ބޯހިޔާވަހިކަމަށް ބިން ދޫކުރަން ހިއްކި ގުޅީފަޅު ފަހި ދިރިއުޅުން ކޯޕަރޭޝަން (އެފްޑީސީ) އަށް ބަދަލުކުރަން މިހާރު އެ ބިމުގެ ހައްގުތައް އޮންނަ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މަސައްކަތް ފަށައިފި އެވެ.

އިތުބާރު ހުރި މަސްދަރުތަކުން "އަދަދު" އަށް މައުލޫމާތު ލިބިފައިވާ ގޮތުގައި އެޗްޑީސީގެ ބޯޑުން ވަނީ އެފްޑީސިއާ ގުޅީފަޅު ހަވާލުކުރަން ނިންމާފަ އެވެ. އެކަމަކު އެ ގޮތަށް ބިން ހަވާލުކުރަނީ ސަރުކާރުން ނިންމާފައިވާ ގޮތަށް ދެ ކުންފުނިން އެއްކޮށްލުމުން އެއަށްފަހު ކަމަށް ވެސް އެނގިފައިވެ އެވެ.

މިކަމާ ގުޅޭ ގޮތުން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލާ "އަދަދު" އިން ސުވާލުކުރުމުން އޭނާ ވަނީ މި މަސައްކަތް ކުރަމުންދާ ކަން ކަށަވަރުކޮށްދެއްވައިފަ އެވެ. ނަމަވެސް މި ވަގުތު އިސްކަން ދެނީ ދެ ކުންފުނި އެއްކޮށްލުމަށް ކުރަން ޖެހޭ ކަންކަން ފުރިހަމަކުރަން ކަމަށް އޭނާ ވިދާޅުވި އެވެ.

"[ދެ ކުންފުނި އެއްކޮށްލުމަށް ފަހު] ގުޅީފަޅާ ހަވާލުވާނީ ދެ ފަރާތުގެ ދެމެދުގައި ވެވޭ އެއްބަސްވުމެއްގެ ދަށުން،" ހަމްދާން ވިދާޅުވި އެވެ.

ސަރުކާރު ކުންފުނިތައް ރިފޯމްކުރުމުގެ މަސައްކަތުގެ ދަށުން އެޗްޑީސީ އާއި އެފްޑީސީ އެއްކޮށްލަނީ އެއް ކަހަލަ މަސައްކަތްތަކެއް ކުރާ ކުންފުނިތައް އެއްކޮށްލުމުގެ ބޭނުމުގަ އެވެ. މިއީ ވޯލްޑް ބޭންކުން ވެސް ލަފާދީފައިވާ ކަމެކެވެ. މި ދެ ކުންފުނި އެއްކޮށްލުމުން އެފްޑީސީ ބަދަލުވާނީ އެޗްޑީސީގެ ސަބްސިޑަރީ ކުންފުންޏަކަށެވެ.

ގުޅީފަޅު އެފްޑީސީއާ ހަވާލުކުރަން ވިސްނި ނަމަވެސް، އެ ކުންފުނީގެ ދަށަށް ގުޅީފަޅު ބަދަލުކުރާ ސަބަބެއް އަދި ސާފެއް ނޫނެވެ. ބެލެވޭ ގޮތުގައި މިއީ އެފްޑީސީގެ އެސެޓުތައް އިތުރުކޮށް، ކުންފުނީގެ ބެލެންސް ޝީޓު ރަނގަޅު ކުރުމުގެ ބޭނުމުގައި ކުރާ ކަމެކެވެ.

ކުރީ ސަރުކާރުގައި ހިއްކި ސަރަހައްދާއެކީ ގުޅީފަޅުގެ ބިމުގެ ސަރަހައްދު 200 ހެކްޓަރަށް ވުރެ ބޮޑެވެ. މި ސަރުކާރުން ވަނީ ގުޅީފަޅުން އިތުރު 85 ހެކްޓަރު ހިއްކަން ނިންމާފަ އެވެ.

އެންމެ ފަހުން ސަރުކާރުން އާންމުކޮށްފައިވާ ލޭންޑް ޔޫސް ޕްލޭންގައިވާ ގޮތުގައި ގުޅީފަޅުގެ ބޮޑު ސަރަހައްދެއް ހާއްސަކޮށްފައި ވަނީ ބޯހިޔާވަހިކަމަށެވެ. އޭގެ ތެރެއިން ބޮޑު ސަރަހައްދެއް ހިއްސާކުރަނީ "ބިންވެރިޔާ" ސްކީމުގެ ދަށުން މާލޭ މީހުންގެ ގޯތިތަކެވެ.