ރައީސް ޑރ. މުހައްމަދު މުއިއްޒު އަދި ސަރުކާރުގެ އިސްވެރިންގެ އަބުރަށް އުނިކަން އަންނާނެ ގޮތަށް ވާހަކަ ދެއްކި ކަމަށް ބުނެ ގދ. ގައްދޫ ކައުންސިލްގެ ރައީސްގެ މުހައްމަދު އަހުމަދުގެ މައްސަލަ ބަލަން ލޯކަލް ގަވަމެންޓް އޮތޯރިޓީ (އެލްޖީއޭ) އިން އަންގައިފި އެވެ.

އެލްޖީއޭގެ ރައީސް މުހައްމަދު ނިމާލް ސޮއިކުރައްވައި، އެ އަތޮޅު ކައުންސިލްގެ ރައީސް ހަސަން ފައިހަތަށް ފޮނުވި ސިޓީގައި ވިދާޅުވެފައިވަނީ ގައްދޫ ކައުންސިލްގެ ރައީސް، ރައީސް މުއިއްޒުއަށާއި ސަރުކާރުގެ އިސްވެރިންގެ އަބުރަށް އަރައިގަތީ ކައުންސިލްގެ ވަޓްސްއެޕް ގްރޫޕެއްގައި ކަމަށެވެ.

ނަމަވެސް މުހައްމަދު ފޮނުއްވި މެސެޖުތަކުގެ ތަފުސީލެއް ސިޓީގައި ނެތެވެ. ނިމާލް އަންގަވާފައިވަނީ މައްސަލަ ބަލާ އެކަން އިސްލާހުކުރުމަށް އެންގުމަށެވެ. ނަމަވެސް މި އެންގުމާ ގުޅިގެން އަތޮޅު ކައުންސިލުން މިހާތަނަށް ގައްދޫ ރައީސަށް ފިޔަވަޅެއް އަޅާފައެއް ނުވެ އެވެ.

ގައްދޫ ކައުންސިލްގެ ރައީސް މުހައްމަދު އަކީ ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ދައުވާކުރި މީހެކެވެ. ވެރިކަންކުރާ ޕީއެންސީ ކޯލިޝަނުގެ ޓިކެޓުގައި އޭނާ ލޯކަލް ކައުންސިލް އިންތިހާބު ކާމިޔާބުކުރީ ކ. މާފުށީ ޖަލު ބަންދުގައި ހުއްޓަ އެވެ.

އިންތިހާބަށްފަހު މި ދައުވާއިން އޭނާ ސަލާމަތްވީ، ފޭސްބުކްގެ މެސެންޖާއިން ބަރަހަނާ ފޮޓޯ ފޮނުވީ އަހްމަދުގެ އެކައުންޓުންކަން އެކަށީގެންވާ ވަރަށް ދައުލަތަށް ސާބިތު ކޮށްދެވިފައި ނުވާތީ ކަމަށް ބުނެ ކޯޓުން ހުކުމް ކުރުމުންނެވެ.

އޭނާ އިންތިހާބުވުން ގިނަ ބައެއްގެ ފާޑުކިޔުން އަމާޒުވުމާ ގުޅިގެން އިލެކްޝަން ކޮމިޝަންގެ އޭރުގެ ރައީސް އަހުމަދު ޝަރީފް ވިދާޅުވެފައިވަނީ، ކޯޓުގައި މައްސަލައެއް އޮތުމަކީ އިންތިހާބަށް ކުރިމަތިލާފައިވާ މީހެއްގެ ކެންޑިޑެސީ ބާތިލުވާ ކަމެއް ނޫން ކަމަށެވެ.

ގާނޫނުގައި ބުނާ ގޮތުން މީހެއްގެ ކެންޑިޑެސީ ބާތިލު ކުރެވޭނީ، ނުވަތަ އޭނާގެ ޝަރުތު ހަމަ ނުވާކަމަށް ބެލެވޭނީ ރާއްޖޭގެ އެއްވެސް ކޯޓެއްގައި އޭނާގެ މައްޗަށް ޖިނާއި ކުށެއް ނުވަތަ ދަރަނީގެ މައްސަލައެއް ޝަރީއަތަށް ސާބިތުވެފައިވާ ނަމަ އެވެ.

މި ނޫހަށް އެނގިފައިވާ ގޮތުގައި މުހައްމަދު މި ސަރުކާރާ ދެކޮޅު ފާޑުކިޔަމުން ދަނީ، ޕީއެންސީ ކޯލިޝަނުގެ ކުރީގެ ލީޑަރު، ކުރީގެ ރައީސް އަބްދުﷲ ޔާމީނު ކޯލިޝަނާ ދުރަށް ޖެހިވަޑައިގަތުމުންނެވެ.