ދަރިވަރުންގެ އުމުރާ ނުގުޅޭ ވާހަކަ ދައްކައި ދަރިވަރުންތަކެއް ގްރޫމްކުރި ކަމުގެ ތުހުމަތުގައި ސެންޓްރަލް ޕޮލިސްއިން ހައްޔަރުކޮށްފައި ހުރި 29 އަހަރުގެ ދިވެހި ޓީޗަރު، ޝަރުތުތަކެއް ކުރުމަށްފަހު ބަންދުން ދޫކޮށްލައިފި އެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނީ އެ މީހާ ދޫކޮށްލާފައި ވަނީ ބަންދުގެ މުއްދަތު އިތުރު ކުރުމަށް ކޯޓަށް ހާޒިރު ކުރުމުން ކަމަށެވެ. 29 އަހަރުގެ ކުޑަކުދިންތަކެއް ހިމެނޭ މައްސަލައަކަށް ވާތީ އެ ޓީޗަރުގެ ވަނަވަރު ވެސް އަދި އެއީ ކޮން ރަށެއްގެ މީހެއްކަން ވެސް ފުލުހުން ހާމައެއް ނުކުރެ އެވެ.

ނަމަވެސް އެ މީހާ މަސައްކަތް ކުރީ މ، ފ، ދ، ތ، ލ ގެ ތެރެއިން ކޮންމެވެސް އެއް އަތޮޅަކަށް ނިސްބަތްވާ ރަށެއްގެ ސްކޫލްގައި ކަމަށް ފުލުހުން މީގެ ކުރިން ހާމަ ކުރި އެވެ.

ކުދިންތަކެއް ގްރޫމްކުރި މައްސަލައިގައި ކޯޓު އަމުރެއްގެ ދަށުން އެ ޓީޗަރު ހައްޔަރުކުރީ މިދިޔަ އޮކްޓޫބަރު 27، ގަ އެވެ.

އެ މައްސަލަ ތަހުގީގު ކުރުމަށްފަހު އެ ޓީޗަރުގެ މައްޗަށް ދައުވާ ކޮށްދިނުމަށް އެދި މިދިޔަ ނޮވެމްބަރު 25، ގައި ޕީޖީ އޮފީހަށް ފޮނުވާފައިވާ ކަމަށް ވެސް ފުލުހުން ބުންޏެވެ.