ރޯމް (ޑިސެމްބަރު 15) - އިޓާލިއަން ލީގުގައި ރޭ ކަލިއަރީ ކައިރިން 1-0 އިން ކުރިހޯދައި، އެޓަލަންޓާ އިން އެ ކްލަބްގެ ތާރީހުގައި ފުރަތަަމަ ފަހަރަށް ލީގުގައި ޖެހިޖެހިގެން 10 މޮޅު ހަަމަކޮށް ލީގުގެ އެއް ވަނަ މަގާމު ދަމަހައްޓައިފި އެވެ.

ލީގުގެ އެއް ވަނައިގައި އެޓަލަންޓާ އޮތީ 16 މެޗުން 37 ޕޮއިންޓާ އެކު އެވެ. ދެ ވަނައިގައި އޮތް ނަޕޯލީން ވަނީ ރޭ އުދިނޭޒީ ދަނޑުގައި 3-1 އިން މޮޅުވެފަ އެވެ. ނަޕޯލީ އަށް 16 މެޗުން ވަނީ 35 ޕޮއިންޓް ލިބިފަ އެވެ.

އެޓަލަންޓާ އިން ކަލިއަރީ ދަނޑުގައި އެ ޓީމު ބަލިކުރި މެޗުގައި ލަނޑު ޖެހީ މެޗުގެ 66 ވަނަ މިނިޓްގަ އެވެ. މި ގޯލު ކާމިޔާބުކުރީ ނިކޯލޯ ޒަނިއޯލޯ އެވެ.

މި މެޗުގައި އެޓަލަންޓާގެ ފަރާތުން ފެނުނު ކުޅުމާ މެދު ޖުމްލަ ގޮތެއްގައި ބަލާނަމަ ހިތްހަމަނުޖެހޭ ކަމަށް އެ ޓީމުގެ ކޯޗު ޖިއަންޕިއޭރޯ ގަސްޕެރިނީ ވަނީ ބުނެފަ އެވެ. އެކަމަކު، ނަތީޖާ ނެރުމުގައި ޓީމެއްގެ ގޮތުގައި ކުރި މަސައްކަތް ބަލައިގަންނަން ޖެހޭ ކަމަށާއި އެކަމަކު، ލީގުގެ އެއް ވަނައިގައި ކުރިއަށްދާނަަމަ ވަރަށް ގިނަ ކަންކަން ރަނގަޅުކުރަން ޖެހޭ ކަމަށް ގަސްޕެރިނީގެ ވާހަކައިގައި ފާހަގަކުރި އެވެ.

އުދިނޭޒީން ފްލޯރިއަން ތޯވާންގެ ގޯލުން ލީޑުނެގިއިރު، އޭނާ އަތުން ވަނީ ޕެނަލްޓީ ނާކާމިޔާބުވެފަ އެވެ. ނަޕޯލީ ފަހަތުން އަރައި މޮޅުވިއިރު، ލަނޑުތައް ޖެހީ ރޮމެލޫ ލުކާކޫ އާއި އަންޑްރޭ ފްރޭންކް ޒަމްބޯ އަންގީސާ އެވެ. އަނެއް ލަނޑަކީ އުދިނޭޒީގެ ލައުޓާރޯ ޖިއަނެއްޓީ އަތުން ބައިކޮޅަށް ވަން ގޯލެކެވެ.

ޔުވެންޓަސް ވަނީ ރޭ ކުޅުނު މެޗުގައި، އަމިއްލަ ދަނޑުގައި ވެނެޒިއާއާ 2-2 އިން އެއްވަރުވެފަ އެވެ. ޔުވެންޓަސް އިން ފެޑެރީކޯ ގައްޓީގެ ގޯލުން ލީޑުނަގާފައިވަނިކޮށް، ވެނެޒިއާ އިން ނަތީޖާ އަނބުރާލީ ޖޭ އިޑްޒެސް އާއި މިކޭލް އެގީލް އެލާޓްސަން ޖެހި ގޯލުތަކުންނެވެ. ޔުވެންޓަސް ބަލިނުވެ، ސަލާމަތްވީ އިތުރު ވަގުުތުގައި ޑޫސާން ވްލާހޮވިޗް ވައްދާލި ޕެނަލްޓީންނެވެ.

ލީގުގެ ހަ ވަނައިގައި ޔުވެންޓަސް އޮތީ 16 މެޗުން 28 ޕޮއިންޓް ހޯދައިގެންނެވެ.