ރައީސް ޑރ. މުހައްމަދު މުއިއްޒުގެ ޕްރޮމޯޓު ކުރަން އުފެއްދި އެމްއެމްޓީވީގެ މައި ކުންފުނި، މޯލްޑިވްސް މީޑިއާ ހައުސް ޕްރައިވެޓް ލިމިޓެޑުން، އެންސްޕާއަށް ބޮޑު އަގެއްގައި އޮފީސް އިމާރާތެއް ކުއްޔަށް ދިން ވާހަކަ ފެތުރެން ފެށުމާއެކު، އެ މުއާމަލާތުގެ ފުނަށް ފީނި ވަރަކަށް ކަންކަން އެބަ ތިލަވެ އެވެ.

މާޗު 17، 2024 ގައި ރަޖިސްޓްރީ ކުރި މީޑިއާ ހައުސް ކުންފުނިން ވަނީ، މއ. ސީރާޒީގޭގެ ގިނަ ފަންގިފިލާއެއް ކުއްޔަށް ނަގައިފަ އެވެ. އޭގެ ތެރެއިން އެންސްޕާއަށް ކުއްޔަށް ދިނީ ތިން ފަންގިފިލާއެކެވެ.

އެންސްޕާގެ އިއުލާނުތައް

• ފެބުރުއަރީ، 2024: 5000 އަކަފޫޓާއި 7000 އަކަފޫޓާއިދެމެދުގެ އޮފީހެއް ހޯދަން ގެޒެޓުކުރި
• މާޗް، 2024: 2800 އަކަފޫޓާއި 3800 އަކަފޫޓާއި އަކަފޫޓާ ދެމެދުގެ އޮފީހެއް ހޯދަން ގެޒެޓުކުރި
• ޖުލައި، 2024: 12000 އަކަފޫޓުގެ އޮފީހެއް ހޯދަން ޓެންޑަ ބޯޑު މެދުވެރިކޮށް އިއުލާނު ކުރި

ފިނޭންސް މިނިސްޓްރީ މެދުވެރިކޮށް ޓެންޑަ ބޯޑުން ޖުލައި މަހު ހުޅުވާލި ބީލަމަށް ހުށަހެޅީ މޯލްޑިވްސް މީޑިއާ ހައުސް ޕްރައިވެޓު ލިމިޓެޑުން އެކަންޏެވެ. އެ ކުންފުނިން ހުށަހެޅި އަގަކީ ފަސް އަހަރަށް 34.8 މިލިއަން ރުފިޔާ އެވެ. އެއީ މަހަކަށް 580،000ރ. އެވެ.

ސީރާޒީގޭގެ ގޯތީގެ ބޮޑުމިނަކީ 4365 އަކަފޫޓެވެ. އެހެންވެ، އެންސްޕާގެ އޮފީސް އިމާރާތާ ގުޅޭ އިއުލާނުގައިވާ 12،000 އަކަފުޓޫގެ ޖާގަ ހަމަވާނީ ތިން ފަންގިފިލާއިންނެވެ. ޖުމުލަ ކުއްޔަށް ބަލާއިރު، ފަންގިފިލާއެއް ކުއްޔަކީ މަހަކަށް 193،333ރ. އެވެ.

"އަދަދު" ނޫހުން އެއްކުރި މައުލޫމާތަށް ބަލާއިރު، މިއީ ސީރާޒީގޭ ވެރިފަރާތުން އެހެން ބައެއް ފަރާތްތަކަށް ދީފައިވާ އަގަށް ވުރެ، މާ ބޮޑު އަގެކެވެ. ގޭގެ ވެރިފަރާތުން އެހެން ބައެއް ފަރާތްތަކަށް ކުއްޔަށް ދޫކޮށްފައިވާ ފަންގިފިލާގެ ކުއްޔަށް ބަލާއިރު، އެންސްޕާއިން ދޭ ފައިސާއިން، ޖުމުލަ ފަސް ފަންގިފިލާގެ އަގު ހަމަޖެއްސިދާނެ އެވެ.

މިކަމާ ގުޅޭ ގޮތުން މީޑިއާ ހައުސްއިން ބަހެއް ނުލިބުނެވެ.

