ރައީސް ޑރ. މުހައްމަދު މުއިއްޒު ދިވެހި ބައެއް ކެޔޮޅުންނާ މިއަދު ބައްދަލު ކުރެއްވުމުން މަހުގެ އަގު ދަށްކޮށްފައިވާތީ އެކަމުގެ ޝަކުވާ ކެޔޮޅުން ކޮށްފި އެވެ.

ރައީސް އޮފީހުގައި ބޭއްވި އެ ބައްދަލުވުމުގައި ކެޔޮޅުން ވަނީ މަހުގެ އަގު ދަށްވުމާއި ފައިސާ އާއި ތެޔޮ ލިބުމުގައި ހުރި ދަތިތަކުގެ އިތުރުން މަސް ކިރުމުގައި ހުރި ގޮންޖެހުންތައް ވެސް ރައީސްއާ ހިއްސާ ކޮށްފަ އެވެ.

އެ ބައްދަލުވުމުގައި، ރައީސް މުއިއްޒުގެ ވައުދާ އެއްގޮތަށް މަސްވެރިކަމުގެ ސިނާއަތް ކުރިއެރުވުމަށް ކުރައްވާ މަސައްކަތްތައް ކުރިއަށް ގެންދަން މަސްވެރިން ވަނީ އެމަނިކުފާނުގެ އަރިހުން އެދިވަޑައިގެންފަ އެވެ.

މީގެ އިތުރުން މަސްވެރިކަމުގެ ސިނާއަތުގައި ރަނގަޅު ކުރަން ބޭންވާ ކަންކަން ރައީސްއާ ހިއްސާ ކުރެއްވުމުގެ އިތުރުން ހުރި ކަންބޮޑުވުންތަކުގެ މައްޗަށް ވެސް ކެޔޮޅުން ވަނީ އަލި އަޅުވާލާފަ އެވެ.

"މިއަދުގެ ބައްދަލުކުރެއްވުމުގައި މަސްވެރިކަމުގެ ސިނާޢަތް ޒަމާނީ ޓެކްނޮލޮޖީގެ އެހީގައި ކުރިއެރުވުމަށް ކުރެވިދާނެ ކަންކަން ކެއުޅުން ހިއްސާކުރެއްވި. މީގެ އިތުރުން މަސްވެރިކަމުގެ މާކެޓް އިތުރުކޮށް މަހުގެ ފެންވަރު ނުވަތަ ކޮލިޓީ ރަނގަޅު ކުރުމަށް ކުރެވިދާނެ ކަންކަމާ ގުޅޭގޮތުން ވެސް މި ބައްދަލުކުރެއްވުމުގައި ފުޅާ ދާއިރާއެއްގައި މަޝްވަރާކުރެއްވި،" ރައީސް އޮފީހުން ބުންޏެވެ.

އެ ބައްދަލުކުރެއްވުމުގައި ރައީސް މުއިއްޒު ވަނީ ސަރުކާރުން މަސްވެރިންނާ އަދި ކެޔޮޅުންނާ ގާތުން، އެ ފަރާތްތަކުގެ ކަންބޮޑުވުންތަކަށް ހައްލު ލިބޭނެ ގޮތަށް މަސައްކަތް ކުރައްވާނެ ކަމުގެ ޔަގީންކަން ދެއްވާފަ އެވެ.

އަދި އެ ބައްދަލުކުރެއްވުމުގައި ފާހަގަކުރެއްވި ކަންކަން، ވަރަށް ސީރިއަސް ގޮތެއްގައި ބައްލަވައި، އެކަންކަމަށް އަވަސް ފިޔަވަޅުތަކެއް އެޅުއްވުމަށް މަސައްކަތް ކުރައްވާނެ ކަމަށް ވެސް އެމަނިކުފާނު ވިދާޅުވި އެވެ.

މި ސަރުކާރު ވެރިކަމަށް އައިއިރު، މަސް ކިލޯއެއްގެ އަގު އުޅުނީ 22ރ. ގަ އެވެ. ނަމަވެސް ސަރުކާރުން ވަނީ މަސް ގަންނަ އަގު ވަރަށް ބޮޑަށް ތިރިކޮށްލައިފަ އެވެ. މިހާރު ގަނޑުކުރި މަސް ކިލޯއެއް މިފްކޯއަށް ގަންނަނީ 16ރ. އަށެވެ. އަދި ގަނޑުނުކުރާ މަސް ކިލޯއެއް ގަންނަނީ 14ރ. އަށެވެ.