ރައްޔިތުންގެ މަޖިލީހުގައި މިއަދު މެންދުރު ކުރިއަށް ގެންދިޔަ ޕީއެންސީ ޕީޖީ ގުރޫޕު ބައްދަލުވުމެއްގައި، ރައީސް އޮފީހުގެ ދެ މިނިސްޓަރުން، އަލީ އާރިފާއި އަބްދުﷲ ނާސިރު (ހެރިންސް އައްޅޯ) ބައިވެރިވެއްޖެ އެވެ.

ޕީއެންސީ ޕީޖީ ގުރޫޕުގެ ބައެއް މެންބަރުން "އަދަދު" ނޫހަށް މައުލޫމާތު ދެއްވަމުން ވިދާޅުވީ މަޖިލީހުގައި އޮތް ޕީޖީ ގުރޫޕުގެ ބައްދަލުވެއްގައި އެގޮތަށް އިތުރު ބަޔަކު ބައިވެރިވެވަޑައިގެން މިއީ ފުރަތަމަ ފަހަރު ކަމަށެވެ.

"މީގެ ކުރިން މަޖިލީހުގައި އޮންނަ ބައްދަލުވުމަކަށް ނާދޭ އިތުރު މީހަކު، މިއަދު ފެނުނީ އައިސް ތިއްބާ އެމީހުން،" މި ނޫހަށް މައުލޫމާތު ދިން މެންބަރަކު ވިދާޅުވި އެވެ.

ޕީޖީ ގުރޫޕުގެ ބައްދަލުވުމުގައި ބައިވެރިވެވަޑައިގެންނެވި ދެ ބޭފުުންގެ ތެރެއިން، އަލީ އާރިފް އަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އާއިލީ ގުޅުން އޮންނަ ބޭފުޅެކެވެ. އަބްދުﷲ ނާސިރުއަކީ މާލެ ސިޓީ މޭޔަރުކަމުގައި ރައީސް މުއިއްޒު ހުންނެވިއިރު ވެސް ވަރަށް އަރިސް ބޭފުޅެކެވެ.

އެ ބައްދަލުވުން އޮންނާތީ މިއަދު ހެނދުނު 11:00 އަށް ތާވަލުކޮށްފައި އޮތް ޖުޑިޝަރީ، މާލިއްޔަތު އަދި ހިއުމަން ރައިޓްސް އެންޑް ޖެންޑާ ކޮމިޓީގެ ބައްދަލުވުންތައް ވެސް ކުރީ ކެންސަލް އެވެ.

ކޮމިޓީތައް ކެންސަލް ކުރުމަށްފަހު ކުރިއަށް ގެންދިޔަ ޕީޖީ ގުރޫޕުގެ ބައްދަލުވުމުގައި ބައިވެރިވި ގިނަ މަޖިލިސް މެންބަރުން، އެ މެންބަރުންގެ ދާއިރާތަކުގައި ޕްރޮޖެކްޓުތައް ކުރިއަށް ނުދާތީ އެކަމާމެދު ކަންބޮޑުވުން ފާޅުކުރި ކަމަށް މި ނޫހަށް މައުލޫމާތު ދިން ޕީއެންސީ މެންބަރުން ވިދާޅުވި އެވެ.

"ގިނަ މެންބަރުން ޝަކުވާ ކުރީ، ރަށްރަށުގައި ޕްރިޖެކްޓުތައް ނުހިނގާތީ، ހުއްޓިފައި އޮތީމަ،" މި ނޫހަށް މައުލޫމާތު ދިން މެންބަރަކު ވިދާޅުވި އެވެ.

މަޖިލީހުގައި އޮތް ޕީއެންސީގެ ޕީޖީ ބައްދަލުވުމެއްގައި ރައީސް އޮފީހުގެ ދެ މިނިސްޓަރުން ބައިވެރިވެވަޑައިގެންނެވިއިރު، ޕީއެންސީގެ މަޖިލިސް މެންބަރުންގެ މައްޗަށް ރައީސުލްޖުމްހޫރިއްޔާ ވަރަށް ބޮޑަށް ނުފޫޒު ފޯރުވާކަމުގެ އަޑުތައް ވަރަށް ބޮޑަށް ވަނީ ގަދަވެފަ އެވެ.