"އަޅުގަނޑު ފަހުބަސް އެއިން ކޮންމެ ބޭފުޅަކަށް ބުނާނީ،"

މި ވާހަކަ ރައީސް ޑރ. މުހައްމަދު މުއިއްޒު ވިދާޅުވީ ރިޔާސީ އިންތިހާބުގެ ކާމިޔާބީ ފާހަގަ ކުރަން އޮކްޓޯބަރު 2، 2023 ގައި ސޯޝަލް ސެންޓަރުގައި ބޭއްވި ޖަލްސާގައި، ސަރުކާރުގެ ކުންފުނިތައް ހިންގަން ހަވާލުު ކުރާނީ ގާބިލް އެ މަނިކުފާނު ވިދާޅުވާ ގޮތަށް ކަންކުރާނެ ބޭފުޅުންކަން ފާހަގަ ކުރެއްވުމަށް ފަހު އެވެ.

ޕޯޑިއަމްގައި ރައީސް މުއިއްޒު އޭރު ދެއްކެވި ވާހަކަތަކުން ގިނަ ބަޔަކަށް ގަބޫލް ކުރެއްވުނީ ވެރިކަމަށް ވަޑައިގަތުމަށް ފަހު ހިޔާނާތެއް ނެތް، ސާފު ވެރިކަމެއް ފެނިގެންދާނެ ކަމަށެވެ.

ނަހަމަ ނުފޫޒުގެ ކުށް ހިނގަނީ ސިޔާސީ ގޮތުންނާއި މާލީ ގޮތުން މަތީ ދަރަޖަ އަކަށް ދެވިފައިވާ މީހުންގެ މެދުގައިކަން، ވެރިކަމަށް ވަޑައިގަތުމުގެ ކުރިން ވެސް ރައީސް މުއިއްޒަށް އެނގިވަޑައިގަންނަވަ އެވެ. އެކަން އެ މަނިކުފާނު ވަނީ މިދިޔަ އަހަރުގެ ބައިނަލްއަގުވާމީ އެންޓި-ކޮރަޕްޝަން ދުވަހުގެ މުނާސަބަތުގައި ބޭއްވި ޖަލްސާގައި ފާހަގަ ވެސް ކުރައްވައިފަ އެވެ.

"އެހެންކަމުން، މިތަނުގައި ލިބޭ ފިލާވަޅަކީ، ގައުމުގެ އިޖުތިމާޢީ ސިޔާސީ ހަރުގަނޑުން ތިމާއަށް މައްޗަށް އެރުނުވަރަކަށް، އަމާނާތްތެރިކަމާއި ތެދުވެރިކަމުގެ މަގަށް ބަލަން ފަރުވާތެރިވާން ޖެހޭކަން. އަބަދުވެސް އެ މަގުން ހިނގަން ފައިތިލަ ސީދާކުރަންޖެހޭކަން. އިހުލާސްތެރި، ދީންވެރި ހިތެއްގެ ވެރިޔަކަށްވާން ގަދައަޅައި މަސައްކަތް ކުރަންޖެހޭކަން،" ރައީސް މުއިއްޒު ވިދާޅުވި އެވެ.

ސަރުކާރުގެ ކުންފުނިތަކާއި މުއައްސަސާތަކުގައި ވައްކަމާއި ހިޔާނާތައް ތުހުމަތު ކުރެވޭ އެތައް ކަމެއް ފެންމަތި އެބަ އެވެ. އޭގެ ފަހުގެ މިސާލަކީ ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ)ގެ ބޮޑު ވައްކަމެވެ. އެކަމުގައި ހައުސިން މިނިސްޓްރީގެ ބައިވެރިވުން ވެސް އޮތްކަމަށް ބެލެވެ އެވެ.

އެޗްޑީސީގެ މައްސަލަތައް ގޯހުން ގޯހަށް ދާން ފެށުމުން، އޭރު ރައީސް އޮފީހުގެ މިނިސްޓަރަކަށް ހުންނެވި އާދަމް ރަމީޒުގެ ސަމާލު ކަމަށް، ކުންފުނީގެ އޭރުގެ ޗެއާމަން އަހުމަދު ޒުހޫރު ގެންނެވި އެވެ. އާދަމް ރަމީޒު އާއި ރައީސް މުއިއްޒު ގުޅުން އޭރު އޮތް މިންވަރުން އެ ވާހަކަތައް ސީދާ ރައީސްގެ ކަންފަތްޕުޅަށް ގެންދަވާނެ ކަމަށް ގަބޫލު ކުރެވެ އެވެ. އަދި މަޖިލީހުގެ ބައެއް މެންބަރުން ވެސް ގެންދިޔައީ އެ ވާހަކަތައް ދައްކަމުންނެވެ.

