވާއިރު، މިއިން މުލެއް ލުހެލެވޭނީ ކަން ހިނގާ ވަގުތު ކަންކަން ބެލިގެންނެވެ. ނޫނީ ކަމެއް ހިނގާ ވަގުތު ނޫނީ ހިނގަން އުޅޭ ކަމަށް މައުލޫމާތު ލިބޭ ވަގުތު އަވަސް ފިޔަވަޅު އަޅައިގެންނެވެ. ހުރިހާ ކަމެއް ހިނގަމުންދާއިރު ކަމާ ބެހޭ އިދާރާތައް ގަދަ ނިދީގައި ތިބެގެން ހައްލު ވާނެ އެއް ކަމެއް ވެސް ނެތެވެ.

ފުލުހުންނާއި އޭސީސީން ފަޒުލްއާ ގުޅޭ މައްސަލަތަކުގެ ތަހުގީގު މިހާރު އެބަ ކުރެ އެވެ. އެކަމަކު އެކަމަކުން ރައްޔިތުންނަށް ލިބޭ ހިތްހަމަޖެހުމެއް ތަސައްލީއެއް ނެތެވެ. ކަންކަން ރަނގަޅު ވާނެ ކަމަށް ކިތަންމެ އުއްމީދު ކުރި ނަމަވެސް، މި އުއްމީދު ނާއުއްމީދަށް ވަނީ ކަން ހިނގާފައި ހުރި ގޮތުންނާއި ކަންކަން ވަމުންދާ ގޮތުންނެވެ.

އެހެނަސް، ކަންވެ ނިމުނު ފަހުން ވިޔަސް ސަރުކާރުން ފިޔަވަޅުތަކެއް އެޅީތީ ކޮންމެވެސް ވަރެއްގެ އުއްމީދެއް އެބައޮތެވެ. ފަޒުލް އާއި އެޗްޑީސީގެ ވެރިން ގޯހެއް ހަދާފައިވާ ނަމަ ގާނޫނު އަތް އެ މީހުންނާ ހަމައަށް ފޯރަން ރައްޔިތުން ބޭނުންވާލެއް ބޮޑުކަމުންނެވެ.

މިކަމަށް އެޗްޑީސީގެ އާ މެނޭޖުމަންޓުން ވެސް ފަހިކޮށްދޭން ޖެހެ އެވެ. ރައްޔިތުންގެ އިތުބާރު އަލުން އިޔާދަކޮށް، ދައުލަތުގެ އެންމެ ބިޔަ ކުންފުނީގެ މަންޒަރު ސާފުކޮށްގެން ނޫނީ ކުރިއަށް ގޮސްގެން ނުވާނެ އެވެ. ލިޔުން ފެށިއިރު ވެސް ފާހަގަކުރި ފަދައިން އެޗްޑީސީން ކުރަނީ ރައްޔިތުންގެ މަސައްކަތެވެ. އެހެންކަމުން އެންމެ އިސްކަން ދޭން ވާނީ އެ ރައްޔިތުންގެ އިތުބާރު ހޯދައި، ކުންފުނީގެ ތެރެއިން ކޮރަޕްޝަން ނައްތާލުމަށެވެ.