ލިޒްބަން (ޑިސެމްބަރު 9) - މަޝްހޫރު ގިނަ ކްލަބްތަކަށް ކުޅެފައިވާ ޕޯޗުގީސް ތަރި ނާނީ ޕްރޮފެޝަނަލް ފުޓްބޯޅައިން ރިޓަޔާކޮށްފި އެވެ.

އުުމުރުން 38 އަހަރުގެ ނާނީ ކުޅެމުން އަންނަނީ ޕޯޗުގަލްގެ ފުރަތަމަ ޑިވިޝަނުގައި، ކްލަބް އެސްޓްރެލާ އަމަޑޯރާ އަށެވެ.

ނާނީ އެންމެ ފަހުން އެސްޓްރެލާ އަށް ކުޅުނު މެޗަކީ މިދިޔަ މަހުގެ އެއް ވަނަ ދުވަހު، އޭނާގެ ފުރަތަމަ ކްލަބް ސްޕޯޓިން ލިޒްބަންއާ ދެކޮޅަށް ކުޅުނު މެޗުގަ އެވެ.

"މިއީ އަހަރެންގެ ޕްރޮފެޝަނަލް ފުޓްބޯޅަ ކެރިއަރު ނިމުމަކަށް ގެންނަން އެންމެ ރަނގަޅު ވަގުތު ކަމުގައި ދެކޭތީ އެކަން ކުރުމަށް ނިންމައިފިން، އަހަރެންގެ ޕްރޮފެޝަނަލް ކެރިއަރުގެ 20 ވަރަކަށް އަހަރުގައި ގިނަ ތަޖުރިބާތަކެއް ކޮށްފިން، އުފާވެރި އަދި ހިތާމަވެރި ވަގުތުތަކުގައި ވެސް އެކުގައި ތިބި އެންމެނަށް ޝުކުރު އަދާކުރަން،" ސޯޝަލް މީޑިއާގައި ނާނީ ކުރި ޕޯސްޓުގައި ބުނެފައިވެ އެވެ.

ސްޕޯޓިން ދޫކޮށް 2007 ވަނަ އަހަރު މެންޗެސްޓާ ޔުނައިޓެޑަށް ނާނީ ބަދަލުވީ 25 މިލިއަން ޑޮލަރަށެވެ. އެ ޓީމަށް ކުޅެދިން 230 މެޗުން 41 ގޯލު އެ ޓީމަށް ޖަހައިދިނެވެ.

ނާނީ ވަނީ ޔުނައިޓެޑާ އެކު، ޕްރިމިއާ ލީގު، ޗެމްޕިއަންސް ލީގު އަދި ކްލަބް ވޯލްޑް ކަޕްގެ ޗެމްޕިއަންކަން ހޯދައިފަ އެވެ. އަދި 2011 ވަނަ އަހަރު އެ ކްލަބްގެ ކުޅުންތެރިން ހޮވި ސީޒަނުގެ އެންމެ މޮޅު ކުޅުންތެރިޔާގެ ޓްރޮފީ ހާސިލްކުރީ ނާނީ އެވެ.

ސްޕޯޓިން، ޔުނައިޓެޑް އަދި އެސްޓްރެލާގެ އިތުރުން ނާނީ ކުޅެފައިވާ ކްލަބްތަކަކީ، ވެލެންސިއާ، ލާޒިއޯ، އޯލަންޑޯ ސިޓީ، ފެނަބާޗޭ، ވެނެޒިއާ، މެލްބާން ވިކްޓަރީ އަދި އަޑާނާ ޑެމިސްޕޯ އެވެ.

ޕޯޗުގަލް އިން 2016 ވަނަ އަހަރު ޔޫރޯ ކާމިޔާބުކުރި ޓީމުގައި ހިމެނުނު ނާނީ ވަނީ އެ ޓީމަށް 112 މެޗުން 24 ގޯލު ޖަހައިފަ އެެވެ.