ސްކޭމް ކޮށްގެން ބައެއްގެ އަތުން ފައިސާ ފޭރުމުގެ ފަހަތުގައި ހުރީ ފުލުހެއް ކަމަށް ތުހުމަތު ކުރެވިއްޖެ އެވެ.

އެ ފުލުސް މީހާއަށް ކުރަނީ މީހެއްގެ ވައިބާ ހެކު ކޮށްގެން، އެކި މީހުންނަށް މެސެޖުކޮށް ފައިސާ ހޯދި ކަމުގެ ތުހުމަތެވެ. އެ ސްކޭމްގައި ޖެހުނު ތިން މީހުން ވެސް ތުހުމަތުގެ އިނގިލި ދިއްކުރަނީ އެ ފުލުސް މީހާއަށެވެ.

އެ ތުހުމަތުތަކާ ގުޅިގެން "އަދަދު" ނޫހުން އެއްކުރި މައުލޫމާތުތަކުން ތުހުމަތު ކުރުމުގެ ޖާގަ ތަނަވަސްވާވަރުގެ ހެކި ލިބިފައިވެ އެވެ.

މި ނޫހަށް ލިބުނު މައުލޫމާތުތަކުން އެނގޭ ގޮތުގައި ސްކޭމްގައި ޖެހުނު ތިން މީހުން ވެސް ފައިސާ ފޮނުވާފައި ހުރީ ތުހުމަތު ކުރާ ފުލުސް މީހާގެ އަނބިމީހާގެ އެކައުންޓަށެވެ. އެއީ ސްކޭމެއްކަން އެނގިގެން އެކައުންޓުގެ ވެރި ފަރާތް ހޯދައިގެން ގުޅުމުން، ކަން ވީގޮތް ކިޔައިދިނުމުގެ ބަދަލުގައި ދޮގު ހެދުމާއި އޮޅުވައިލުން އެއީ ގެއްލުން ލިބުނު މީހުން ފުލުސް މީހާއަށް ތުހުމަތުގެ އިނގިލި ދިއްކުރާ ބައެއް ސަބަބުތަކެވެ.

ކަން ހިނގާދިޔަ ގޮތް

މައްސަލަ ފެށުނީ އެޗްޑީސީގެ ޕޯޓަލް ކަމަށް ބުނެ މީހަކު ފޮނުވި ލިންކަކަށް އާތިފް (އަސްލު ނަމެއް ނޫން) ގެ ފޯނުން މިދިޔަ އަންގާރަ ދުވަހު ވަނުމާ އެކު އެވެ. އެ ޕޯޓަލްއަށް ވަދެ އީމެއިލް ޖެހުމާއެކު އެއީ ސްކޭމެއްކަން އެނގުނު ކަމަށް އޭނާ ބުންޏެވެ.

"ވަދެ އީމެއިލް އެޑްރެސް ޖެހީމަ ފެންނަން ފެށީ އަންހެން ކުދިންތަކެއް، އެހިސާބުން އެނގިއްޖެ މިއީ ސްކޭމެއްކަން، ވަގުތުން މަ އީމެއިލް ރިކަވާއަށް ޖަހާފައި ފޯނު ރީސެޓު ކޮށްލީ، އެކަމު ވައިބާގެ ސެކިއުރިޓީ ފީޗާސް ދަށްވީމަ އެމީހުންނަށް ލިބުނީ ވައިބާ އެކަނި،" އާތިފް ކިޔައިދިނެވެ.

އޭނާގެ ވައިބާ ހެކު ކުރި ބަޔަކު، އެ ވައިބާ އެކައުންޓު މެދުވެރިކޮށް އާތިފްގެ ކޮންޓެކްޓު ލިސްޓުގައި ހުރި ނަންބަރުތަކަށް ފައިސާ ހޯދުމަށް މެސެޖު ކުރަމުންދިޔަ އެވެ. އޭރު އެހެން ފޯނަކުން، އާތިފް ވެސް ދިޔައީ އޭނާގެ އަމިއްލަ ވައިބާ އެކައުންޓު އޮޕަރޭޓު ކުރަމުންދިޔަ ހެކަރާ ވާހަކަ ދައްކަމުން ކަމަށް އޭނާ ބުންޏެވެ.

