މެންޗެސްޓާ (ނޮވެމްބަރު 29) - ޔޫރޮޕާ ލީގުގައި ރޭ ބޯޑޯ/ގިލްމްޑް 3-2 އިން ބަލިކޮށް، މެންޗެސްޓާ ޔުނައިޓެޑުން އާ ކޯޗު ރުބެން އަމޮރިމްއާ އެކު ފުރަތަަމަ މޮޅު ހޯދިއިރު، ރޯމާ އިން ފަހު ވަގުތު ލަނޑު ޖަހައި، 2-2 އިން ޓޮޓެންހަމް ހޮޓްސްޕާއާ އެއްވަރުކޮށްފި އެވެ.

އަމޮރިމްގެ ފުރަތަމަ މެޗުގައި، އިނގިރޭސި ޕްރިމިއާ ލީގުގައި އިޕްސްވިޗް ޓައުންއާ ވީ އެއްވަރެވެ. އެ މެޗެކޭ އެއްގޮތަށް ރޭގެ މެޗުގައި ވެސް ފުރަތަމަ މިނިޓްގައި ޔުނައިޓެޑުން ލީޑުނެގި އެވެ. މި ލަނޑު ޖެހީ އަލެހަންދްރޯ ގާނާޗޯ އެވެ. އެކަމަކު، ހަތަރު މިނިޓް ތެރޭ ދެ ގޯލު ޖަހައި، ބޯޑޯ އިން ވަނީ ނަތީޖާ އަނބުރާލައިފަ އެެވެ. މި ލަނޑުތައް ޖެހީ، ހަކޯން އެވްޖެން އާއި ފިލިޕް ޒިންކަނާޖެލް އެވެ.

ޔުނައިޓެޑުން ވަނީ އަނެއްކާ ވެސް ނަތީޖާ އަނބުރާލައި މެޗުން މޮޅުވެފަ އެވެ. ޔުނައިޓެޑްގެ ދެ ލަނޑު ޖެހީ ރަސްމުސް ހޮއިލުންޑް އެެެވެ.

މި ފަހަރުގެ ޔޫރޮޕާ ލީގުގައި ޔުނައިޓެޑުން ކުޅުނު ފުރަތަމަ ތިން މެޗުން ވަނީ ކުރީގެ ކޯޗު އެރިކް ޓެން ހާގް ހަވާލުވެހުރިއިރު، އެއްވަރުވެފަ އެވެ. ދެން ކުޅުނު ދެ މެޗުން ޔުނައިޓެޑް މި ވަނީ މޮޅުވެ، ފަސް މެޗުން ނުވަ ޕޮއިންޓް ހޯދައި 12 ވަނަ އަށް ޖެހިލައިފަ އެވެ.

ޓޮޓެންހަމް އިން ރޭ ސޮން ހެއުން މިންގެ ގޯލުން ލީޑުނެގި އެވެ. އެކަމަކު، އިވާން އެންޑިކާ ވަނީ ރޯމާ އަށް އެއްވަރުކޮށްދީފަ އެވެ. ދެ ވަަނަ ފަހަރަށް ޓޮޓެންހަމް އިން ލީޑުނެގީ ބްރެނަން ޖޯންސަން ޖެހި ގޯލުންނެވެ.

މެޗުން، ޓޮޓެންހަމް މޮޅުވާން ދަނިކޮށް އިތުރު ވަގުުތުގައި ރޯމާ އަށް އެއްވަރުކޮށްދިން ލަނޑު ޖަހައިިދިނީ، ޖަރުމަނުގެ ތަޖުރިބާކާރު ޑިފެންޑަރު، މެޓްް ހަމެލްސް އެވެ. މިއީ، މިދިޔަ ސީޒަނުގެ ޗެމްޕިއަންސް ލީގު ފައިނަލަށް ފަހު ހަމެލްސް ޔޫރަޕްގައި ކުޅުނު ފުރަތަމަ މެޗެވެ.