ގދ. ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން އެދި ހައި ކޯޓަށް ދުސްތޫރީ މައްސަލައެއް ހުށަހަޅާފައިވަނިކޮށް، ތިނަދޫއަށް ސިޓީގެ ދަރަޖަ ހޯދީ އާބާދީ އޮޅުވާލައިގެން ކަމަށް ބުނެ އެ މައްސަލަ ބަލައިދޭން ރައްޔިތުންގެ މަޖިލީހަށް ވެސް މައްސަލައެއް ހުށަހަޅައިފި އެވެ.

އެ މައްސަލަ ބަލައިދޭން ހުށަހެޅީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ. އެ ސިޓީގައި އެދިފައި ވަނީ ކަމާ ގުޅޭ މުއައްސަސާތަކާއި އިދާރާތައް މަޖިލީހަށް ހާޒިރުކޮށްދީގެން އެ މައްސަލަ ބަލައިދިނުމަށެވެ.

ސައުދުﷲ ގެ ސިޓީގައި މައިގަނޑު ގޮތެއްގައި ބުނެފައިވަނީ، ތިނަދޫ އަށް 2023 ގައި ސިޓީގެ ދަރަޖަ ދިނީ ލާމަރުކަޒީ ގާނޫނާ ހިލާފަށް ކަމަށެވެ. އެގޮތުން 2022 އިން ފެށިގެން ތިނަދޫ ކައުންސިލުން އެ ރަށުގެ އާބާދީއާ ގުޅޭ ތަފާސްހިސާބުތައް އޮޅުވާލާފައިވާ ކަމަށް އޭނާ ވަނީ ތުހުމަތުކޮށްފަ އެވެ.

އެގޮތުން އެ ރަށުގެ ރަޖިސްޓްރީގައި އެހެން ރަށްރަށުގެ މީހުންގެ ނަން ހިމެނުމާއި ތަކުރާރުކޮށް އެކެއްގެ ނަން ހުރުމާއި މަރުވެފައިވާ މީހުން ދިރިތިބި މީހުންގެ ގޮތުގައި ޖަހާފައިވާ ކަމަށް ވެސް ސައުދުﷲ ގެ ސިޓީގައި ވިދާޅުވެފައިވެ އެވެ.

މިއީ އޭރު ރަށު ކައުންސިލްގައި ތިބި ކައުންސިލަރުން، ބޮޑު މުސާރަ އާއި ބަޖެޓު ހޯދުމަށް ކުރި މަސައްކަތެއް ކަމަށާއި ތިނަދޫގެ އަސްލު އާބާދީ 8،000 އަށް ވެސް ނާރާކަން އެލްޖީއޭ އަދި ޑީއެންއާރު އަށް އެނގިފައިވާ ކަމަށް ވެސް އޭނާގެ ސިޓީގައިވެ އެވެ.

މީގެ އިތުރުން، ސިޓީގެ ދަރަޖަ ދިނުމާއެކު އޭރު އޮތް ރަށު ކައުންސިލް ސިޓީ ކައުންސިލަށް ބަދަލުކޮށް ކައުންސިލްގެ ރައީސަށް މޭޔަރުގެ މަގާމު ދިނުމާއި އަލަށް ލިބުނު ބޮޑު ބަޖެޓުގައި ބޭކާރު އެތައް ހަރަދެއްކޮށް، ކައުންސިލްގެ މެޖޯރިޓީ އޮތް އިދިކޮޅު އެމްޑީޕީގެ މެންބަރުންނަށް ވަޒީފާތަކެއް ދިން ކަމަށް ވެސް ސައުދުﷲ ވިދާޅުވި އެވެ.

ދާއިރާގެ މެންބަރުންގެ ޝަކުވާ ހުރި ކަމަށް ބުނެ، ސައުދުﷲ މަޖިލީހަށް ސިޓީ ފޮނުވާފައި މިވަނީ ތިނަދޫގެ ސިޓީގެ ދަރަޖަ ބާތިލުކުރަން އެދި ހައި ކޯޓަށް ދުސްތޫރީ މައްސަލައެއް ހުށަހެޅިތާ ހަފުތާއެއް ވެސް ނުވަނީހެވެ. އެ މައްސަލަ ހައި ކޯޓަށް ހުށަހެޅީ ގާނޫނީ ވަކީލު އަދި ތިމާވެއްޓާ ބެހޭ މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާގިބު އަހުމަދު އެވެ.

ރައީސް އޮފީހާ ދެކޮޅަށް މި މައްސަލަ ހުށަހެޅުމުން، ރައީސް ޑރ. މުހައްމަދު މުއިއްޒު ވަނީ ރާގިބު ހުންނެވި ސިޔާސީ މަގާމުން އޭނާ ވަކިކުރައްވާފަ އެވެ.