ކުންފުނީގެ އުސޫލުތަކާއި ހިލާފަށް އަދި އަމިއްލަ މަސްލަހަތު ފުށޫއަރާ ގޮތަށާއި ހިޔާނާތަށް މަގުފަހިވާ ގޮތަށް ފަޒުލް ކުރަމުންދިޔަ ކަންކަން ކަރުދާހަށް ތިރިކުރުމަށް ފަހު، މި އަހަރުގެ ޖުލައި މަހު ޒުހޫރު ރައީސް މުއިއްޒަށް ސަމާލުކަމަށް އެކަންކަން ފޮނުއްވާފައިވެ އެވެ.

ނަމަވެސް، ފުލުހުން ވެސް، އޭސީސީ ވެސް އެ މައްސަލަތައް ބަލަން ފެށީ، އެޗްޑީސީގެ އެތެރޭގައި ކުނިވަމުން ދިޔަ ހިޔާނާތުގެ މައްސަލަތަކުގެ ވަސް ދުވަސްތާ އެތައް ދުވަހެއް ފަހުން، އެކަންކަން ސޯޝަލް މީޑިއާ އަށް، މިދިޔަ ބުދަ ދުވަހު ބަންޑުންކޮށްލުމުންނެވެ.

އޭރު އޮތީ އެތައް ބިމަކާއި ފްލެޓެއް ވިއްކައިފަ އެވެ.

އެޗްޑީސީގެ މައްސަލަތައް ބަޔާންކޮށް ޒުހޫރު ރައީސް މުއިއްޒަށް ސިޓީއެއް ފޮނުއްވީ ޗެއާމަންގެ މަގާމުން ވަކިކޮށްފައި ހުއްޓައި، މި އަހަރުގެ ޖުލައި މަހު އެވެ. އެ ސިޓީގައި ފަޒުލްގެ މަސްލަހަތު ފުށޫއަރާ އެތައް ކަމެއް ފާހަގަ ކޮށްފައިވެ އެވެ. އޭގެ ތެރޭގައި ފަޒުލްގެ އަނބިކަނބަލުން ޒުލްފީނާ ރަޝީދަށް ބިމެއް ދިން މައްސަލަ ހިމެނެ އެވެ.

ފަސް އަހަރުން ފައިސާ ދައްކާ ގޮތަށް، ހުޅުމާލޭ ބީޗް ފްރޮންޓުން ބިމެއް ދީފި ނަމަ ގަނެވޭނެ ކިތަންމެ ބަޔަކު ތިބޭނެ އެވެ. ނަމަވެސް އެވަރުގެ އަގުބޮޑު ބިމެއް އިންސާފެއް ނެތް ގޮތެއްގައި، ފަޒުލްގެ އަނބިކަނބަލުންނަށް ވިއްކުމުން ވެސް މުއައްސަސާތަކުން އެކަމަށް ދިނީ ކަނު ލޮލެކެވެ. ދެން ފެނުނީ އެކަން މަތިޖެހުމަށް އިތުރު ފަސް މީހަކަށް ވެސް ހަމަ އެ އުސޫލުން ބިން ދިން ތަނެވެ.

މިކަން ހުއްޓުވުނު ނަމަ، ބިންވެރިޔާ ސްކީމުގައި ނެތް ގޯއްޗެއް، އަމިއްލަ ބޭބެއަށް ކަނޑާފައި ނުދޭނެ އެވެ.

ކުންފުނީގެ ހުރިހާ ކޮންޓްރޯލެއް ފަޒުލްގެ އަތަށް ނަންގަވައިގެން، އަމިއްލަ މަސްލަހަތު އޮތް ކުންފުނިތަކަކަށް ބިން ހަމަޖެއްސި ކަމަށް ވެސް ޒުހޫރު ތުހަތުކުރެ އެވެ. އޭގެ ތެރޭގައި މޯލްޑިވް އޮއިލް ކޮމްޕެނީ އާއި ހައިޕާލޫޕު ހިމެނެ އެވެ. އަދި އެހެން ދެ ކުންފުންޏަކަށް ވެސް ބިން ދިނުމުގައި ފަޒުލްގެ މަސްލަހަތު އޮތް ކަމުގެ މައުލޫމާތު ލިބިފައިވާ ކަމަށް ޒުހޫރު ވިދާޅުވެ އެވެ.