މޯލްޑިވްސް މީޑިއާ ހައުސްގައި މުއިއްޒުގެ މަސްލަހަތު އެބަ އޮތްތަ؟

މޯލްޑިވްސް މީޑިއާ ހައުސް ރަޖިސްޓްރީކުރިއިރު ހިއްސާދާރުންގެ ގޮތުގައި އަދި ޑިރެކްޓަރުންގެ ބޯޑުގައި ތިބީ ތިން މީހެކެވެ. އެއީ ރައީސްގެ އަމިއްލަގެ މ. ދިމްޔާތު ބެލެހެއްޓުމުގައި މިހާރު އިސްކޮށް ހުންނެވި، ހއ. ވަށަފަރު، ހުސްނުހީނާގޭ، އަބްދުﷲ ޒާހިރު އާއި ރައީސް އޮފީހުގެ މިނިސްޓަރު ހަލީލުގެ ދޮންދަރި، ގ. ދަނބުކޮކާ، އަހުމަދު ސައިފް ހަލީމް އަދި އައިޝަތު ޝީރީނާ ކިޔާ މީހެކެވެ. މީޑިއާ ހައުސް، ރަޖިސްޓްރީކޮށްފައި ވަނީ ހަލީލު ދިރިއުޅުއްވާ، ގ. ދަނބުކޮކާގަ އެވެ.

ކުންފުނި ރަޖިސްޓްރީ ކުރިއިރު ސައިފް އާއި ޝީރީނާ ހިއްސާދާރުންގެ ގޮތުގައި ތިއްބަސް، އެމްއެމް ޓީވީން ބްރޯޑްކާސްޓްކުރަން ފެށީ އެ ދެ މީހުންގެ ނަން ކުންފުނިން އުނިކޮށް، ހަމައެކަނި އަބްދުﷲ ޒާހިރު އަށް މުޅި ކުންފުނި ބަދަލުކޮށްފަ އެވެ.

އަދަދު ނޫހުގެ ލެންސަށް ޒާހިރު ފުރަތަމަ އެރީ 20 ވަނަ މަޖިލީހުގައި ތިއްބެވި ޕީއެންސީ މެންބަރުންނަށް ރައީސް މުއިއްޒުގެ ފަރާތުން ދެމުންދިޔަ ބައިލައްކަ ރުފިޔާއާ ގުޅޭ ގޮތުން ގެނެސްދިން ޑޮކިއުމެންޓަރީގަ އެވެ. މަޖިލީހުގެ ދުވާފަރު ދާއިރާގެ މެންބަރު މުހައްމަދު އަލީއާއެކު ޒާހިރު، ކަޅު ދަބަހަކާއި ފޮތި ކޮތަޅެއް ހިފައިގެން ދިމްޔާތުން ޕީއެންސީ އޮފީހަށް އޭރު ދިޔަ އެވެ.

އޭނާއަކީ މީޑިއާގެ ބެކްރައުންޑު ހުރި، އަދި އެފަދަ ވިޔަފާރިއެއް ކުރިން ކުރި މީހެއް ނޫނެވެ. ކުއްލިއަކަށް އަގުބޮޑު ޓީވީ ސްޓޭޝަނަކަށް ގިނަ މުވައްޒަފުންތަކެއް ނަގައި، ޒަމާނީ ވަސީލަތްތަކާއެކު ސިގްނަލް ދޫކޮށްލާފައި އެވަނީ މައިގަނޑު ގޮތެއްގައި ރައީސް މުއިއްޒު ޕްރޮމޯޓުކުރުމަށެވެ. އެ ފެންވަރުގައި ޓީވީ ސްޓޭޝަނެއް ހިންގުމަކީ ކުޑަ ހަރަދަކުން ވާނެ ކަމެއް ނޫނެވެ.

އެމްއެމްޓީވީން ރައީސް މުއިއްޒު ޕްރޮމޯޓު ކުރިޔަސް، އެތަނާއި އެ މަނިކުފާނާ އެއްވެސް ގުޅުމެއް ނެތް ކަމަށް، ރައީސް އޮފީހުގެ ތަރުޖަމާނު އަދި އެންސްޕާގެ ސީއީއޯ ހީނާ ވަލީދު ވިދާޅުވި އެވެ.

