މި ވެެރިކަމުގެ ދަށުގައި ކުރިއަށް އޮތީ ނާމާން ދުވަސްތަކެއް ކަމަށާއި އަނިޔާވެރިކަމާ ދެކޮޅަށް މިއަދުން މިއަދަށް ފިޔަވަޅުތަކެއް އަޅަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

އެމްޑީޕީން ކާނިވާ ސަރަހައްދުގައި ބާއްވާ "ގާނޫނުއަސާސީގެ ދިފާއުގައި ރައްޔިތުން" ޖަލްސާގައި ވާހަކަ ދައްކަވަމުން ސޯލިހު ވިދާޅުވީ މިހާރު ވެސް އަނިޔާވެރިކަމުގެ ސިފަތައް މި ވެރިކަމުގައި ފެންނަން ފަށައިފި ކަމަށެވެ. އެކަންތައްތަކާ ދެކޮޅަށް ވަގުތުން ފިޔަވަޅުތަކެއް އަޅަންޖެހޭ ކަމަށް ސޯލިހު ވިދާޅުވި އެވެ.

"އަޅުގަނޑުމެންނަށް ކުރިމަތިން މި ފެންނަމުންދާ ވިލާގަނޑުން އަޅުގަނޑުމެންނަށް ފެންނަނީ ވަރަށް ބަނަ ދުވަސްތަކެއް. ބިރުވެރި ދުވަސްތަކެއް. ނާމާންް ދުވަސްތަކެއް. ދަތި އުނދަގޫ ދުވަސްތަކެއް. އަދި މިކަމާ ދޭތެރޭގައި މިހާރުން މިހާރަށް އަޅުގަނޑުމެން މަސައްކަތްތަކެއް ނުކޮށްފި ނަމަ އަނިޔާވެރި ދުވަސްތަކަކަކާ އަޅުގަނޑުމެންނާ އަނެއްކާ ވެސް ކުރިމަތިލާން ޖެހިދާނެކަން މިއަދުވެސް ފެންނަމުން އެބަދޭ،" ސޯލިހު ވިދާޅުވި އެވެ.

"މިކަންތައްތަކާ ދޭތެރޭގައި އިސްވެ ފިޔަވަޅެއް ނާޅައިފި ނަމަ މި ދެންނެވި ކަންތައްތައް އަޅުގަނޑުމެންނާ ކުރިމަތިވާނެ."

މިރޭގެ ޖަލްސާގައި ވާހަކަ ދައްކަވަމުން ސޯލިހު ވަނީ ފެހި ގާނޫނުއަސާސީ އެކުލަވައިލި އިރު ކުރިމަތިވި ގޮންޖެހުންތަކުގެ ވާހަކަ ދައްކަވައިފަ އެވެ. އެމަނިކުފާނު ވިދާޅުވީ، އެއިރުގެ ވިސްނުމަކީ ހުރިހާ ބާރެއް ރައްޔިތުންގެ އަތުގައި ބޭއްވުން ކަމަށެވެ.

"ގާނޫނުއަސާސީގައި އަޅުގަނޑުމެން ހައްގުތަކެއް ލިޔުނިން. މިއަދު އަޅުގަނޑުމެން އެއްވެ މި ތިބީ އެކަންތައްތައް ދިފާއު ކުރަން. ބަސް ބުނުމުގެ މިނިވަންކަން އަޅުގަނޑުމެން ހޯދިން. މައުލޫމާތު ހޯދުމާއި ލިބިގަތުމުގެ މިނިވަންކަން އަޅުގަނޑުމެން ކަށަވަރު ކުރިން. ޕެންޝަން ލިބުމުގެ ހައްގު އޭގައި އަޅުގަނޑުމެން ލިޔުނިން. ހިލޭ ބޭސް ފަރުވާ ސަރުކާރުން ދޭންޖެހޭނެކަން ކަށަވަރު ކުރިން. އެހެން ނަމަވެސް އަޅުގަނޑުމެންނަށް މިިދިޔަ ދުވަސްތަކުގެ ތެރޭގައި މި ފެނިގެންދަނީ މި ހުރިހާ ހައްގުތަކެއް އަޅުގަނޑުމެންގެ ކިބައިން މި ސަރުކާރުން ނިގުޅައިގަންނަން މަސައްކަތް ކުރަމުންދާ ތަން،" އެމަނިކުފާނު ވިދާޅުވި އެވެ.

އެމްޑީޕީގެ މިރޭގެ ޖަލްސާ ފެށުމުގެ ކުރިން ވަނީ ގައުމީ މަޖިލީހުގެ ބައްދަލުވުމެއް ބާއްވައިފަ އެވެ. އެމްޑީޕީއަށް ސޮއިކޮށްގެން ނުވަތަ ރައްޔިތުންގެ ހައްގުގައި ވަކާލާތުކޮށްގެން މަޖިލިސް މެންބަރެއްގެ ގޮނޑި ގެއްލިއްޖެ ނަމަ އެ މެންބަރަކު އަލުން އިންތިހާބު ކުރަން އެހީތެރިވެދިނުމަށް އެ ބައްދަލުވުމުގައި ވަނީ ފާސްކޮށްފަ އެވެ.

އޭގެ އިތުރުން، ގާނޫނުއަސާސީއަށް ގެނައި ބަދަލުތައް އަނބުރާ ނުގެންދާހާ ހިނދަކު، އެކަމާ ދެކޮޅަށް މުޅި ރާއްޖޭގައި އިހުތިޖާޖު ކުރުމަށް ވެސް ވަނީ ގައުމީ މަޖިލީހުން ފާސްކޮށްފަ އެވެ. އަދި އަސާސީއަށް ގެނައި ބަދަލުތަކާ ދެކޮޅަށް ޕެޓިޝަނެއް ހަދައި ސޮއި ކުރަން ފަށަން ވެސް އެ ބައްދަލުވުމުގައި ފާސް ކުރި އެވެ.