"މިއީ އަމިއްލަ މަސްލަހަތު ހުރެ ޑިކެލެއާ ނުކުރުމުން ބަލަންޖެހޭ ކަންތައްކަމަށް އަޅުގަނޑަށް އައިސްފައިވާ ޝަކުވާތަކެވެ. ޝަކުވާތައް ބެލުމަށް މާހައުލެއް ނެތިގެން ބެލޭނެ މާހައުލެއް އުފެއްދުމަށްޓަކައި ކޮމިޓީއެއް ވެސް އެކުލެވުނަ ނުދިންކަންވެސް ފާހަގަކުރަމެވެ،" ރައީސް މުއިއްޒަށް ޒުހޫރު ފޮނުއްވި ސިޓީގައިވެ އެވެ.

މަސްލަހަތު އެކުލެވޭ ކަމަށް ބެލެވޭ މުއާމަލާތްތަކުގެ އިތުރުން، ޒުހޫރުގެ ސިޓީގައި "ޝައްކު އުފެދޭ އެހެނިހެން ކަންތައްތައް" ގޮތުގައި ގިނަ ކަންތައްތަކެއް ޒުހޫރު ފާހަގަކޮށްފައިވެ އެވެ. ނަމަވެސް އެއިން އެއްވެސް ކަމެއް ބަލައި ފިޔަވަޅު އަޅާފައިވާކަން އެޗްޑީސީން، އަދި ސަރުކާރުން ހާމަކޮށްފައެއް ނުވެ އެވެ.

އެފަދަ އެންމެ ބޮޑު އެއް ތުހުމަތަކީ ލަގްޒަރީ ހައުސިން ޕްރޮޖެކްޓު ހިންގަން އެޗްޑީސީގެ މިހާރުގެ މެނޭޖުމެންޓުން ހަވާލުކުރި ބައެެއް ކުންފުނިތަކުން މާލީ މަންފާ ހޯދާފައިވާ ވާހަކަ އެވެ.

އެކަމުގެ މައުލޫމާތު އެނގޭ ބައެއް މީހުން ބުނީ ބައެއް ކުންފުނިތަކުން "މިލިއަން ޑޮލަރުގެ ކަޓު ނެގި" ކަމުގެ ވާހަކަތައް އަޑުއިވިފައިވާ ކަމަށެވެ. ކަންކަން ސާފުވާނީ ތަހުގީގު ކުރުމުންނެވެ. އެކަމެއް ކޮށްފައެއް ނެތެވެ.

ރައްޔިތުންގެ މަޖިލީހުގެ އިންތިހާބު ބޯމަތީގައި އޮތްވައި، އެޗްޑީސީގެ ތެރެއިން ގިނަ އަދަދެއްގެ ފައިސާ ބޭރުކޮށްފައިވާ ކަަމަށް ޒުހޫރުގެ ސިޓީން އެނގެ އެވެ. ފަޒުލް މަގާމާ ހަވާލުވިއިރު، އެޗްޑީސީގައި 100 މިލިއަން ޑޮލަރާއި 1 ބިލިއަން ރުފިޔާ ހުރި ކަމަށް ގިނަ މަސްދަރުތަކަކުން ކަށަވަރުކޮށް ދިނެވެ.

މަޝްރޫއުތައް ހަވާލުކުރުމަށް ފަހު، ލޯނު ހަމަޖެހުމުގެ ކުރިން އެޑްވާންސް ދޫކޮށްފައިވާ ކަމަށާއި އަގުބޮޑުކޮށް މަޝްރޫއުތައް ހަވާލުކޮށް އެ މަޝްރޫއުގެ އެޑްވާންސް ފައިސާ ވެސް ދޫކޮށްފައިވާ ކަމަށް ބޯޑުގެ ނިންމުންތަކާއި ޒުހޫރުގެ ސިޓީން އެނގެ އެވެ.

"ތަކުރާރުކޮށް ވިޔަފާރިވެރިންގެ ފަރާތުންނާއި ރައްޔިތުންގެ ފަރާތުން އަޑުއިވެނ،ީ އެޗްޑީސީ އިން ކަމެއް ވަނީ ފައިސާ ދޭ މީހާއަށް ކަން މަނިކުފާނުގެ މައުލޫމާތަށްޓަކައި ދަންނަވަމެވެ،" ޒުހޫރުގެ ސިޓީގައިވެ އެވެ.

ފަޒުލްގެ ހިންގުމުގެ ގާބިލް ކަމާއި ބޯޑުގެ ފުރިހަމަ މަޝްވަރާއެއް ނުހޯދާކަން ވެސް ރައީސްގެ ސަމާލުކަމަށް ޖުލައި މަހު އޮތީ ގެނެސްފަ އެވެ.

