މާލޭ ފުޑް ކޯޓުގެ ފުރާޅުގެ ސަތަރި ބަދަލު ކުރަން އެތަނުގެ ގިނަ ކެފޭތަކެއް ބަންދު ކޮށްފި އެވެ.

އެސްޓީއޯއިން ބުނީ ފުޑް ކޯޓުގެ 4 ވަނަ ބްލޮކްގެ އަށް ކެފޭއެއް ބަންދުކުރީ ސަތަރި ބަދަލުކުރުމާއެކު، އެ ތަންތަނުގައި ހުރި އިތުރު މަރާމާތުތައް ވެސް ކުރުމަށް، ތިން މަސް ދުވަހަށް ކަމަށެވެ.

މިހާރު ބަންދުކޮށްފައި ހުރީ ޓީޖެޓީއަށް ވަންނަ ދިމާގައި ހުރި ކެފޭ ތަކެވެ.

"މި ވަގުތު ކުއްޔަށް ހިފާފައިވާ މީހުންނާއެކު ވަނީ އެރޭންޖުމަންޓެއް ހެދިފައި. [އެ ތަންތަން] ތިން މަސް ދުވަހަށް ފަހު ހަމަ ހުޅުވާފައި ކުރިއަށް ދާނީ،" އެސްޓީއޯގެ މީޑިއާ އޮފިޝަލް ވިދާޅުވި އެވެ.

ފުޑް ކޯޓުތައް ހަދައި ހުޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.

ފުރާޅު ބަދަލު ކުރަން ބަންދުކުރި ކެފޭތަކުގެ އިތުރުން، އެހެން ބްލޮކްތަކުގެ ބައެއް ކެފޭތައް ވެސް ބަންދުކޮށްފައި އެބަ ހުއްޓެވެ.