"އަހަރެން އާދޭސް ކުރިން، ހެޔޮ ނުވާނޭ ދޫކޮށްލަދޭށޭ އަހަރެންގެ ވައިބާ، އަހަންނަކީ ނުކުޅެދޭ ދަރިއަކު ގޮވައިގެން އުޅޭ މީހެކޭ، ވަރަށް ހާލުގައި އުޅޭ މީހެކޭ، ވަޒީފާގައި އުޅެނީ ވެމްކޯގަ އޭ، މި ހުރިހާ އެއްޗެއް ކީން، އެކޮޅުން ބުނަނީ 12 ގަޑިއިރު ފަހުންނޯ ދޫކޮށްލެވޭނީ [ވައިބާ]،" އާތިފް ބުންޏެވެ.

އާތިފްގެ ވައިބާ ހެކް ކޮށްގެން، އެ ވައިބާ ބޭނުން ކޮށްގެން ފައިސާ ހޯދަން މީހުންނަށް މެސެޖުކޮށް ހިންގަމުންދިޔަ ސްކޭމްގައި ޖެހުނީ އާތިފް ކޮންޓެކްޓު ލިސްޓުގައި ތިބި ތިން މީހުންނެވެ.

އެ ތިން މީހުން ވެސް ފައިސާ ފޮނުވާފައި ހުރީ ސްކޭމަރު ފޮނުވި އިސްލާމިކް ބޭންކުގެ އެކައުންޓަކަށެވެ. އަންގާރަ ދުވަހުގެ މެންދުރުފަހު 2:00 އާއި 2:30 އާ ދެމެދު އެ ތިން މީހުން ޖުމުލަ 10،100ރ. ސްކޭމަރު ފޮނުވި އެކައުންޓަށް ޖަމާކުރި އެވެ.

އެއީ ސްކޭމެއްކަން، ފައިސާ ފޮނުވި މީހުންނަށް އެނގުނީ އާތިފްގެ ފޭސްބުކަށް ހަވީރު ވަދެވުމުން، ވައިބާ ހެކްވި ވާހަކަ ސްޓޭޓަސްގައި ޖެހުމުންނެވެ.

އާތިފްގެ ސްޓޭޓަސް ފެނުމާއެކު ސްކޭމްގައި ޖެހި، ސްކޭމަރު ފޮނުވި އެކައުންޓުގެ ވެރި ފަރާތަކީ ކާކުތޯ ބަލައި އޭނާއަށް ގުޅޭނެ ގޮތެއް ހޯދުމުގެ މަސައްކަތް އެ އެކައުންޓަށް ފައިސާ ފޮނުވި ލަމްއާން (އަސްލު ނަމެއް ނޫން އަދި ސްކޭމްގައި ޖެހުނު ތިން މީހުންގެ ތެރެއިން އެކަކު) ފެށި ކަމަށް އޭނާ ބުންޏެވެ. އޭނާ ބުނީ ސްކޭމަރު ފޮނުވި އެކައުންޓަކީ އަންހެނެއްގެ އެކައުންޓެއް ކަމަށެވެ.

"އެ ސްޓޭޓަސް ފެނުނީމަ އެނގިއްޖެ ދޯ، މިއީ ސްކޭމެއްކަން، ދެން ވަގުތުން މަ، އެ ހޯދި ގޮތަކަށް ހޯދައިފިން މި [ފައިސާ ފޮނުވި] އެކައުންޓުގެ ވެރި މީހާއަކީ ކާކުތޯ، ހޯދައިގެން، ގުޅޭނެ ނަންބަރު ހޯދައިގެން މެސެޖުކޮށްފިން، ކުރީމަ ފުރަތަމަ ބުނަނީ އެ ފައިސާ އިނީ ތިމަންނަ އެކައުންޓުން ނަގާފަޔޯ،" އޭނާ ބުންޏެވެ.

ލަމްއާން ބުނީ އެ ވާހަކަތައް ގަބޫލު ކުރަން ދަތިވުމުން، އެ ނަންބަރަށް ގުޅި ކަމަށެވެ. ގުޅުމުން ފުރަތަމަ އެކައުންޓުގެ ވެރި ފަރާތުން ވާހަކަ ދެއްކި ނަމަވެސް ފޯނު އަތުލުމަށްފަހު ފަހުން ވާހަކަދެއްކީ އޭނާގެ ފިރިމީހާ ކަމަށް ލަމްއާން ބުންޏެވެ.

"ފޯނު އަތުލާފައި ވަރަށް ހަޑިކޮށް ވާހަކަދެއްކީ ދޯ، ބުނަނީ ކަލޭމެންނަށް ދޭންޖެހޭ ފައިސާއެއް ނޯންނާނެޔޯ، ކިޔާފައި ވާހަކަދެއްކީ، އެއްވެސް ކަމެއް ނެތިއްޔާ އެގޮތަކަށް ނޫން ދޯ ވާހަކަދައްކާނީ، ހަމަ ރީތިކޮށް ބުނަންވީއެއްނު މިއީ ސްކޭމެކޭ ތިމަންނަ އަންހެނުންގެ އެކައުންޓަށް ވަދެފައި ކޮންމެވެސް ގޮތަކުން ނަގާފައޭ ހުރީ،" ލަމްއާން ބުންޏެވެ.