"ހަގީގަތަކީ ބޯޑު މެމްބަރުންގެ ފަރާތުން ބޭނުންވަނީ އެޖެންޑާ ކުރަން ފޮނުވާ ލިސްޓަށް އާނބަސް ބުނަން ތިބުމެވެ. އެޖެންޑާ ލިސްޓްގެ ތަފްސީލެއ،ް ދިރާސާ ކުރާނެ ވަގުތެއް ޗެއާމަންއަށް ވެސް އަދި ބޯޑު މެމްބަރަކަށް ވެސް ނުލިބެއެވެ. އެމްޑީ ބޭނުންވާ ކަންކަން ބައެއް ބޯޑު މެމްބަރުން ލައްވާ ރައީސް ކުރާކަމެއް ކަމުގައި ފާޅުގައި ބުނުވާ، ޗެއާމަންގެ ބަސް ބުނިޔަ ނުދެއެވެ."

ރައީސް މުއިއްޒުގެ ނަން ބޭނުންކޮށްގެން ކަންކަން ކުރުވާ ވާހަކަ، އެޗްޑީސީގެ ބޮޑު ވައްކަން ފަޅައި އެރުމުގެ ފަސް މަސް ދުވަސްކުރިން ރައީސްގެ ސަމާލު ކަމަށް ގެނެސްފައި އޮތްއިރު، ގޯހުން ގޯހަށް ކަންކަން ދިޔުމުގެ ޒިންމާ އެ މަނިކުފާނު އުފުއްލަވަންޖެހެ އެވެ.

"ރޖގެ ސަމާލުކަމަށް މިކަން މީގެ 6 މަސްކުރިން ގެނެވިފައި ވަނިކޮށް އެއްވެސް ފިޔަވަޅެއް ނާޅުއްވައި ހުންނެވުމަކީ މި ހުރިހައި ކަމަކަށް ސީދާ ގޮތުންނާއި ނުސީދާގޮތުން ރޖ ޒިިންމާވާންޖެހޭނެ ކަމެއް،" އެ ޒިންމާ ރައީސް މުއިއްޒު ނަންގަވަންޖެހޭ ކަމަށް ރައްޔިތުންގެ މަޖިލީހުގެ ކުރީގެ މެންބަރު އަލީ ހުސެއިން ވެސް ގަބޫލު ކުރައްވަ އެވެ.

ފްލެޓް ދިނުމާއި އަތުލުމާއި ތިލަފުށިން ބިމުގެ މުއްދަތު އިތުރު ކުރުމަށް މިލިއަނުން ފައިސާ ނެގުން ފަދަ އެތައް ޝަކުވާއެއް ރެޔާއިދުވާލު ލިބޭ ކަމާއި ކުންފުނީގެ ކަންކަން މި ވަގުތު ދަނީ ރަނގަޅަށް ނޫން ކަމަށް ވެސް ޒުހޫރު ފާހަގަކުރި އެވެ. އެއީ ގޯސްތަކުގެ ކުޑަ މިންވަރެކެވެ.

ނަމަވެސް، ރައީސް އަކަށް، އަދި ސަރުކާރަކަށް، މިނިވަން މުއައްސަސާއަކަށް ވެސް މި ކަންބޮޑުވުމެއް ނުފެނުނެވެ.

"ކޮރަޕްޝަނަށް ނޫނެކޭ ބުނުމަކީ، ތިމާގެ އަމިއްލަ ނަފުސާ ހަމައިން ފަށަންޖެހޭ ކަމެއް ކަމަށް" ރައީސް މުއިއްޒު ގަބޫލު ކުރައްވާއިރު، މި ސަރުކާރުގައި ހިޔާނާތުގެ ތުހުމަތުތައް އިންތިހާ އަށް ދިޔައިރު، އެ މަނިކުފާނުގެ ފަރާތުން އެ ވިދާޅުވި ބަސްފުޅުގެ މިސާލެއް ފެނިގެންދިޔަތޯ ސުވާލު އުފެދެ އެވެ.

ފަޒުލް އިސްތިއުފާ ދިނުމަކީ ހައްލެއް ނޫނެވެ. އަދި މައްސަލައިގެ ނިމުމަށް އެކަން ވެގެން ނުވާނެ އެވެ. ވެރިން، ވެރިކަމަށް އައުމަށް ފަހު ދައުލަތް ވީދައި ކަމުން މުއައްސަސާތަކަށް ނުހުއްޓުވޭ ނަމަ، ރައްޔިތުން އެކަން ކުރަންޖެހެ އެވެ.