އެމްއެމްޓީވީ ހުޅުވި ރޭ ޒާހިރުގެ ދެ ފަރާތުގައި ތިއްބެވީ ރައީސް އޮފީހުގެ މިނިސްޓަރު އިބްރާހިމް ހަލީލު އާއި، އޭނާގެ ޒަމާންވީ އެކުވެރިޔާ، ރައީސް އޮފީހުގެ ޑެޕިއުޓީ މިނިސްޓަރު މުހައްމަދު އިކްރާމް އަބްދުއްލަތީފް އެވެ.

ހަލީލު ވިދާޅުވީ އޭނާ އެތަނުގައި އަދާކުރަމުން ދަނީ ކޮންސަލްޓެންޓެއްގެ ދައުރެވެ.

ކުރިން އުފެއްދީ ސިޓީ މީޑިއާ ޕްރައިވެޓް ލިމިޓެޑް

ރައީސް މުއިއްޒު ފަހަތުގައި ހުންނަވައިގެން އަމިއްލަ މީޑިއާއެއް ހިންގެވުމަށް 2021 ވަނަ އަހަރު ސިޓީ މީޑިއާ ޕްރައިވެޓު ލިމިޓެޑްގެ ނަމުގައި ރަޖިސްޓްރީކުރި ކުންފުނީގެ ހިއްސާދާރުންނަކީ، ހަލީލު އާއި އިކްރާމްގެ ހިއްސާ އޮންނަ މޯލްޑިވްސް ނިއުސްނެޓްވޯކް ޕްރައިވެޓް ލިމިޓެޑާއި، ރައީސްގެ ދެބެއިންގެދެދަރި އަހުމަދު ގާލިބެވެ.

މޭޔަރުކަމުގައި މުއިއްޒު ހުންނެވި ދުވަސްވަރު އުފެއްދި އެ ކުންފުނި ރަޖިސްޓްރީކޮށްފައި ވަނީ، ދިމްޔާތުގެ ކުރިމަތީގައި ހުންނަ ގެއެއްގަ އެވެ. އެތަނުން އޮފީހެއް ނަގައިގެން ފެށި މީޑިއާ އެފަހަރު ކާމިޔާބެއް ނުވި އެވެ.

ރިޔާސީ އިންތިހާބަށް ސޯޝަލް މީޑިއާ ޕްލެޓުފޯމުތަކުގައި "މުއިއްޒު ޓީވީ" ވެސް ނަމުގައި ވެސް ޗެނަލެއް ހިންގި އެވެ. އެ މަސައްކަތުގައި ވެސް އިސްކޮށް އުޅުއްވީ ހަލީލް އާއި އިކްރާމް އެވެ. ވެރިކަމަށް ވަޑައިގަތުމަށް ފަހު، ފެނިގެން މިދިޔައީ އަގުބޮޑު އެމްއެމްޓީވީ އެވެ.

ދައުލަތަށް ގެއްލުން

މާލިއްޔަތު ގަވާއިދުގައި ބަޔާންކޮށްފައިވާ ގޮތުގައި، ދައުލަތުގެ ޕްރޮކިއުމަންޓް ނިޒާމު ހިންގުމުގައި މައިގަނޑު ގޮތެއްގައި ބަލަންވާ ކަންތައްތަކުގެ ތެރޭގައި ދައުލަތުގެ ފައިސާ ހޭދަކުރެވެނީ، ވާދަވެރި މާހައުލެއްގެ ތެރެއިން، އިގުތިސާދީ ގޮތުން އެންމެ ފައިދާހުރި ގޮތުގައިތޯ ޔަގީންކުރަންޖެހެ އެވެ.