ހަރުކަށިކޮށް ވާހަކަދެއްކުމަށްފަހު ފޯނު ކަނޑައިލުމުން، އެކައުންޓުގެ ވެރިފަރާތާއި އޭނާގެ ފިރިމީހާއަކީ ކޮންބައެއްކަން އެނގޭކަން، އެމީހުންނަށް އެންގުމުގެ ގޮތުންނާއި ސްކޭމަރުންނަކީ އެ މީހުން ކަމަށް ތުހުމަތު ކުރުމުގެ ޖާގަ އޮތަތީ އެމީހުންނަށް އެމީހުންގެ ވަނަވަރު މެސެޖަކުން ފޮނުވި ކަމަށް ލަމްއާން ބުންޏެވެ.

"އަހަރެން ހެދި ގޮތަކީ އެމީހުންނަކީ ކޮން ބައެއްކަން އަހަންނަށް އެނގޭކަން ދައްކާލަން، އަހަންނަށް ލިބިފައި ހުރި އެމީހުންގެ ޑީޓެއިލްސް ފޮނުވާލީ މެސެޖަކުން، ފޮނުވާލާފައި ބުނިން މި މައުލޫމާތު ހޯދި ގޮތަކަށް ފައިސާ ވެސް ހޯދާނަމޭ، ބުނީމާ މުޅި ރާގު ބަދަލުވެއްޖެ، ދެން ބުނަނީ ތިމަންނަ އެކައުންޓަށް ޖަމާވެފައި ހުރި ފައިސާގެ ތެރެއިން ފުރަތަމަ ޖަމާވި ފައިސާއޯ ނެތީ، ދެން ޖަމާ ކުރި ދެ ޕޭމަންޓު އެބަ އިނޯ ތިމަންނަގެ ބީއެމްއެލް އެކައުންޓަށް ޖަމާކޮށްފައި، އެ ފައިސާ ދޭނަމޯ،" ލަމްއާން ބުންޏެވެ.

ލަމްއާން ބުނީ އޭނާ ހޯދި މައުލޫމާތުން ސްކޭމަރު ފޮނުވި އެކައުންޓުގެ ވެރި ފަރާތުގެ ފިރިމީހާއަކީ ފުވައްމުލަކު ފުލުސް ސްޓޭޝަނުގައި މަސައްކަތް ކުރާ ސަބް އިންސްޕެކްޓަރެކެވެ. އެމީހުންގެ މައުލޫމާތު ސޯޝަލްމީޑިއާގައި ޖެހުމުން، އެ ނަގައިދިނުމަށް އެދި އެކި މީހުން މެދުވެރިކޮށް ގުޅި ކަމަށް އާތިފް ވެސް ބުންޏެވެ.

"އެމީހުންނަކީ ކޮންބައެއްކަން އެނގުނީމާ މައިތިރިވެއްޖެ، ފައިސާ ވެސް ދޭން އެއްބަސްވެއްޖެ، އެކި މީހުން ލައްވާ އެބަ ގުޅާ ފޭސްބުކުގައި ޖަހާފައި ހުރި ޕޯސްޓުތައް ރިމޫވް ކޮށްދޭށޭ ކިޔާފައި ވެސް،" އާތިފް ބުންޏެވެ.

ފުލުހުން ވެސް އެކަށީގެންވާ އެއްބާރުލުން ނުދިން ކަމަށް

އާތިފް ބުނީ އޭނާގެ ވައިބާ ހެކްކޮށް ފައިސާ ހޯދަން ސްކޭމަރު މެސެޖު ކުރަން ފެށުމާއެކު ހެންވޭރު ފުލުސް އޮފީހަށް ގޮސް މައްސަލަ ޖެއްސި ކަމަށެވެ. ނަމަވެސް އެއީ ސައިބާ ކްރައިމް އާ ގުޅުންހުރި މައްސަލައަކަށް ވާތީ އެ ޑިޕާޓުމެންޓުގެ ނަންބަރު ދިނުމަށްފަހު އެތަނަށް ދިޔުމަށް އިރުޝާދު ދިން ކަމަށް އޭނާ ބުންޏެވެ.

