ޓްރީ ޓޮޕް ހޮސްޕިޓަލުން ލ. ގަމުގައި ބޭއްވި ހެލްތު ކޭމްޕުގައި ބައިވެރިވި 300 އަށްވުރެ ގިނަ މީހުންނަށް ހިދުމަތް ދީފި އެވެ.

ޓްރީ ޓޮޕުން ގަން ރީޖަނަލް ހޮސްޕިޓަލް އާއި ލ. އަތޮޅު ކައުންސިލްއާ ގުޅިގެން ނިމިގެން ދިޔަ ހަފުތާ ބަންދުގައި ކުރިއަށް ގެންދިޔަ ހެލްތު ކޭމްޕްގައި ލ. ގަމާއި އެ ސަރަޙައްދުގެ ރަށްތަކުގެ ރައްޔިތުންނަށް ބޭނުންވެފައިވާ ހާއްސަ ސިއްހީ މައްސަލަތަކަށް ކަމާ ބެހޭ ހާއްސް ޑޮކްޓަރުންގެ އެހީތެރިކަމާއިއެކު ފަރުވާ ދިނެވެ.

މި ކޭމްޕްގައި ޑޮކްޓަރަށް ދެއްކުމުގެ އިތުރުން ސިއްހީ ސްކްރީނިންތައް ކުރި އެވެ. އަދި ސިއްހީ މައުލޫމާތު ދިނެވެ.

"އަޅުގަނޑުމެންނަށް ލ. ގަމުގެ މުޖުތަމަޢުއަށް ޚިދުމަތް ކުރުމުގެ ފުރުސަތު ލިބި، އެ ރަށުގެ ރައްޔިތުންގެ ދުޅަހެޔޮކަމަށް ހިއްސާކުރެވުނު ކަމަށްޓަކައި އަޅުގަނޑުމެން ޝުކުރުވެރިވަމެވެ. ގަމު ރީޖަނަލް ހޮސްޕިޓަލާއި ލ. އަތޮޅު ކައުންސިލާއެކު މިކުރެވުނު މަސައްކަތަކީ އަޅުގަނޑުމެންގެ މި މަސައްކަތް ޙަޤީޤަތަކަށް ހެދުމުގައި ވަރަށް މުހިންމު ދައުރެއް އަދާކުރި،" ޓްރީ ޓޮޕުން ބުންޏެވެ.

ޓްރީ ޓޮޕުން ބޭއްވި ހެލްތު ކޭމްޕްގެ ތެރެއިން -- ފޮޓޯ: ޓްރީ ޓޮޕް

މި އަހަރު ބޭއްވި ހެލްތު ކޭމްޕުތަކުގައި 1،000 ދިވެހިންނަށް ފަރުވާ ދީފައިވާ ކަމަށް ޓްރީ ޓޮޕުން ބުންޏެވެ.

ޓްރީ ޓޮޕް ހޮސްޕިޓަލުން މަސައްކަތް ކުރަނީ ހިދުމަތް ލިބުމުގައި ދަތިތަކާއި ކުރިމަތިލާންޖެހޭ ފަރާތްތަކަށް ފެންވަރު ރަނގަޅު ސިއްހީ މަޝްވަރާތަކާއި ފަރުވާ ފޯރުކޮށްދިނުމަށް ކަމަށް އެ ހޮސްޕިޓަލުން ބުންޏެވެ. އަދި ޒުވާނުންނަށް ދުޅަހެޔޮ ދިރިއުޅުމުގެ ވައްޓަފާޅިތަކާއި، ބަލިތަކުން ރައްކާތެރިވުމުގެ ފިޔަވަޅުތަކާއި، ބަލިތައް އަވަހަށް ދެނެގަތުމާބެހޭ ގޮތުން ހޭލުންތެރިކަން އިތުރު ކުރުމަކީ ވެސް އެ ހޮސްޕިޓަލްގެ މުހިއްމު ޒިންމާއެއް ކަމަށް ދެކެ އެވެ.