ބާލިން (ޑިސެމްބަރު 4) - ޖަރުމަނު ކަޕްގެ ގަދަ 16 ބުރުގައި ރޭ އެންމެ ފަހުގެ ޗެމްޕިއަން، ބަޔާ ލެވަކޫސަނުން 1-0 އިން ބަޔާން މިއުނިކް ބަލިކޮށް އެ ޓީމު މުބާރާތުން ކަޓުވާލައިފި އެވެ.

ބަޔާނުން މި މެޗުގެ ބޮޑުބައި ކުޅެން ޖެހުނީ ކުޅުންތެރިއަކު މަދުކޮށެވެ. އެއީ މެޗުގެ 17 ވަނަ މިނިޓްގައި ބަޔާންގެ ކީޕަރު މެނުއަލް ނޯޔާ އަށް ރަތް ކާޑެއް ދެއްކުމުންނެވެ. މިއީ، ލެވަކޫސަންގެ ޖެރެމީ ފްރިމްޕޮން އަށް ކުރި ފައުލަކަށް ރެފްރީ ނޯޔާ އަށް ދެއްކި ރަތް ކާޑެކެވެ. މިއީ، ނޯޔާގެ ކެރިއަރުގައި އޭނާ އަށް ދެއްކި ފުރަތަމަ ރަތް ކާޑެވެ.

އެއް ކުޅުންތެރިއަކު މަދުކޮށް ކުޅުުނު ބަޔާންގެ ގޯލަށް ބޯޅައެއް ވައްދާލަން ލެވަކޫސަނަށް އިންތިޒާރެއް ކުރަން ޖެހުނެވެ. އެ ގޮތުން، މެޗުގެ 69 ވަނަ މިނިޓްގައި، ލެވަކޫސަންގެ ލަނޑު ޖެހީ، ނޭތަން ޓެލާ އެވެ. މިއީ، އަލެކްސް ގްރިމާލްޑޯ ނެގި ހުރަހަކުން ޓެލާ ޖެހި ގޯލެކެވެ.

ބަޔާނުން އެއްވަރުކުރެވޭތޯ ގިނަ އެޓޭކްތަކެއް ކުރި އެވެ. އެ ގޮތުން، އެ ޓީމުގެ ކިންގްސްލީ ކޯމަން، ޑަޔޫޓް އުޕަމެކާނޯ އަދި ކިމް މިން ޖޭ ފޮނުވާލި ބޯޅަތައް ގޯލަކަށް ހަދާލެވޭ ގޮތެއްނުވި އެވެ.

ލެވަކޫސަންގެ ކޯޗު ޒަބީ އަލޮންސޯ ވަނީ އެ ޓީމާ ހަވާލުވި ފަހުން ޖަރުމަނު ކަޕްގައި ކުުޅުނު ހުރިހާ މެޗަކުން މޮޅުވެފަ އެެވެ. ރޭގެ މެޗަކީ މޮޅުވި އަށް ވަނަ މެޗެވެ. ބަޔާނަށް މި ވަނީ އަނެއްކާ ވެސް ޖަރުމަނު ކަޕްގެ ޗެމްޕިއަންކަން އަލުން ހޯދަން އިންތިޒާރު ކުރަން ޖެހިފަ އެވެ. މި މުބާރާތް 20 ފަހަރު ކާމިޔާބުކުރި ބަޔާނުން އެންމެ ފަހުން ތަށި އުފުލާލީ 2020 ވަނަ އަހަރު އެވެ.