"ހެންވޭރުގައި އެހުރި ޕޮލިސް ސްޓޭޝަނަށް މަ ދިޔައީ ވިކްޓިމް އެއްވެސް ގޮވައިގެން، ގޮސް މަ ބުނީ މިހެން މިހެން ވެގެންނޭ މިއުޅެނީ، ބުނީމަ ބުނީ ބަޔާން ނެގޭނީ ފައިސާ ގެއްލުނު މީހާގެޔޯ، އަހަރެން ކައިރީ ބުނީ ސައިބާ ކްރައިމްއަށް ދާން،" އާތިފް ބުންޏެވެ.

ފުލުހުން އެގޮތަށް އިރުޝާދު ދިނުމުން އެތަނުގައި ހުރެފައި ސައިބާ ކްރައިމްއަށް ގުޅައި ކަން ވެގެން އުޅޭ ގޮތް ކިޔައިދިން ކަމަށް އާތިފް ބުންޏެވެ. ނަމަވެސް ވައިބާ އަނބުރާ ހޯދައިދިނުން ފިޔަވައި ކޮށްދެވޭނެ ކަމެއް ނޯންނާނެ ކަމަށް އެތަނުން ބުނި ކަމަށް އާތިފް ކިޔައިދިނެވެ.

"އެމީހުން ބުނަނީ ވައިބާ އެކަންޏޯ ރިކަވާ ކޮށްދެވޭނީ، އިތުރު ކަމެއް ނުކޮށްދެވޭނެޔޯ، ދެން މަ ބުނިން އަހަންނަށް ވެސް ވައިބާ އަނބުރާ ހޯދޭނެޔޭ، ވައިބާ ހޯދަން މެއިލް ކޮށްފައޭ މިހާރު ވެސް ވީ،" އާތިފް ބުންޏެވެ.

އޭނާ ބުނީ އޭގެފަހުން އެތައް ފަހަރަކު ފުލުހުންނާ ވާހަކަދެކެވުނު ކަމަށެވެ. ނަމަވެސް އެކަށީގެންވާވަރުގެ އެއްބާރުލުމެއް ފުލުހުންގެ ފަރާތުން ނުލިބުނު ކަމަށް އާތިފް ބުންޏެވެ.

"އެކަށީގެންވާވަރުގެ އެއްބާރުލުމެއް ފުލުހުންގެ ފަރާތުން ނުލިބުނު އަސްލު، ފުވައްމުލަކުން ވެސް ގުޅި ފުލުހުންނޭ ކިޔާފައި މީހަކު ޕޯސްޓުތައް ނަގައިދޭށޭ ކިޔާފައި،" އާތިފް ބުންޏެވެ.

"އެހެން އުޅެނިކޮށް ރޭގައި އަހަންނަށް ގުޅާފައި މަރުގެ އިންޒާރު ވެސް ދީފި މީހަކު، އެ މައްސަލަ ޖައްސަން ދިޔައިން ރޭ 11 ޖަހަން އުޅެނިކޮށް ހެޑްކުއާޓާސްއަށް، ދިޔައީމަ ބުނީ ތި މައްސަލައިގައި ބަޔާން ނެގޭނެޔޭ، ދާށޭ ހެންވޭރު ޕޮލިސް ސްޓޭޝަނަށް، އެކޮޅަށް ދިޔައީމަ ބަޔާން ނެގި ރޭގައި."

ފުލުހުންގެ ވެސް ތުހުމަތު ރައްދުވާ މީހާގެ ވެސް ބަސް ތަފާތު

އާތިފް އާއި ލަމްއާނުގެ އިތުރުން ސްކޭމުގައި ޖެހި ގެއްލުން ލިބުނު މީހުންގެ ތުހުމަތުތައް ފުލުހަކަށް އަމާޒު ކުރި ނަމަވެސް ފުލުހުންގެ ވާހަކަ މިކަމުގައި ތަފާތެވެ.

މީޑިއާތަކަށް މިއަދު ހެނދުނު ފުލުހުން ފޮނުވި މެސެޖެއްގައި ބުނީ އަންހެނެއްގެ ފޭސްބުކް އެކައުންޓު ހެކްކޮށްގެން އެ އަންހެން މީހާގެ ނަމުގައި އެހެން މީހުންގެ އަތުން ފައިސާ ހޯދަމުންދާ މައްސަލައެއް އެ މުއައްސަސާއަށް ހުށަހަޅާފައިވާ ކަމަށެވެ.

