މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ ހުނަރުވެރި މިޑްފީލްޑަރު، އިބްރާހިމް އައިސަމް، އަނިޔާއިން ރިކަވާވެ ޕްރީ ސީޒަން ޕްރެކްޓިހުގައި ބައިވެރިވާން ފަށައިފި އެވެ.

ޖެނުއަރީ ފަހުކޮޅު ރާއްޖޭގެ ފުޓްބޯޅަ ސީޒަން ފަށަން މަސައްކަތް ކުރަމުން އަންނައިރު، މާޒިޔާ އިން އިއްޔެ ވަނީ ޕްރީ ސީޒަން ޕްރެކްޓިސް ފަށައިފަ އެވެ. އާންމު ގޮތެއްގައި މި ފަހުން، ރާއްޖޭގެ ފުޓްބޯޅަ ސީޒަނަށް އެންމެ ކުރިން ތައްޔާރީތައް ފަށާ މާޒިޔާ އިން މި ފަހަރު ވެސް ޕްރެކްޓިސް މި ފެށީ ދެ މަހެއްހާ ދުވަސް ކުރިންނެވެ.

ޕްރެކްޓިސް ފެށިއިރު، އައިސަމް ވަނީ ޓްރެއިނިންގައި ބައިވެރިވާން ފަށައިފަ އެވެ.

ގައުމީ ފުޓްބޯޅަ ޓީމުގެ މެޗެއްގެ ތެރެއިން ލަނޑު ޖެހުމަށް ފަހު އައިސަމް އުފާފާޅުކުރަނީ.--- ފޮޓޯ: އަދަދު ފައިލް ފޮޓޯ

ދާދި ފަހުން މާޒިޔާ އިން އޭއެފްސީ ޗެލެންޖް ލީގުގައި ކުޅުނު ތިން މެޗުގައި އަނިޔާގެ ސަބަބުން އައިސަމް ނުކުޅެ އެވެ. ޓީމާ އެކު، ޗެލެންޖް ލީގުގައި ކުޅެން ކުވެއިތަށް ގޮސް، މެޗު ވޯމްއަޕްގައި ވެސް ބައިވެރިވި އައިސަމް ބަލިވުމުން، ހެދި ޓެސްޓްތަކުން، އިންފެކްޝަނެއް ހުރުމާ ގުޅިގެން، ކުޅުމާ ދުރުގައި މުއްދަތެއް ހޭދަކުރަން ޖެހޭކަން ކަށަވަރުވި އެވެ.

އެހެންވެ، ރިކަވަރީ އަށް ނެގި މުއްދަތުގައި، ޗެލެންޖް ލީގުގައި މާޒިޔާ އިން ކުޅުނު ތިން މެޗާއި ގައުމީ ފުޓްބޯޅަ ޓީމުން ބަންގްލަދޭޝާ ދެކޮޅަށް ކުޅުނު ދެ މެޗު އައިސަމް އަށް ގެއްލުނެވެ. އައިސަމް އަކީ ގަވާއިދުން މާޒިޔާ އާއި ގައުމީ ފުޓްބޯޅަ ޓީމުގެ ފުރަތަމަ އެގާރައިގައި ކުޅޭ ކުޅުންތެރިއެކެވެ.

ބަންގްލަދޭޝް މެޗުގައި، އައިސަމް ޓީމުގައި ނެތުމަށް އިޝާރާތްކޮށް، ގައުމީ ކޯޗު އަލީ ސުޒޭން ވަނީ، އައިސަމް އަކީ ރާއްޖޭގައި ހުރި އެންމެ މޮޅު ކުޅުންތެރިޔާ ކަމަށް ބުނެފަ އެވެ.

ކްލަބް އީގަލްސް އާއި ޓީސީ ސްޕޯޓްސް ކްލަބަށް ކުރިން ފުރަތަމަ ޑިިވިޝަނުގައި ކުޅުނު އައިސަމް ވަނީ މި އަހަރު ސްޕޯޓްސް މިނިސްޓްރީން ދިން، މޯލްޑިވްސް ސްޕޯޓްސް އެވޯޑްސްގެ އެންމެ މޮޅު ފުޓްބޯޅަ ކުޅުންތެރިޔާގެ ގަދަ ތިނެއްގެ ތެރޭގައި ހިމެނިފަ އެވެ.