ސްރީލަންކާގެ ރައީސް އަނޫރާ ކުމާރާ ޑިސަނަޔަކެ ސެޕްޓެމްބަރު މަހު ވެރިކަމާ ހަވާލުވެވަޑައިގަތުމަށް ފަހު، ގައުމުން ބޭރަށް ކުރައްވާ ފުރަތަމަ ދަތުރުގައި އިންޑިއާއަށް އިއްޔެ ވަޑައިގެންފި އެވެ.

ތިން ދުވަހުގެ މި ދަތުރުގައި އިންޑިއާގެ ބޮޑުވަޒީރު ނަރެންދުރަ މޯދީ އާއި ރައީސް ޑްރޫޕަދީ މުރުމުއާ މިއަދު ބައްދަލު ކުރައްވައި، މަތީ ފެންވަރުގެ މަޝްވަރާތަކެއް ކުރެއްވުމަށް ވަނީ ހަމަޖެހިފަ އެވެ.

އިގުތިސާދީ ދާއިރާއިން އެއްބާރުލުމާއި ވިޔަފާރި އާއި ސަރަހައްދީ ސަލާމަތާބެހޭ ގޮތުން ގުޅުމުގެ ބަދަހިކުރަން ދެ ގައުމުގެ ލީޑަރުން މަޝްވަރާ ކުރައްވާނެ އެވެ. އަދި މި ދާއިރާތަކުން ހަތަރު އެއްބަސްވުންތަކުގައި ސޮއި ކުރާނެ އެވެ. އޭގެ ތެރޭގައި ސައިބާސެކިއުރިޓީއާ ގުޅޭ އެއްބަސްވުމެއް ހިމެނޭ ކަމަށް މީޑިއާތަކުން ރިޕޯޓުކުރެ އެވެ.

ސްރީލަންކާ އާއި އިންޑިއާގެ އިންވެސްޓްމަންޓާއި ވިޔަފާރީގެ ގުޅުން ކުރިއެރުވުމަށް ދިއްލީގައި ބާއްވާ ބައްދަލުވުމެއްގައި އަނޫރާ ބައިވެރިވެވަޑައިގަންނަވާނެ އެވެ.

ރައީސް އަނޫރާގެ ފުރަތަމަ ބައިނަލްއަގްވާމީ މަންޒިލަކަށް އިންޑިއާ ހެދުމަކީ، އެ މަނިކުފާނުގެ ގެންގުޅުއްވާނީ އިންޑިއާ ފަސްޓު ޕޮލިސީ ކަމާއި، އަވައްޓެރި އިންޑިއާއާއެކު ގުޅުން ވަރުގަދަ ކުރާނެ ކަމުގެ ފާލެކެވެ.