ދިއްލީ، އިންޑިއާ (ޑިސެމްބަރު 11) - އަންނަ އަހަރު ޕާކިސްތާންގައި ތާވަލުކޮށްފައި އޮތް ޗެމްޕިއަންސް ޓްރޮފީ ކްރިކެޓް މުބާރާތުގައި ވާދަކުރަން އިންޑިއާ އިން ޕާކިސްތާނަށް ނުދާނެކަން އަންގާފައިވާއިރު، އެ މުބާރާތުގެ ފޯމެޓް "ހައިބްރިޑް މޮޑެލް" އަށް ބަދަލުވުމުގެ ފުރުސަތު ބޮޑުވެއްޖެ އެވެ.

އަންނަ ފެބްރުއަރީ މަހު ޕާކިސްތާންގައި ފަށަން ތާވަލުކޮށްފައިވާ، ޗެމްޕިއަންސް ޓްރޮފީ ފަށަން 100 އަށް ވުރެ މަދު ދުވަސްކޮޅަކަށް ވެފައި އޮތްއިރު، އަދިވެސް މުބާރާތުގެ ޝެޑިއުލް ފައިނަލްވެފައި ނުވެ އެވެ.

މުބާރާތުގެ ފޯމެޓާއި ޝެޑިއުލް ފައިނަލް ނުވެ އޮތް ސަބަަބަކީ، އިންޑިއާ އިން މުބާރާތުގައި ކުޅެން ޝަރުތަކުތަކެއް އޮތުމުންނެވެ. އެ ގޮތުން، ޕާކިސްތާން ކްރިކެޓް ބޯޑުން ބުނެފައިވަނީ، އިންޑިއާ އިން މުބާރާތަށް ޕާކިސްތާނަށް ނުދާނެކަން އަންގާފައިވާ ކަމަށެެވެ.

އިންޓަނޭޝަނަލް ކްރިކެޓް ކައުންސިލް (އައިސީސީ)ގެ އާ ޗެއާމަން، ކްރިކެޓް ބޯޑް އޮފް އިންޑިއާ (ބީސީސީއައި)ގެ ސެކްރެޓަރީ ޖޭ ޝާހު މި މަހު އެއް ވަނަ ދުވަހުން ފެށިގެން މަގާމުގެ ޒިންމާތައް އުފުއްލަވަން ވަނީ ފަށައިފަ އެވެ. އެގޮތުން، އޭނާ ހިމެނޭ ގޮތަށް އައިސީސީން މަޝްވަރާކޮށްފައިވަނީ، ޕާކިސްތާނުން މުބާރާތް ހޯސްޓްކުރިޔަސް، އިންޑިއާގެ މެޗުތައް އެހެން ގައުމެއްގައި ކުޅޭ ގޮތަށް "ހައިބްރިޑް މޮޑެލް: އަށް ރޭވުމަށެވެ. އެއީ، މި ވަގުތަށް ބަލާއިރު، އިންޑިއާގެ މެޗުތައް ޔޫއޭއީގައި ކުޅުމަށެވެ.

އައިސީސީން މި ގޮތަށް، މަޝްވަރާކުރިއިރު، ސެމީ ފައިނަލުގައި އިންޑިއާ އާއި ޕާކިސްތާން ކުޅެން ޖެހިއްޖެނަމަ، ދެން ހަނދާނެ ގޮތަކާ މެދު މަޝްވަރާތައް އަދި ކުރިއަށްނުދެ އެވެ.

ޗެމްޕިއަންސް ޓްރޮފީ މުބާރާތަކީ، 1996 ވަނަ އަހަރުގެ ފަހުން، ޕާކިސތާންގައި ހޯސްޓްކުރެވޭ ބައިނަލްއަގުވާމީ ބޮޑު ކްރިކެޓް މުބާރާތެވެ. އިންޑިއާ އާއި ޕާކިސްތާނުން މުބާރާތެއްގައި ނޫން ގޮތަކަށް ބައްދަލުުނުކުރާތާ 11 އަހަރުވެފައިވާއިރު، އެންމެ ފަހުން، ޕާކިސްތާނަށް ގޮސް އިންޑިއާ އިން މެޗެއް ކުޅުނީ 2008 ވަނަ އަހަރު އެވެ.

މިދިޔަ 16 އަހަރު ތެރޭގައި، ޕާކިސްތާނުން ވަނީ އިންޑިއާގައި ތިން ފަހަރެއްގެ މަތިން ކުޅެފަ އެވެ. އެއީ، 2012، 2013 ގައި ކުޅުނު ބައިލެޓްރަލް ސީރީސްގެ އިތުރުން، 2016 ވަނަ އަހަރު އިންޑިއާ އިން ހޯސްޓްކުރި ޓީ20 ވޯލްޑް ކަޕާއި، މިދިޔަ އަހަރު އިންޑިއާ އިން ބޭއްވި ވަންޑޭއިންޓަނޭޝަނަލް (އޯޑީއައި) ވޯލްޑް ކަޕަށެވެ. މިދިޔަ އަހަރު ޕާކިސްތާނުން އޭޝިއާ ކަޕް ހޯސްޓްކުރިއިރު، އިންޑިއާގެ މެޗުތައް ކުޅެފައިވަނީ ސްރީ ލަންކާގަ އެވެ.

ޕާކިސްތާން ކްރިކެޓް ބޯޑުން މިހާރު ނިންމާފައިވަނީ، މުސްތަގުބަލުގައި، އިންޑިއާ އިން ހޯސްޓްކުރާ މުބާރާތްތަކުގައި، ޕާކިސްތާންގެ މެޗުތައް އެ ގައުމުން ބޭރުގައި ކުޅެ، ހައިބްރިޑް މޮޑެލް އަށް ކުޅޭ ގޮތަށް އުސޫލެއް ހުށަހެޅުމަށެވެ.

ރިޕޯޓްތައް ބުނާގޮތުން، އައިސީސީން ޕާކިސްތާން އަތުން ޗެމްޕިއަންސް ޓްރޮފީ ހޯސްޓްކުރުމުގެ ފުރުސަތު އަތުލަން ވެސް ހުށަހެޅި އެވެ. އެކަމަކު، ބޮޑެތި ހަރަދުތަކެއް މިހާތަނަށް ވެސް ޕާކިސްތާނުން ކޮށްފައިވާތީ، އައިސީސީން ހޯސްޓް ބަދަލުނުކުރާނެ ކަމަށް ވެސް ރިޕޯޓްތައް ބުނެ އެވެ.