ރާއްޖޭގައި މިހާރު ކުރިއަށްދާ "އޭޓީއެފް މޯލްޑިވްސް ޖޫނިއާ އޯޕަން" ޓެނިސް މުބާރާތުގެ އަންހެން ސިންގަލްސް 16 އަހަރުން ދަށުގެ ޗެމްޕިއަންކަން، އާރާ އާސާލް އާޒިމް ހޯދައިފި އެވެ.

މާލޭ ޓެނިސް ކޯޓުގައި މިއަދު ކުޅުނު 16 އަހަރުން ދަށުގެ އަންހެން ސިންގަލްސްގައި އާރާ ނުކުތީ ރާއްޖޭގެ ނަޔާރާ އުސާމާ އަލީއާ ދެކޮޅަށެވެ. އެ މެޗުގެ ފުރަތަމަ ސެޓު ފަސޭހަކަމާ އެކު، އާރާ ވަނީ 6-0 އިން ކުރިހޯދައިފަ އެވެ. ދެ ވަނަ ސެޓުގައި ނަޔާރާ ކުޅުން ރަނގަޅުކޮށް ކޮންމެ ވެސް ވަރެއްގެ ފައިޓެއް ވަނީ ދީފަ އެވެ. އާރާ މި ސެޓުން ކުރިހޯދީ 6-4 އިންނެވެ.

ފައިނަލް މެޗަށް ފަހު، އާރާ ބުނީ، އަމިއްލަ ގައުމުގައި ކުޅުނު އޭޓީއެފް މުބާރާތަކުން މި ލިބުނު ކާމިޔާބާ އެކު ވަރަށް ބޮޑު ހިތްހަަމަޖެހުމެއް ލިބިގެންދިޔަ ކަމަށެެވެ. އަދި ޔަގީންކަމާ އެކު ފައިނަލް މެޗަށް ނުކުމެ ކުރި މަސައްކަތުން ކާމިޔާބު ލިބުނީ ކަމަށާއި މިއީ، ކުރިއަށް ހުރި މުބާރާތްތަކަށް ކަންކަން ދަސްކުރަން ބަލާއިރު ވެސް މުހިންމު ކާމިޔާބެއްގެ ގޮތުގައި އާރާ ވަނީ ފާހަގަކޮށްފަ އެވެ.

ސޯޅަ އަހަރުން ދަށުގެ ފިިރިހެން ސިންގަލްސް ޗެމްޕިއަންކަން ހޯދީ އިންޑިއާގެ ހާޝް ޕަޓޭލް ބަލިކޮށް އިންޑޮނޭޝިއާގެ ޔޯކިމް މިކާ ގުނަވަން އެވެ.

އޭޓީއެފް މޯލްޑިވްސް އޯޕަން މުބާރާތުގެ އަންހެން ޑަަބަލްސް ފައިނަލުގައި، މިއަދު އާރާ އާއި ނަޔާރާގެ ޕެއާ ބައްދަލުކުރާނީ ހޮން ކޮންގްގެ އައިޝަތު ކަރީން ސައިޒާން އާއި ހިއު ލަމް އެލާ ވޮންގްގެ ޕެއާއާ އެވެ. އެ މެޗު ކުޅޭނީ މިއަދު ހަވީރު އެވެ.

މި ފަހަރުގެ މުބާރާތުގައި ރާއްޖޭގެ އިތުރުން, ކަޒަކިސްތާން, ޗައިނާ, އިންޑިއާ, އިންގްލެންޑް އަދި ބްރެޒިލްގެ ކުޅުންތެރިން ފެނިގެންދިޔަ އެވެ. ޖުމްލަ އެކު، މި ގައުމުތަކުން 30 އަށް ވުރެ ގިނަ ކުޅުންތެރިން ވާދަކުރި އެވެ.