ނިއު ދިއްލީ، އިންޑިއާ (ޖުލައި 17) - އަންނަ އަހަރު ޕާކިސްތާންގައި ހޯސްޓްކުރާ ޗެމްޕިއަންސް ޓްރޮފީ މުބާރާތުގައި ކުޅެން އެ ގައުމަށް ދިއުމަށް އިންޑިއާ އިން ދެކޮޅު ހަދައިފިނަމަ، 2026 ވަނަ އަހަރު އިންޑިއާގައި ބާއްވާ ޓީ20 ވޯލްޑް ކަޕްގައި ކުޅެން ޕާކިސްތާނުން ވެސް ދެކޮޅު ހަދައި މުބާރާތް ބޮައިކޮޓްކުރާނެ ކަމަށް ރިޕޯޓްތައް ބުނެފި އެވެ.

އައިސީސީ ޗެމްޕިއަންސް ޓްރޮފީ ޕާކިސްތާންގައި ފަށާ ގޮތަށް ޝެޑިއުލްކޮށްފައިވަނީ އަންނަ އަހަރުގެ ފެބްރުއަރީ 19 ވަނަ ދުވަހު އެވެ. އަދި މުބާރާތުގެ ގަދަ އަށް ޓީމުގެ ބުރުގެ މެޗުތައް ފަށަން ތާވަލުކޮށްފައި އޮތީ، މާޗް ނުވަ ވަނަ ދުވަހުން ފެށިގެން ލާހޯރްގަ އެވެ.

އެކަމަކު، ރިޕޯޓްތައް ބުނާގޮތުން، އެ މުބާރާތަށް އިންޑިއާ އިން ޕާކިސްތާނަށް ދަތުރުނުކޮށް، އިންޑިއާގެ މެޗުތައް، އެހެން ގައުމެއްގައި ކުޅެވޭތޯ އަންނަނީ އައިސީސީއާ ވާހަކަ ދައްކަމުންނެވެ.

ޖިއޯނިއުސްއުރްދޫ އިން ރިޕޯޓްކުރާގޮތުގައި، އިންޑިއާ އިން އަންނަ އަހަރު ޕާކިސްތާނަށް ޗެމްޕިއަންސް ޓްރޮފީ މެޗުތައް ކުޅެން ނުގޮސްފިނަމަ، އިންޑިއާ އާއި ސްރީ ލަންކާގައި، 2025 ވަނަ އަހަރު ހޯސްޓްކުރާ ޓީ20 ވޯލްޑް ކަޕް ޕާކިސްތާނުން ބޮއިކޮޓްކުރާނެ އެވެ.

ޕާކިސްތާން ކްރިކެޓް ބޯޑުން ވަނީ، އަންނަ އަހަރުގެ ޗެމްޕިއަންސް ޓްރޮފީ މުބާރާތުގައި އިންޑިއާ ކުޅެން ޖެހޭ މެޗުތައް އެ ގައުމުން ބޭރަށް ބަދަލުކުރަން ހުށަހަޅާ ޕްރޮޕޯސަލާ ދެކޮޅަށް އަޑުއުލަން ނިންމައިފަ އެެވެ.

ސިޔާސީ ހަމަނުޖެހުން ބޮޑު ދެ ގައުމު ކަމަށްވާ އިންޑިއާ އާއި ޕާކިސްތާންގެ ކުޅިވަރުގެ ވާދަވެރިކަން ވެސް އިންތިހާ އަށް ބޮޑެވެ. އިންޑިއާ އިން އެންމެ ފަހުން ޕާކިސްތާންގައި މެޗެއް ކުޅެފައިވަނީ، 2008 ވަަނަ އަހަރުގެ އޭޝިއާ ކަޕްގަ އެވެ. މިދިޔަ 16 އަހަރު ތެރޭގައި، ޕާކިސްތާނުން ވަނީ އިންޑިއާގައި ތިން ފަހަރެއްގެ މަތިން ކުޅެފަ އެވެ. އެއީ، 2012، 2013 ގައި ކުޅުނު ބައިލެޓްރަލް ސީރީސްގެ އިތުރުން، 2016 ވަނަ އަހަރު އިންޑިއާ އިން ހޯސްޓްކުރި ޓީ20 ވޯލްޑް ކަޕާއި، މިދިޔަ އަހަރު އިންޑިއާ އިން ބޭއްވި ވަންޑޭއިންޓަނޭޝަނަލް (އޯޑީއައި) ވޯލްޑް ކަޕަށެވެ.

މިދިޔަ އަހަރު ޕާކިސްތާނުން އޭޝިއާ ކަޕް ހޯސްޓްކުރިއިރު، އިންޑިއާގެ މެޗުތައް ކުޅެފައިވަނީ ސްރީ ލަންކާގަ އެވެ. އެކަމަކު، ޕާކިސްތާނުން ވަނީ އަންނަ އަހަރުގެ ޗެމްޕިއަންސް ޓްރޮފީ މެޗުތައް އިންޑިއާ ބޭނުންވާ ގޮތަކަށް ބަދަލުކުރިޔަ ނުދޭން އަމާޒުހިފައިފަ އެވެ.