ވިނަރެސްއިން ފްލެޓު ގަތް ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބު އާއި އެހެން ފުލުހުން އެ ފްލެޓު ގަތުމުގައި ގޯހުން ކަމެއް ކޮށްފައިވޭތޯ ބަލަން ފަށައިފި އެވެ.

ފުލުހުންގެ ތަރުޖަމާނު، އެސިސްޓަން ކޮމިޝަނާ އޮފް ޕޮލިސް އަހުމަދު ޝިފާން ވިދާޅުވީ ރަޖުނީ އާ ގުޅޭ ގޮތުން ސޯޝަލް މީޑިއާގައި ދައުރުވަމުންދާ ވާހަކަތަކާއި ގުޅިގެން ފުލުހުން ބަލަންޖެހޭ ކަންކަން ބަލަމުންދާ ކަމަށެވެ.

"ސުޕްރިންޓެންޑެންޑް އޮފް ޕޮލިސް ރަޖުނީ ޝުއިއިބާއި ގުޅޭ ގޮތުން ސޯޝަލް މީޑިއާގައި އާންމުކުރަމުންދާ މަޢުލޫމާތާ ގުޅިގެން ދިވެހި ފުލުހުންގެ ހިދުމަތުން ބަލަންޖެހޭ ކަންކަން ބަލަމުންދާ ވާހަކަ ދަަންނަވަމެވެ،" ޝިފާން އެކްސްގައި ކުރެއްވި ޕޯސްޓުގައި ވިދާޅުވެފައިވެ އެވެ.

ރަޖުނީގެ މައްސަލަ ފެންމަތިވީ، ގޯތި ވައްކަމުގެ ތަހުގީގާ ގުޅޭ މައުލޫމާތު ދޭން ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމަށް ފަހު އެވެ.

"ހަސަން ކުރުސީ" ގެ ނަމުގައި ހިންގާ އެކްސް އެކައުންޓުން އިއްޔެ ލީކުކޮށްލި ވިނަރެސް ލިސްޓުގައި ރަޖުނީގެ އިތުރުން އެހެން ފުލުހުން ވެސް ހިމެނޭކަން އެނގިފައިވެ އެވެ. އެ ފުލުހުން ފްލެޓު ގަތުގައި އުސޫލާ ހިލާފުން ކަމެއް ކޮށްފައިވޭތޯ، ފުލުހުން ބަލަމުންދާ ކަމަށް އަދަދު ނޫހަށް ވަނީ އެނގިފަ އެވެ.

އެޗްޑީސީގެ ކުރީގެ މެނޭޖުމެންޓާއި މިހާރުގެ މެނޭޖުމެންޓުން ބުނެފައިވާ ގޮތުން، ވިނަރެސްއިން ފްލެޓު ދޫކުރަން ކަނޑައެޅި އެންމެންނަށް ފްލެޓު ދޫކޮށް، ބާކީ 123 ފްލެޓެއް ހުއްޓެވެ. އެހެންވެ، އެ ފްލެޓުތައް ވިއްކަން ނޮވެމްބަރު 5، 2023، ގައި ހުޅުވައިލި އެވެ.

މައުލޫމާތު އެނގޭ ބައެއް ފަރާތްތަކުންނާއި އެޗްޑީސީގެ އެތެރޭގެ މަސްދަރުތަކުން ބުނާ ގޮތުން ސިޔާސީ ގޮތުން ބާރުގަދަ ފަރާތްތަކާއި އެފަދަ ފަރާތްތަކާ ގުޅުން އޮތް މީހުންނަށް ވިނަރެސްއިން ފްލެޓު ވިއްކި އެވެ. ބައެއް ފްލެޓުތައް ވިއްކީ ކަޓުގެ ގޮތުގައި އެތައް ލައްކަ ރުފިޔާއެއް ނަގައިގެންކަން ބައެއް މީހުން މި ނޫހަށް ކިޔައި ދީފައިވެ އެވެ.

އެޗްޑީސީއަށް އަމާޒުކޮށް ކޮރަޕްޝަނާއި ހިޔާނާތުގެ ގިނަ މައްސަލަތަކެއް ވަނީ ފެންމަތިވެފަ އެވެ. އޭގެތެރޭގައި ހިމެނެނީ ބިންވެރިޔާ ސްކީމުގެ ދަށުން ކަމަށް ބުނެ އުސޫލުން ބޭރުން ބިންތަކެއް ދިނުމާއި ނުއަގުގައި ސަރުކާރުގެ ވެރިންނާއި މަޖިލިސް މެންބަރުންނަށް ބިން ވިއްކުން އަދި މަޝްރޫއުތަކުގެ ނަމުގައި ގިނަ އަދަދެއްގެ ފައިސާ ދޫކުރުމެވެ.

ގޯތި ވައްކަމުގެ މައްސަލަ ފުލުހުންނާއި އޭސީސީން ދަނީ ބަލަމުންނެވެ.