ރަށުގެ ބަޔަކު ސިހުރު ހަދާ ކަމަށް އާންމުން ކުރި ޝަކުވާތަކަކާ ގުޅިގެން ހއ. ކެލައަށް ފުލުހުން އަރައި، ފަސް މީހަކު ބަންދުކޮށް އެމީހުންގެ ގެތައް ބަލައި ފާސްކޮށްފި އެވެ.

ފުލުހުންގެ ބެލުމުގެ ދަށަށް ގެންދިޔަ މީހުން މިހާރު ދޫކޮށްލާފައިވާ ކަމަށް ފުލުހުން ބުނެ އެވެ. އެމީހުން ކުރި ކަމަށް ބެލެވޭ ކުށުގެ ތަފުސީލެއް ފުލުހުން ނުދެ އެވެ.

އެ ރަށުން މި ނޫހަށް މައުލޫމާތު ދިން މީހަކު ބުނާ ގޮތުގައި ހއ. ދިއްދޫގައި ތިބި ފުލުހުން އެ ރަށަށް ގޮސް ފާސްކުރީ ރަށުގެ އެކި މީހުންނަށް ސިހުރު ހަދާ ކަމަށް އަޑުފެތުރިފައިވާ މީހުންގެ ގެތަކެވެ. މި ޝަކުވާތައް އިތުރުވީ ރަށުގައި ބަލި ފެތުރި ގިނަ ބައެއްގެ ހާލު ދެރަވުމާ ގުޅިގެން ކަމަށްވެ އެވެ.

ފުލުހުންގެ މީޑިއާ ޓީމުން މިރޭ މި ނޫހަށް ފޮނުވި މެސެޖެއްގައި ބުނީ، ކެލާގެ ނުވަ ތަނެއް ބަލައި ފާސްކޮށް ފަސް މީހަކު ފުލުހުންގެ ބެލުމުގެ ދަށަށް ގެންދިޔައީ ލިބުނު ޝަކުވާތަކަކާ ގުޅިގެން ކަމަށެވެ. އެ ފަސް މީހުން ވެސް މިހާރު ވަނީ ދޫކޮށްލައިފަ އެވެ.

ނަމަވެސް، މި ޝަކުވާތަކާ ގުޅިގެން އިތުރަށް ބަލަން ޖެހޭ ކަންކަން ބަލަމުންދާ ކަމަށް ފުލުހުން ބުންޏެވެ.

އެ ރަށުން މައުލޫމާތު ދިން މީހުން ބުނި ގޮތުގައި ފުލުހުން ބަލައި ފާސްކުރި ގެތަކުން ބައެއް ތަކެތި ވަނީ ގެންގޮސްފަ އެވެ. ނަމަވެސް އެ ތަފުސީލެއް ފުލުހުން ނުދެ އެވެ.

ރާއްޖޭގެ ގިނަ ރަށްރަށުގައި ސިހުރުގެ މައްސަލަ ބޮޑު ނަމަވެސް ތަހުގީގީ އިދާރާތަކުން އެފަދަ މައްސަލަތައް ބަލާ މިންވަރު މަދެވެ. ސިހުރާ ގުޅުވައިގެން އިޖުތިމާއީ ބޮޑެތި މައްސަލަތައް ކުރިމަތިވެ އެވެ. ސިހުރު ހަދާ މީހުން ހުއްޓުވަން ކަމަށް ބުނެ ޖިނާއީ ބޮޑެތި ކުށްތަކަށް ވެސް މީހުން އަރައިގަނެފައިވެ އެވެ.