ދައުލަތުގެ އިދާރާތަކުގެ އޮފީސް ހިންގަން އިމާރާތުގެ ވެރިފަރާތުން ނުވަތަ ޑިވެލޮޕަރުގެ އަތުން ފިޔަވައި ކުއްޔަށް ތަނެއް ހިފުމަކީ ދައުލަތުގެ މަސްލަހަތަށް، އަދި މާލީ ގޮތުން ބެލިޔަސް ފައިދާ ހުރި ގޮތަށް ނުވާނެ އެވެ. އެންސްޕާ އޮފީސް އިމާރާތުގެ މުއާމަލާތުން ވެސް ފެންނަނީ އެކަމެވެ.

އެންސްޕާއަށް އޮފީސް އިމާރާތެއް ހޯދަން ގެޒެޓުގައި ކުރި ދެ އިއުލާނުގައި ތަޖުރިބާ ވަޒަންކުރުން ހިމަނާފައި ވިޔަސް، ޓެންޑަ ބޯޑު މެދުވެރިކޮށް ހުޅުވާލި ބީލަމުގައި ތަޖުރިބާގެ ގޮޅި ނެތެވެ. އެއީ ކޮރަޕްޝަން ކަމަށް ފިނޭންސް ޓެންޑަ ބޯޑުގެ ކުރީގެ ޗެއާމަން އިސްމާއީލް ޒަރިޔަންދު ވިދާޅުވި އެވެ.

"ދައުލަތަށް ތަނެއް ކުއްޔަށް ހިފަން ކުރި ފުރަތަމަ އިއުލާން ބާތިލުކުރުމަށް ފަހު، ދެންކުރި އިއުލާން ފަރުމާކުރީ، އާ ޝަރުތުތަކަކާއިއެކު [އެހެން ފަރާތްތަކަށް ކުރިމަތިލުމަށް އޮތް ފުރުސަތު ހަނިކޮށްގެން] ހަމައެކަނި އިމާރާތް ކުއްޔަށް ދިންފަރާތަށް ފުރުސަތު ލިބޭ ގޮތަށް ކަމަށްވުމަކީ ކޮރަޕްޝަން،" އެކްސްގައި ކުރެއްވި ޕޯސްޓެއްގައި ޒަރިޔަންދު ވިދާޅުވި އެވެ.

ރައީސް މުއިއްޒު ޕްރޮމޯޓުކުރަން އުފެއްދި ޓީވީ ޗެނަލްގެ ކުންފުނިން، ބޮޑު އަގުގައި އެންސްޕާއަށް އޮފީހެއް ކުއްޔަށް ދިންކަން ހާމަވުމާއެކު، ގިނަ ބައެއްގެ ފާޑުކިޔުން އޮއްސައިލި އެވެ. އެ މުއާމަލާތާ ގުޅޭ ގޮތުން އެންސްޕާއިން ބަހެއް ނުބުނެ ތިބުމަށް ފަހު، މައްސަލަ ފޮނުވީ އޭސީސީއަށެވެ.

~~

ރައްޔިތުންނަށް ސިއްހީ ހިދުމަތް ފޯރުކޮށްދޭން އޮތް އެންސްޕާއިން ބޮޑު ހަރަދެއް ދާ ގޮތަށް ހިންގާފައިވާ މި މުއާމަލާތުގެ ފައިދާ ބުރަވަނީ ރައީސް ޕްރޮމޯޓުކުރަން އުފެއްދި މީޑިއާ ހައުސް އަށެވެ.

މި ކުންފުނީގެ ވެރިޔަކީ، އިއްޔެ މިފަދަ ބޮޑު އެއްވެސް އިންވެސްޓުމެންޓެއް ކުރި މީހަކަށް ނުވުމާއި އޭނާގެ ވަށައިގެން ހުރި ސިޔާސީ ކަންކަންކަމާއި، ކުރީގެ ސަފުހާތައް ވަޒަން ކުރާއިރު، އެންސްޕާގެ މި މުއާމަލާތުގެ މައްސަލަ އޭސީސީގެ އިތުރުން އޮޑިޓަ ޖެނެރަލް އަދި ރައްޔިތުންގެ މަޖިލީހުން ވެސް ބަލައި ރައްޔިތުންނަށް ކަންކަން ހާމަކުރަން ޖެހެ އެވެ. އެހެން ނޫނީ ދެން ލިބޭ ގެއްލުންތައް މާބޮޑުވެދާނެ އެވެ.