ލާހޯރް، ޕާކިސްތާން (ނޮވެމްބަރު 12) - އަންނަ އަހަރު ޕާކިސްތާންގައި ބާއްވަން ފުރުސަތު ދިފައި އޮތް ޗެމްޕިއަންސް ޓްރޮފީ ކްރިކެޓް މުބާރާތުގައި ވާދަކުރަން އިންޑިއާ އިން ޕާކިސްތާނަށް ނުދާނެކަން އަންގާފައިވާކަމަށް ޕާކިސްތާން ކްރިކެޓް ބޯޑް (ޕީސީބީ) އިން ބުނެފި އެވެ.

އަންނަ ފެބްރުއަރީ މަހު ޕާކިސްތާންގައި ފަށަން ތާވަލުކޮށްފައިވާ، ޗެމްޕިއަންސް ޓްރޮފީ ފަށަން 100 އަށް ވުރެ މަދު ދުވަސްކޮޅަކަށް ވެފައި އޮތްއިރު، އަދިވެސް މުބާރާތުގެ ޝެޑިއުލް ފައިނަލްވެފައި ނުވެ އެވެ. ސަބަަބަކީ، އިންޑިއާ އިން މުބާރާތުގައި ކުޅެން ޝަރުތަކުތަކެއް އޮތުމުންނެވެ. އެ ގޮތުން، ޕާކިސްތާން ކްރިކެޓް ބޯޑުން ބުނެފައިވަނީ، އިންޑިއާ އިން މުބާރާތަށް ޕާކިސްތާނަށް ނުދާނެކަން އަންގާފައިވާ އީމެއިލެއް ލިބިފައިވާ ކަމަށެެވެ.

އެ ގޮތުން، އިންޓަނޭޝަނަލް ކްރިކެޓް ކައުންސިލް (އައިސީސީ) އަށް އިންޑިއާ އިން ޗެމްޕިއަންސް ޓްރޮފީ ކުޅެން ޕާކިސްތާނަށް ނުދާނެކަން އަންގާފައިވާއިރު، އައިސީސީން ވަނީ އެ މައުލޫމާތު ޕާކިސްތާނަށް ދީފަ އެވެ.

އައިސީސީން އަންނަނީ މުބާރާތުގައި ކުޅޭ އަށް ގައުމާ ވާހަކަ ދައްކައިގެން މުބާރާތުގެ ޝެޑިއުލް ފައިނަލް ކުރަން މަސައްކަތް ކުރަމުންނެވެ.

ޗެމްޕިއަންސް ޓްރޮފީ މުބާރާތަކީ، 1996 ވަނަ އަހަރުގެ ފަހުން، ޕާކިސތާންގައި ހޯސްޓްކުރެވޭ ބައިނަލްއަގުވާމީ ބޮޑު ކްރިކެޓް މުބާރާތެވެ. އިންޑިއާ އާއި ޕާކިސްތާނުން މުބާރާތެއްގައި ނޫން ގޮތަކަށް ބައްދަލުުނުކުރާތާ 11 އަހަރުވެފައިވާއިރު، އެންމެ ފަހުން، ޕާކިސްތާނަށް ގޮސް އިންޑިއާ އިން މެޗެއް ކުޅުނީ 2008 ވަނަ އަހަރު އެވެ. މިދިޔަ 16 އަހަރު ތެރޭގައި، ޕާކިސްތާނުން ވަނީ އިންޑިއާގައި ތިން ފަހަރެއްގެ މަތިން ކުޅެފަ އެވެ. އެއީ، 2012، 2013 ގައި ކުޅުނު ބައިލެޓްރަލް ސީރީސްގެ އިތުރުން، 2016 ވަނަ އަހަރު އިންޑިއާ އިން ހޯސްޓްކުރި ޓީ20 ވޯލްޑް ކަޕާއި، މިދިޔަ އަހަރު އިންޑިއާ އިން ބޭއްވި ވަންޑޭއިންޓަނޭޝަނަލް (އޯޑީއައި) ވޯލްޑް ކަޕަށެވެ.

މިދިޔަ އަހަރު ޕާކިސްތާނުން އޭޝިއާ ކަޕް ހޯސްޓްކުރިއިރު، އިންޑިއާގެ މެޗުތައް ކުޅެފައިވަނީ ސްރީ ލަންކާގަ އެވެ. އެކަމަކު، ޕާކިސްތާނުން ވަނީ އަންނަ އަހަރުގެ ޗެމްޕިއަންސް ޓްރޮފީ މެޗުތައް އިންޑިއާ ބޭނުންވާ ގޮތަކަށް ބަދަލުކުރިޔަ ނުދޭން އަމާޒުހިފައިފަ އެވެ.

ޝްވަރާ ކުރެވެމުން އަންނަ ގޮތުގައި، އިންޑިއާގެ ޗެމްޕިއަންސް ޓްރޮފީ މެޗުތައް، ޔޫއޭއީގައި ކުޅުމުގެ ވާހަކަ އަންނަނީ ދެކެވެމުންނެވެ. އެކަމަކު، އެ ގޮތަށް ޕާކިސްތާން ކްރިކެޓް ބޯޑުން ކުރިއަށްދާން ބޭނުމެއް ނުވެ އެވެ. އެއީ، އަށް ޓީމު ދެ ގްރޫޕަށް ބަހައިގެން ކުޅޭއިރު، އިންޑިއާގެ މެޗުތައް ޔޫއޭއީގައި ކުޅެފައި، ސެމީ ފައިނަލަށް އިންޑިއާ ގޮސްފިނަމަ، ޕާކިސްތާނާ ކުޅެން ޖެހި އެ މެޗު ޕާކިސްތާނުން ބޭރުގައި ކުޅެން ޕާކިސްތާނުން ބޭނުންނުވުމެވެ.