މި އަހަރު ބޭއްވި އޭޝިއަން ސާފިން ޗެމްޕިއަންޝިޕުގެ ޖޫނިއާ ކެޓަގަރީގެ ސެމީ ފައިނަލަށް ދަތުރުކުރި، ކަޔާން ޒަކީ، ގައުމީ ސީނިއާ ސާފިން ޓީމުން ޖާގަ ހޯދައިފި އެވެ.

އުމުރުން 14 އަހަރުގެ ކަޔާން ވަނީ ކ. ތުލުސްދޫގައި މި އަހަރު ކުރިއަށްދިޔަ އޭޝިއަން ސާފިން ޗެމްޕިއަންޝިޕްގެ ޖޫނިއާ ކެޓަގަރީ (18 އަހަރުން ދަށް)ގެ ސެމީ ފައިނަލުން ފުރުސަތު ހޯދައި، މިހާތަނަށް ރާއްޖޭގެ ޒުވާން ސާފަރަކު ބައްރުގެ މުބާރާތަކުން ހޯދި އެންމެ ބޮޑު ކާމިޔާބީ ހާސިލްކޮށްފަ އެވެ.

މީގެ އިތުރުން، ގައުމީ ސާފިން ލީގުގައި އަހަރުން އަހަރަށް ބަލާނަމަ އެންމެ ބޮޑު ކުރިއެރުމެއް ހޯދަމުން އަންނަ ސާފަރުން ތެރޭގައި ކަޔާން ހިމެނެ އެވެ. ކަޔާން މިދިޔަ ދެ އަހަރު ހުރީ ގައުމީ ޖޫނިއާ ސާފިން ޓީމުގަ އެވެ. އެހެންކަމުން، އަންނަ އަހަރު ވެގެންދާނީ ސީނިއާ ސާފަރުންނާ އެކު، އޭނާގެ ބޮޑު އަހަރަކަށެެވެ.

ގައުމީ ސާފިން ޓީމު އެކުލަވާލުމުގައި، ސާފިން އެސޯސިއޭޝަން، އެމްއެސްއޭ އިން އެތުލީޓުން ކަނޑައެޅުމުގައި ބަލާ މިންގަނޑަކީ، ކުރީ އަހަރުގެ ގައުމީ ސާފިން ލީގުގެ ރޭންކިން އަށެވެ.

އެ ގޮތުން، ކުރިއަށް އޮތް އަހަރަށް ސާފިން ގައުމީ ޓީމަށް ހޮވީ މި އަހަރުގެ ލީގު ރޭންކިންގެ ގަދަ ހަ ސާފަރުންނެވެ.

ޒުވާން ސާފަރު، ކަޔާންގެ އިތުރުން ގައުމީ ސްކޮޑުގައި ދެން ހިމެނެނީ، މި ފަހަރުގެ ގައުމީ ސާފިން ލީގު ކާމިޔާބުކުރި ހޫދު އަހުމަދު (ހޫބްޒް) އާއި މި ވަގުތު ގައުމީ ޓީމުގައި ހިމެނޭ އެންމެ ތަޖުރިބާކާރު ސާފަރު، އިސްމާއިލް މިގްލާލް (ކުޑައިއްސެ)ގެ އިތުރުން، ގދ. ގައްދޫ އަށް އުފަން ހުނަރުވެރި ސާފަރު، ނަޖާހު މުހައްމަދު (ކަބޯ) އާއި ހަމަ އެ ރަށަށް އުފަން، އިސްމާއިލް ރަޝީދު (ސްމައިލީ) އަދި ގައުމީ ސާފިން ޓީމުގެ ކެޕްޓަންކަން ދާދި ފަހުން ކުރި، އަހުމަދު އާގިލް (އަންމަޑޭ) އެވެ.