ސެޓްލަމަންޓު ކޮމިޓީން ބަދަލު ދީފައިވަނީ ގާނޫނުތަކާއި ގަވާއިދުތަކާ ހިލާފަށް ކަމަށް ތުހުމަތުކޮށް އެ މައްސަލަތައް ބެލުމަށް ޖިނާއީ ތަހުގީގެއް ހިންގައި ދައުވާ ކުރެވޭ ވަރަށް ހެކި ލިބިއްޖެނަމަ ދައުވާ ކުރުމަށް ޕްރޮސެކިއުޓާ ޖެނެރަލްއަށް ދެންނެވީ ސިޔާސީ ގޮތުން ބިރުދައްކަން ކަމަށް ހަނިމާދޫ ދާއިރާގެ މަޖިލިސް މެންބަރު އަބްދުލްގަފޫރު މޫސާ މިއަދު ވިދާޅުވެއްޖެ އެވެ.

ކުރީގެ ރައީސް އިބްރާހިމް މުހައްމަދު ސޯލިހު, އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް އަދި މިދިޔަ ސަރުކާރުގައި ރައީސް އޮފީހުގެ މިނިސްޓަރަކަށް ހުރި އަލީ ޝިޔާމްގެ މައްޗަށް ޖިނާއީ ތަހުގީގު ހިންގުމަށް ޕީޖީއަށް ދެންނެވުމަށް މާލިއްޔަތު ކޮމިޓީން ފާސްކުރި ގޮތަށް މިއަދު މަޖިލީހުގެ ތަޅުމުންވެސް ވަނީ ފާސްކޮށްފަ އެވެ.

އެ ރިޕޯޓު ފާސްކުރުމުގެ ކުރިން ބަހުސްކުރައްވަމުން ގަފޫރު ވިދާޅުވީ، ދައުލަތުގެ ފައިސާއަށް ހިޔާނާތްތެރިވެފައިވާނަމަ އެ މައްސަލައެއް ބަލަން ޖެހޭނެ ކަމަށެވެ. ނަމަވެސް މިއީ ސިޔާސީ ކަމެއް ކަމަށް އޭނާ ވިދާޅުވި އެވެ.

"މިއީ ސިޔާސީ މައްސަލައެއް. ސެޓްލްމެންޓު ކޮމިޓީގެ މައްސަލަ ހުށެޅިގެން މިއުޅެނީ ސިޔާސީ ގޮތުން ބިރުދެއްކުމަށްޓަކައި،" ގަފޫރު ވިދާޅުވި އެވެ.

ކުރީގެ ރައީސް ސޯލިހު ސެޓްލެމެންޓު ކޮމިޓީ ހެއްދެވީ ގާނޫނުއަސާސީގެ 15 ވަނަ މާއްދާގެ ދަށުން ރައީސަކަށް ލިބިދޭ ބާރުތަކުގެ ދަށުން ކަަން ފާހަގަކުރައްވާ ގަފޫރު ވިދާޅުވީ އެ ކޮމިޓީ އެކުލަވާލީ މަޖިލީހުން ފާސްކޮށްގެން ކަމަށެވެ.

"ސެޓްލެމެންޓު ކޮމިޓީގެ ހުރިހާ މުއާމަލާތެއް ފާސްކުރުމަށްފަހު ކެބިނެޓަށް ހުށަހަޅައިގެން ހުރިހާ މެންބަރުން ތިއްބަވައިގެން ކެބިނެޓުން ފާސްކޮށްގެން ކުރިކަމެއް ކޮށްފަ އޮންނާނީ،" މިވަގުތު މަޖިލީހުގައި ހުންނެވި އެމްޑީޕީގެ އެންމެ ދުވަސްވީ މެންބަރު ވިދާޅުވި އެވެ.

ރައްޔިތެއް ހައްގެއް ގެއްލިފައިވާނަމަ އެ ހައްގެއް ހޯދައިދިނުމަކީ ގާނޫނުއަސާސީން ވެރިންގެ މައްޗަށް ލާޒިމުކުރާ ކަމެއް ކަމަށާއި ރައީސް ސޯލިހު ބަދަލު ދެއްވީ އެގޮތަށް ކަމަށްވެސް އޭނާ ވިދާޅުވި އެވެ. އޭގެ ބޭރުން ކަމެއް ވާނަމަ އެކަންތައް ބަލާނެހާ ދުވަސް މި ސަރުކާރަށް ލިބިގެންގޮސްފި ކަންވެސް ގަފޫރު ފާހަގަކުރެއްވި އެވެ.

ބަދަލު ދިނުމަށް މިދިޔަ ސަރުކާރުން ހެދި އެއްބަސްވުންތަކާ ގުޅޭ ގޮތުން މާލިއްޔަތު ކޮމިޓީއަށް ހުށަހެޅި މައްސަލަ ދިރާސާކޮށް ނިންމައި މަޖިލީހުގެ މިއަދުގެ ޖަލްސާގައި އެ ރިޕޯޓު ވަނީ ފާސްކޮށްފަ އެވެ. މި ރިޕޯޓު ފާސްކުރީ 55 މެންބަރުންގެ ވޯޓާއެކު އެވެ. ރިޕޯޓު ފާސްކުރުމާ ދެކޮޅަށް 11 މެންބަރުން ވޯޓު ދެއްވި އެވެ.

ގާނޫނުން މަތިކޮށްފައިވާ ޒިންމާތަކާ ހިލާފަށް ދައުލަތުގެ ފައިސާ އާއި މުދާ ސީދާ ގޮތުންނާއި ނުސީދާ ގޮތުން ހައްގުނޫން ފަރާތްތަކަށް ދީފައިވާ ކަމަށް މާލިއްޔަތު ކޮމިޓީން ވަނީ ތުހުމަތުކޮށްފަ އެވެ. އޭގެ އިތުރުން, ރަސްމީ ވާޖިބު އަދާކުރުމުގައި ދައުލަތަށް ލިބެން އޮތް ފައިދާއަކަށް އުނިކަން ލިބޭ ގޮތަށް އަމަލުކޮށްފައިވާ ކަމަށް ވެސް ވަނީ ތުހަމުތުކޮށްފަ އެވެ.

ސޯލިހާއި އަލީ ޝިޔާމްގެ މައްޗަށް ތަހުގީގު ހިންގަން އެދުނީ އިކޮނޮމިކް ކައުންސިލް ކޯޗެއާ ކަމަށް ވާތީ ކަމަށް ރިޕޯޓުގައި ބަޔާންކޮށްފައިވެ އެވެ. އެ ތަހުގީގުތަކުގައި ފައްޔާޒު ހިމަނަން އެދިފައިވަނީ ބަދަލު ދިނުމުގެ އެއްބަސްވުންތަކަށް ވާސިލުވެ އެ އެއްބަސްވުްނތައް ގެނައުމުގައި އިސް ދައުރެއް އަދާކޮށްފައިވާ ތުހުމަތުކޮށެވެ.