ކޮރަޕްޝަނާއި ހިޔާނާތުގެ ގިނަ މައްސަލަތަކެއް އެ ކުންފުންޏަކާ ގުޅޭގޮތުން ތަހުގީގު ކުރަމުންދާ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުގެ މަގާމަށް މައުރޫފް ޖަމީލު އައްޔަނުކޮށްފި އެވެ.

އެޗްޑީސީގެ އެމްޑީއަކަށް ހުންނެވި އިބްރާހިމް ފަޒުލް ރަޝީދުގެ މައްޗަށް ގިނަ ތުހުމަތުތަކެއް ކުރެވި އެ ކަންކަމާ ގުޅިގެން އަމާޒުވި ޕްރެޝަރާ ގުޅިގެން އޭނާ ވަނީ ރޭގެ ވަގުތެއްގައި އިސްތިއުފާ ދެއްވާފަ އެވެ.

މި ސަރުކާރުން އެކުލަވާލި ހައުސިން ކޮމިޓީގެ މެންބަރަކަށް ވެސް ހުންނެވި މައުރޫފް ޖަމީލު އެ މަގާމަށް އައްޔަނުކުރީ މިއަދުގެ ވަގުތެއްގަ އެވެ.

ހުޅުލޭ ފަޅު ހިއްކައި ހުޅުމާލެ ތަރައްގީކުރުމުގެ ޕްރޮޖެކްޓުގައި މައުރޫފް އިސް ދައުރެއް އަދާކުރެއްވި އެވެ. އޭނާއަކީ އާކިޓެކްޓެކެވެ. އަދި, ރާއްޖޭގެ ހިރިގަލުގެ މިސްކިތްތަކާއި ރިސޯޓުތަކުގެ އާކިޓެކްޗާއާ ގުޅޭ ރިސާޗު ވެސް ކުރައްވާ ބޭފުޅެކެވެ.