ހޮންކޮންގައި ކުރިއަށްދާ ޑައިވިން ރިސޯޓް އެންޑް ޓްރެވެލް ޝޯގައި ފުވައްމުލައް ސިޓީއަށް ބެސްޓް ޝާކް ޑައިވިން ޑެސްޓިނޭޝަން އެވޯޑް ލިބިއްޖެ އެވެ.

ފުވައްމުލައް ސިޓީ ކައުންސިލުގެ މޭޔަރު އިސްމާއިލް ރަފީގު "އަދަދު" އަށް ވިދާޅުވީ ބެސްޓް ޝާކް ޑައިވިން ޑެސްޓިނޭޝަން އެވޯޑް ފުވައްމުލަކަށް ލިބުމަކީ ރަށުގެ އިތުރުން ޑައިވިން އިންޑަސްޓްރީއަށް ލިބުނު ބޮޑު ފަހުރެއް ކަމަށެވެ. އަދި މިއީ ފުވައްމުލަކަށް މިފަދަ އެވޯޑެއް ލިބުނު ފުރަތަަމަ ފަހަރު ކަން ވެސް އޭނާ ފާހަަގަކުރެއްވި އެވެ.

"ޓޫރިޒަމް ދާއިރާއިން ޑައިވިންއަށް މިފަދަ ބޮޑު އެވޯޑެއް ލިބުމަކީ ބޮޑު ފަހުރެއް. މިއީ ޑެސްޓިނޭޝަނެއް ގޮތުގައި ފުވައްމުލައް އިސްތިހާރު ކުރަން ލިބުނު ރަނގަޅު ފުރުސަތެއް،" އޭނާ ވިދާޅުވި އެވެ.

މި މަހުގެ 13 އިން 15 އަށް ކުރިއަށްދާ ފެއާގައި ޑެސްޓިނޭޝަނެއް ގޮތަށް ފުވައްމުލައް އިޝްތިހާރު ކުރުމަށް ފުވައްމުލައް ސިޓީ ކައުންސިލުން އަންނަނީ ހަރަކާތްތެރިވަމުންނެވެ.

ފުވައްމުލަކުގައި 25 ގެސްޓްހައުސް އޮޕަރޭޓް ކުރަމުން އަންނައިރު، 11 ވަރަކަށް ޑައިވް ސެންޓަރު އަންނަނީ އޮޕަރޭޓް ކުރަމުންނެވެ. އަދި ކޮންމެ އަހަރަކު 6،000 އެއްހާ ޓޫރިސްޓުން އެ ރަށަށް ޒިޔާރަތްކުރެ އެވެ. މީގެ ތެރޭގައި ގިނައީ ފެމުނު ބަލަން މަޝްހޫރު ސަރަހައްދެއް ކަމުގައިވާ "ޓައިގާ ޒޫ" އަށް އަންނަ ޓޫރިސްޓުންނެވެ.