އެސްޓީއޯ ރޭޓުގައި ތެޔޮ އަޅަން ދިޔައިރު ކ. ހިންމަފުށި ޝެޑުގައި ތެޔޮ ނެތް ކަމަށް މަސްވެރިން މިއަދު ބުނެފި އެވެ.

ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) އިން އެކްސްގައި ބުނީ މިއަދުން ފެށިގެން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް، ހިންމަފުށީ ޝެޑުން ތެލެއް ވެސް ނުލިބޭ ކަމަށެވެ.

"މިޔަދުން ފެށިގެން ކ. ހިންމަފުށިން އެސްޓީއޯ ރޭޓުން ތެޔޮ ލިބޭނޭ ކަމަށް ރައީސް ވިދާޅުވި. ނަމަވެސް މަސްވެރިން ތެޔޮ އަޅަން ދިޔައިރު ތެލެއް ނެތް،" ބީކޭއެމްޔޫއިން ބުންޏެވެ.

މިއަދުން ފެށިގެން ކ. ހިންމަފުށި, ގއ. ކޫއްޑޫ, ޅ. ފެލިވަރު އަދި އައްޑޫ ސިޓީ ހުޅުމީދޫގައި ހުންނަ އެފްއެސްއެމްގެ ސައިޓުތަކުން އެސްޓީއޯގެ ރޭޓުގައި މަސްވެރިންނަށް ތެޔޮ ގަންނަން ލިބޭނެ ކަމަށް ވެސް ރައީސް މުއިއްޒު ވިދާޅުވީ އިއްޔެ އެވެ.

އޭގެ އިތުރުން މަސްވެރިންނަށް މިއަދުން ފެށިގެން 48 ގަޑިއިރު ތެރޭގައި ކިރާ މަހަށް ފައިސާ ދެވޭނެ ކަމަށާއި މަސްވެރިންނަށް އިއްޔެއާ ހަމައަށް ނުދެވި ހުރި 38 މިލިއަން ރުފިޔާ ދައްކައި ހަލާސް ކުރިކަން ވެސް ރައީސް އިއުލާން ކުރެއްވި އެވެ.

މިއަދު ފާހަގަކުރާ މަސްވެރިންގެ ދުވަހާ ގުޅިގެން ގިނަ ހަރަކާތްތަކެއް ސަރުކާރުން ރާވައި ހިންގަމުންދާއިރު، މަސްވެރިންގެ ދުވަހުގެ ރަސްމީ ޖަލްސާ އޮތީ ބުރާސްފަތި ދުވަހުގެ ރެ އެވެ. އެ ޖަލްސާ ޝަރަފުވެރި ކޮށްދެއްވަނީ ރައީސް އެވެ.