"އަންހެނެއްގެ ފޭސްބުކް އެކައުންޓު ހެކް ކޮށްގެން އެ އަންހެން މީހާގެ ނަމުގައި އެހެން މީހުންގެ އަތުން ފައިސާ ހޯދަމުންދާ މައްސަލަ ނޮވެމްބަރު 27، ވަނަ ދުވަހު ރިޕޯޓު ކޮށްފައިވޭ،" ފުލުހުން ބުންޏެވެ.

އެ މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ. އަދި އެކަމާ ގުޅިގެން އިތުރު މައުލޫމާތެއް މިވަގުތު ހާމަކުރެވެން ނެތް ކަމަށް ފުލުހުން ބުންޏެވެ.

"މިވަގުތަށް ހާމަ ކުރެވެން އޮތް މައުލޫމާތު އެއޮތީ ގްރޫޕުގައި،" ފުލުހުންގެ މީޑިއާ އޮފިޝަލް ވިދާޅުވި އެވެ.

ފުލުހުން އެހެން ބުނިއިރު، ތުހުމަތު ރައްދުވާ މީހުން ތުހުމަތުތަކަށް އިންކާރު ކުރެ އެވެ. ސްކޭމްގެ ތުހުމަތު ރައްދުވާ ފުލުސް މީހާ ސޯޝަލްމީޑިއާގައި ބުނެފައި ވަނީ އަސްލު ކުށްވެރި އަކީ އާތިފް ކަމަށެވެ. ނަމަވެސް އެ ވާހަކަތަކަށް ބާރުދޭ އެއްވެސް ހެއްކެއް އޭނާ އާންމުކޮށްފައެއް ނުވެ އެވެ.

އެހެންނަމަވެސް އޭނާގެ ވާހަކަތަކާއި އޭނާގެ އަންހެނުން (ސްކޭމަރު ބުނެގެން ފައިސާ ފޮނުވި އެކައުންޓުގެ ވެރިޔާ) ސޯޝަލްމީޑިއާގައި ކޮށްފައިވާ ޕޯސްޓުގައި ބުނެފައިވާ ވާހަކަތައް ތަފާތެވެ.

އޭނާގެ އެކައުންޓު މިހާރު ޑީއެކްޓިވޭޓު ކޮށްފައިވީ ނަމަވެސް ޑީއެކްޓިވޭޓު ކުރުމުގެ ކުރިން ކުރި ޕޯސްޓެއްގައި ބުނެފައި އޮތީ އޭނާގެ އިސްލާމިކް އެކައުންޓު ބަޔަކު ހެކް ކޮށްގެން އެ އެކައުންޓަށް ފައިސާތަކެއް ޖަމާ ކުރުމަށްފަހު އެ ފައިސާ އެހެން އެކައުންޓަކަށް ޖަމާކޮށް ނަގާފައިވާ ކަމަށެވެ. އަދި އެ މައްސަލަ ފުލުހަށް ހުށަހެޅި ކަމަށް ވެސް އޭނާގެ ޕޯސްޓުގައި ބުނެފައިވެ އެވެ.

"މިއަދުގެ މެންދުރުގެ ވަގުތެއްގައި އަޅުގަނޑުގެ އިސްލާމިކް ބޭންކު އެކައުންޓު ބަޔަކު ހެކްކޮށްގެން އެ އެކައުންޓަށް ރުފިޔާ ޖަމާ ކުރުމަށްފަހު އަޅުގަނޑުގެ އެކައުންޓުއިން އެހެން އެކައުންޓުތަކަށް ރުފިޔާ ފޮނުވައިގެން އެ ރުފިޔާ ވަނީ ސްކޭމް ކުރާ ބަޔަކު ނަގާފައި،" އިސްލާމިކް އެކައުންޓުގެ ސެކިއުރިޓީ ފީޗާސްތައް ވަރުގަދަ ކުރަން އިލްތިމާސްކޮށް އޭނާގެ ޕޯސްޓުގައި ލިޔެފައިވެ އެވެ.

ކަން މިހެން ހުރިއިރު، ސްކޭމްތަކުގެ ފަހަތުގައި ފުލުހުންނާއި ބޭންކުތަކުގައި މަސައްކަތް ކުރާ މުވައްޒަފުން ތިބޭކަމުގެ ތުހުމަތުތައް އަބަދުވެސް އޮވެ އެވެ. ބޭންކުތަކުގައި މަސައްކަތް ކުރާ މުވައްޒަފުންނާއި ފުލުހުންގެ ތެރެއިން ބައެއް މީހުންގެ މައްޗަށް އެފަދަ ކުށްތައް މީގެ ކުރިން ސާބިތުވެފައި ވެސް އެބަހުއްޓެވެ.